جيىنعا ءماجىلىس دەپۋتاتتارى, اۋىل شارۋاشىلىعى مينيسترلىگىنىڭ, جاساندى ينتەللەكت جانە تسيفرلىق دامۋ مينيسترلىگىنىڭ, اقمولا وبلىسى اكىمدىگىنىڭ, «اگرارلىق نەسيە كورپوراتسياسى» اكتسيونەرلىك قوعامىنىڭ باسشىلارى, اگروقۇرىلىمداردىڭ جەتەكشىلەرى, حالىقارالىق ۇيىمدار مەن سالالىق قاۋىمداستىقتاردىڭ ساراپشىلارى قاتىستى. ەلدىڭ ءار ايماعىنداعى فەرمەرلەر, شارۋا قوجالىقتارى, بارلىعى جۇزدەن استام اگرارلىق قۇرىلىم باسشىلارى كوشپەلى وتىرىسقا بەينەكونفەرەنتسيا بايلانىسى ارقىلى قوسىلدى.
وتىرىستى اشقان كوميتەت توراعاسى سەرىك ەگىزباەۆ جيىن مەملەكەت باسشىسىنىڭ «جاساندى ينتەللەكت داۋىرىندەگى قازاقستان» اتتى جولداۋىندا قويىلعان تاپسىرمالاردى ىسكە اسىرۋعا باعىتتالعانىن اتاپ ءوتتى. وندا اۋىل شارۋاشىلىعىن دامىتۋدا جاڭا تاسىلدەر مەن ناقتى شەشىمدەرگە ەرەكشە ءمان بەرىلگەنىن ايتتى.
«مەملەكەت باسشىسى تولىق وندىرىستىك تسيكلدى قامتيتىن, تەرەڭ قايتا وڭدەۋدى جۇزەگە اسىراتىن, وزىق تەحنولوگيالاردى بەلسەندى قولداناتىن تىگىنەن ينتەگراتسيالانعان اگروكاسىپورىندارىنىڭ تاجىريبەسىن كەڭىنەن تاراتۋ ماڭىزدى ەكەندىگىنە نازار اۋداردى. اقمولا وبلىسىن كوشپەلى وتىرىس وتكىزۋ الاڭى رەتىندە تاڭداۋىمىز كەزدەيسوق ەمەس. بيىل ءوڭىر استىق جيناۋ كولەمى بويىنشا كوشباسشى اتاندى. باسقا وڭىرلەردەن ايىرماشىلىعى, مۇندا تولىققاندى اگروحابتاردى دامىتۋعا تۇراقتى نەگىز قالىپتاسقان. دامىعان لوگيستيكالىق جانە وندىرىستىك ينفراقۇرىلىم, وڭدەۋشى كاسىپورىنداردىڭ جوعارى شوعىرلانۋى, تسيفرلىق شەشىمدەردى بەلسەندى ەنگىزۋ, سونداي-اق بيزنەستىڭ, عىلىمنىڭ جانە كادرلار دايارلاۋ جۇيەسىنىڭ تىعىز ىنتىماقتاستىعى وسى ءوڭىردىڭ باستى ارتىقشىلىعى. وسى مۇمكىندىكتەردى ەسكەرە وتىرىپ, بۇگىن ءبىز اگروحولدينگتەردىڭ ءتيىمدى جۇمىس مودەلىن, ولاردىڭ وندىرىستىك تاجىريبەسىن, تسيفرلاندىرۋدى جان-جاقتى تالقىلاماقپىز», دەدى كوميتەت توراعاسى.
وتىرىستا شىعىس قازاقستان, اتىراۋ, تۇركىستان وبلىستارىنىڭ كاسىپورىن يەلەرى مەن بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ باسشىلارى ءوز كاسىپورىندارىنىڭ جۇمىس بارىسى, جاڭا تەحنولوگيالاردى ەنگىزۋدىڭ جاي-كۇيى تۋرالى باياندادى.
دەپۋتاتتار مەن اگراريلەر ءوندىرىس پروتسەسىن تسيفرلاندىرۋ, سۋ رەسۋرسىن ۇنەمدى قولدانۋ جانە القاپتاردى ءتيىمدى پايدالانۋ تەحنولوگيالارى, مەملەكەت تاراپىنان قاراستىرىلعان جەڭىلدىكتەرگە قول جەتكىزۋ جولدارى جانە باسقا دا ماسەلەلەر بويىنشا وزدەرىن الاڭداتقان ساۋالداردى ورتاعا سالىپ, قۇزىرلى مەكەمەلەر وكىلدەرى تاراپىنان تيىسىنشە جاۋاپ الدى.
ءماجىلىس دەپۋتاتى امانجول ءالتاي اۋىل شارۋاشىلىعى ءونىمىن وندىرۋشىلەر مەن وڭدەۋشىلەردىڭ بىرلەسىپ, قويان-قولتىق جۇمىس ىستەۋىنە جاعداي جاساۋ قاجەتتىگىن ايتتى.
ء«وندىرۋشى مەن وڭدەۋشى – اگرارلىق سالانىڭ قوس قاناتى سياقتى. ەكەۋىنىڭ دە قۇقىعى قورعالۋى قاجەت. ولار ءوزارا باسەكەلەسىپ ەمەس, بىرلەسىپ جۇمىس ىستەسە عانا اگرارلىق سەكتور داميدى. سوندىقتان بۇگىنگى جيىنعا قاتىسىپ وتىرعان قۇزىرلى ورگانداردىڭ وكىلدەرى وڭدەۋشى مەن ءوندىرۋشىنىڭ بايلانىسىن نىعايتۋعا ىقپال ەتىپ, تەپە-تەڭدىكتى, ادىلەتتىلىلىكتى قامتاماسىز ەتۋى كەرەك», دەدى دەپۋتات.
ءىس-شارانى قورىتىندىلاعان سەرىك ەگىزباەۆ جيىندا كوتەرىلگەن ماسەلەلەر مەن ورتاعا سالىنعان ۇسىنىستاردىڭ بارلىعى نازارعا الىنىپ, ءتيىستى ۇسىنىمدار ۇكىمەتكە جولداناتىنىن ايتتى.
كوشپەلى وتىرىس اياسىندا دەپۋتاتتار تسەلينوگراد اۋدانى مانشۇك مامەتوۆا اۋىلىنداعى «ەن-دالا» ءسۇت-تاۋار فەرماسىنا, قوسشى قالاسىنداعى «التىن-قازىق» ەت جانە ەت-شۇجىق ونىمدەر كاسىپورنىنا, قۇس ەتىن وندىرەتىن «Aitas Agro» كاسىپورنىنا, تاۋىق ەتىنەن جارتىلاي فابريكاتتار شىعاراتىن «Il-Tov» جشس-نا بارىپ, جۇمىس پروتسەسىمەن, ولار قولداناتىن وزىق تەحنولوگيالارمەن تانىستى.
