Hyrasia One – ماڭعىستاۋدا جاسىل سۋتەگىن ءوندىرۋ باعىتىندا جۇزەگە اسىرىلىپ جاتقان ەڭ ءىرى حالىقارالىق باستامالاردىڭ ءبىرى. 2021 جىلدان بەرى جوبا اياسىندا جەل مەن كۇن رەسۋرستارىن زەرتتەۋ ءۇشىن 4 مەتەوماچتا مەن 18 رادار ورناتىلىپ, گەولوگيالىق-گەودەزيالىق زەرتتەۋلەر جۇرگىزىلدى. سونداي-اق حالىقارالىق ESG تالاپتارىنا سايكەس ەكولوگيالىق جانە الەۋمەتتىك زەرتتەۋلەر جاسالدى. ناتيجەسىندە 21 تاريحي-مادەني نىسان انىقتالىپ, ارحەولوگيالىق ەسكەرتكىشتەر تىزىمىنە ەنگىزىلدى. Technip Genesis كومپانياسىمەن بىرلەسىپ دايىندالعان الدىن الا تەحنيكالىق تالداۋ (Pre-FEED) تولىق اياقتالدى.
جوبانىڭ بارلىق دايىندىق جۇمىستارى جەكە ينۆەستيتسيالار ەسەبىنەن جۇزەگە اسىرىلۋدا. ينۆەستوردىڭ جالپى سالعان قارجىسى – شامامەن 30 ملن اقش دوللارى. سونىمەن قاتار جوبا گەرمانيا تاراپىنان فەدەرالدىق ينۆەستيتسيالىق كەپىلدىك الىپ, ستراتەگيالىق ماڭىزى راستالدى.
العاشقى كەزەڭدە ەلەكتر ەنەرگياسىنىڭ 4 گۆت قۋاتتىلىعى قاراستىرىلىپ, جىلىنا 130 مىڭ توننا جاسىل سۋتەك ءوندىرۋ جوسپارلانىپ وتىر.
ءوڭىر باسشىسى نۇرداۋلەت قيلىباي جاسىل ەنەرگەتيكا سالاسىنداعى حالىقارالىق جوبالاردىڭ ءوڭىر ەكونوميكاسىن دامىتۋداعى ماڭىزىن اتاپ ءوتتى.
– وسىنداي حالىقارالىق دەڭگەيدەگى ءىرى ينۆەستيتسيالىق جوبالار ءوڭىردىڭ دامۋىنا سەرپىن بەرەدى. ماڭعىستاۋ جاسىل ەنەرگيا باعىتىندا ۇلكەن الەۋەتكە يە, سوندىقتان ءبىز مۇنداي باستامالاردى قولداۋعا مۇددەلىمىز, – دەدى نۇرداۋلەت قيلىباي.
كەزدەسۋ قورىتىندىسىندا وبلىس اكىمى وڭىردەگى ءىرى ستراتەگيالىق جوبانى جۇزەگە اسىرۋ ءۇشىن بارلىق قاجەتتى قولداۋ كورسەتىلەتىنىن جەتكىزدى.
ماڭعىستاۋ وبلىسى
