سۋرەت مادەنيەت جانە اقپارات مينيسترلىگىنەن الىندى
كەزدەسۋدىڭ نەگىزگى تاقىرىبى – ايەلدەردىڭ ەكونوميكالىق مۇمكىندىكتەرىن كەڭەيتۋگە باعىتتالعان شارالار, تسيفرلىق ەكونوميكا جاعدايىندا ايەلدەر كاسىپكەرلىگىن دامىتۋ جانە جاساندى ينتەللەكتىنى ەنگىزۋ ماسەلەلەرى.
ءوز سوزىندە ايدا بالاەۆا ايەلدەردىڭ ەكونوميكالىق مۇمكىندىكتەرىن ارتتىرۋ – وتباسى ءال-اۋقاتى مەن الەۋمەتتىك تۇراقتىلىقتىڭ ماڭىزدى فاكتورلارىنىڭ ءبىرى ەكەنىن اتاپ ءوتتى.
ۇلتتىق ەكونوميكا ۆيتسە-ءمينيسترى ازامات ءامىرين ءوز بايانداماسىندا قازاقستانداعى ايەلدەردىڭ ىسكەرلىك بەلسەندىلىگى تۇراقتى تۇردە جوعارى دەڭگەيدە ساقتالىپ وتىرعانىن جەتكىزدى. بۇگىندە شاعىن جانە ورتا بيزنەس سۋبەكتىلەرىنىڭ شامامەن 48%-ىن ايەلدەر باسقارادى. 2025 جىلدىڭ جەلتوقسان ايىنداعى جاعداي بويىنشا ەلدە 1 ميلليوننان اسا ايەل كاسىپكەر تىركەلگەن.
وتىرىس بارىسىندا تسيفرلاندىرۋ ماسەلەلەرىنە, اسىرەسە اۋىلدىق جەرلەردەگى ايەلدەردىڭ قارجىلىق قۇرالدارعا قولجەتىمدىلىگىن ارتتىرۋعا ەرەكشە نازار اۋدارىلدى. ۇلتتىق كوميسسيا توراعاسى جىل سوڭىنا دەيىن قولداۋ شارالارى مەن سالىق رەفورماسىنا بايلانىستى جاڭا مىندەتتەردى ءتۇسىندىرۋ بويىنشا ۇلتتىق اقپاراتتىق ناۋقان جۇرگىزۋدى تاپسىردى.
ايدا بالاەۆا سونداي-اق تسيفرلىق داعدىلاردى دامىتۋدا ەڭبەك نارىعىنىڭ قاجەتتىلىكتەرىنە, پەرسپەكتيۆالى باعىتتارعا باسىمدىق بەرە وتىرىپ, سالالىق ءتاسىل قولدانۋدىڭ ماڭىزدىلىعىن اتاپ ءوتتى.
وتىرىستا ۇلتتىق كوميسسيا مۇشەلەرى ايەلدەردىڭ ەكونوميكالىق دەربەستىگىن نىعايتۋعا, كاسىپكەرلىك باستامالاردى دامىتۋعا, تسيفرلىق ساۋاتتىلىقتى ارتتىرۋعا جانە ايەلدەردى ەكونوميكانىڭ جاڭا سەكتورلارىنا تارتۋعا باعىتتالعان ىسكە اسىرىلىپ جاتقان شارالار تۋرالى اقپارات بەردى.
تالقىلاۋ قورىتىندىسى بويىنشا تسيفرلىق ەكونوميكا جاعدايىندا ايەلدەر كاسىپكەرلىگىن دامىتۋ جونىندە كەشەندى جوسپار ازىرلەۋ ۇسىنىلدى. سونداي-اق ەلەكتروندىق كوممەرتسيا جانە سالىق سالۋ سالالارىنداعى ءبىلىم بەرۋ جانە ونلاين باعدارلامالاردى دامىتۋ, ايەلدەردىڭ تسيفرلىق قۇزىرەتتەرىن دامىتۋعا ارنالعان جوبالاردى مەملەكەتتىك ورگاندار, ۇەۇ, جوعارى وقۋ ورىندارى جانە يننوۆاتسيالىق الاڭداردىڭ قاتىسۋىمەن ودان ءارى كەڭەيتۋ جۇمىستارى جالعاساتىن بولدى.
بۇدان بولەك, وڭىرلىك كوميسسيالارعا ايەلدەر كاسىپكەرلىگىنىڭ جاعدايىن تالداۋ, اۋىلدىق باستامالاردى قولداۋ شارالارىن ازىرلەۋ جانە ايەلدەر جوبالارىن ىسكە اسىرۋعا قاجەتتى ينفراقۇرىلىمدى جاقسارتۋ بويىنشا ۇسىنىستار بەرىلدى.
