فوتو: اشىق دەرەككوز
اكىمنىڭ سوزىنشە, سوڭعى كۇندەرى قالادا قاردىڭ قالىڭ ءتۇسۋى, سونىمەن قاتار بىرقاتار ءىرى قوعامدىق ءىس-شارالاردىڭ ءوتۋى جولدارداعى جاعدايدى قيىنداتقان.
«قار جاۋعان كۇندەرى جاعداي كۇردەلەندى, وعان قوسا 10-11 جەلتوقساندا قالادا سپورتتىق جانە باسقا دا شارالار ءوتتى. سونىڭ اسەرىنەن جولدارداعى جۇكتەمە ارتتى», دەدى جەڭىس قاسىمبەك.
ول ەكى جىل بۇرىن ەلوردا ءۇشىن سۋ جانە جىلۋمەن قامتۋ باستى ماسەلە بولعانىن ەسكە سالدى. اكىمدىكتىڭ مالىمەتىنشە, بۇل باعىتتاعى جۇمىستار تولىق ورىندالعان, قازىر قالادا اتالعان رەسۋرستار بويىنشا تاپشىلىق جوق.
«بۇگىندە ءبىرىنشى ماسەلەمىز – كولىك قوزعالىسى. جاقىن ايلاردا LRT-نى ىسكە قوسامىز. قالادا جاڭا جولدار سالىندى. كەلەسى جىلى تاۋەلسىزدىك كوشەسىن ايتارلىقتاي كەڭەيتۋدى جوسپارلاپ وتىرمىز. ەسىل جانە نۇرا اۋداندارىنان كوپىرلەرگە باعىتتالعان اعىن قيىندىق تۋدىرىپ وتىر. ەكى جاڭا كوپىردىڭ جوباسى ازىرلەنۋدە», دەدى ول.
جەڭىس قاسىمبەك جولداعى جۇكتەمەگە جاڭا جۇمىس كەستەسىنىڭ دە اسەر ەتكەنىن اتاپ ءوتتى.
«اكىمدىكتىڭ تاڭعى ساعات 7:30-دا, ال مەملەكەتتىك مەكەمەلەردىڭ تاڭعى ساعات 8:00-دە جۇمىس ىستەي باستاۋى اسەر ەتتى. تاڭعى 8-10 ارالىعىندا كوشەلەر ايتارلىقتاي بوسادى. دەگەنمەن, قوزعالىس ەندى 06:30-دان باستالادى. سوعان قاراماستان, جالپى جىلجۋ جىلدامدىعى 15 پايىزعا ارتتى», دەدى اكىم.
قالا باسشىسى اكىمدىك تاراپىنان كەپتەلىستى ازايتۋعا باعىتتالعان ناقتى جوسپارلار دايىندالعانىن جەتكىزدى.
ەسكە سالا كەتەيىك, قازان ايىندا جۋرناليستەر استانا اكىمىنە جاڭا جۇمىس كەستەسىنە قاراماستان, جولدارداعى كەپتەلىستىڭ نەگە ازايماعانى تۋرالى ساۋال قويعان ەدى. سول كەزدە قاسىمبەك وزگەرىستەر كەزەڭ-كەزەڭىمەن جۇزەگە اسىپ جاتقانىن ايتىپ, اكىمدىككە ۋاقىت بەرۋدى سۇراعان.
بۇعان دەيىن قالا اكىمى LRT-نىڭ كەلەسى باعىتى قوسشىعا قاراي سالىناتىنىن ايتقان ەدى. اكىمنىڭ سوزىنشە, بۇگىندە قوسشىدان ەلورداعا كۇن سايىن 15-20 مىڭ كولىك قاتىنايدى. بۇل قالا كوشەلەرىنە ەلەۋلى جۇكتەمە ءتۇسىرىپ وتىر.
