يدەيا باستاۋى
«AR Sana» كەزدەيسوق يدەيانىڭ ناتيجەسى ەمەس. جوبانىڭ نەگىزىندە ناقتى الەۋمەتتىك سۇرانىس پەن عىلىمي ىزدەنىس قاتار جاتقانىن بايقايمىز. اينۇر ءنۇرادىل نيۋ-يورك ۋنيۆەرسيتەتىندە بالالار مەدياسى مەن ەرتە دامۋ ماسەلەلەرىن زەرتتەگەن. ەلگە ورالعان سوڭ, ول 50-دەن استام ەرەكشە قاجەتتىلىگى بار بالانىڭ اتا-انالارىمەن سۇحباتتاسىپ, كوپتەگەن وتباسىنىڭ لوگوپەدكە جۇيەلى بارۋعا مۇمكىندىگى شەكتەۋلى ەكەنىن نەمەسە كومەككە كەش جۇگىنەتىنىن بايقاعان.
«مەن اۋتيستىك سپەكتر بۇزىلىسى, تسەرەبرالدى سال اۋرۋى (تسسا), وزگە دە ەرەكشەلىگى بار كوپتەگەن بالادا ءتىلدىڭ كەشەۋىلدەۋى العاشقى بەلگىلەردىڭ ءبىرى ەكەنىن اڭعاردىم. سول كەزدەن باستاپ بالالاردىڭ ەركىن دامۋىنا كومەكتەسكىم كەلدى», دەيدى ول.
جوبانىڭ ەرەكشەلىگى
«AR Sana»-نىڭ باستى كۇشى – ەكى باعىتتىڭ توعىسۋىندا. ءبىر جاعىنان, جوبا زاماناۋي بالالار مەدياسىنىڭ عىلىمي زەرتتەلگەن تاسىلدەرىنە سۇيەنەدى, ياعني بالانىڭ نازارىن ۇستاپ تۇرۋ, ەموتسيالىق بايلانىس قۇرۋ, ۆيزۋالدى ويلاۋدى دامىتۋ, كونتەنتتى قابىلداۋ پسيحولوگياسى سەكىلدى كومپونەنتتەر ەسكەرىلگەن. ەكىنشى جاعىنان, لوگوپەديالىق جانە ءتىل دامىتۋ تاجىريبەسى جۇيەلى تۇردە ەنگىزىلەدى.
تاعى ءبىر ايقىن ەرەكشەلىك – رەپرەزەنتاتسيا. قوسىمشا كەيىپكەرىنىڭ قازاق قىزى رەتىندە جاسالۋى, ۆيزۋالدى الەمنىڭ قازاقستان مەن ورتالىق ازيا تابيعاتىنا جاقىن قۇرىلۋى, ەڭ باستىسى – كونتەنتتىڭ تولىقتاي قازاق تىلىندە ۇسىنىلۋى ۇلتتىق بالالار مەدياسىنداعى ساپالى ءونىم تاپشىلىعىن ازايتۋعا باعىتتالعان ناقتى قادام بولىپ وتىر. ويتكەنى قادىر مىرزا ءالى ايتپاقشى, «قازاق ءتىلى بالا تىلىنە اينالماي, انا تىلىنە اينالمايدى»...
قوسىمشا قالاي جۇمىس ىستەيدى؟
قولدانبانىڭ جۇمىس لوگيكاسى بالانى «جاتتىعۋعا ماجبۇرلەۋ» ەمەس, ويىنعا ەركىن ەنگىزۋ قاعيداسىنا قۇرىلعان. AR كورىنىسى ارقىلى سانا ەسىمدى ۆيزۋالدى قىز بالانىڭ ءوز بولمەسىندە پايدا بولادى. كوپ بالا سويلەگىسى كەلمەگەندىكتەن ەمەس, بەيتانىس ادامنان جانە جاڭا ورتادان قىسىلعاندىقتان لوگوپەدپەن اشىلىپ سويلەسپەيدى. ال AR كەڭىستىگى بالانىڭ قاۋىپسىزدىك سەزىمىن ساقتاپ, سويلەسۋگە پسيحولوگيالىق جول اشادى.
AR بولىگى اياقتالعان سوڭ, بالا ۆيرتۋالدى بولمەگە ەنىپ, سوزدەر مەن سويلەمدەردى قايتالاۋ, دىبىستاردى دۇرىس قويۋعا ارنالعان شاعىن تاپسىرمالار ورىندايدى. جوبا جەتەكشىسىنىڭ ايتۋىنشا, «AR Sana» لوگوپەدتىڭ ورنىن الماستىرمايدى, كەرىسىنشە ونىڭ جۇمىسىن تولىقتىرۋدى ماقسات ەتەدى. مامان فيزيكالىق جانە تەراپيالىق باعىتتارعا, ياعني ماسساج, ۇساق موتوريكانى دامىتۋ سەكىلدى كومپونەنتتەرگە نازار اۋدارسا, بالا ۇيدە سوزدىك جانە ارتيكۋلياتسيالىق داعدىلاردى تۇراقتى تۇردە بەكىتە الادى.
ەندىگى مەجە
كوماندا ارتيكۋلياتسيالىق جاتتىعۋلاردى ەنگىزۋدى باستاپ كەتكەن. الداعى ۋاقىتتا 35-تەن استام ارتيكۋلياتسيالىق جاتتىعۋ قوسۋ جوسپارلانعان. بۇل ادىستەر جەتەكشى لوگوپەد اجار نۇركەنوۆامەن بىرلەسىپ ازىرلەنىپ, كەيىن تاۋەلسىز مامانداردىڭ باعالاۋىنان وتپەك. وسى ءتاسىل ءونىمنىڭ ادىستەمەلىك ساپاسىن كۇشەيتۋگە باعىتتالعان.
ء«بىزدىڭ جولىمىز «استانا Hub»-تا باستالدى. تەحنوپاركتىڭ ەكى باعدارلاماسىنان وتكەن ەدىك, سول كەزدەن بەرى ولار ءبىزدى تۇراقتى تۇردە قولداپ كەلەدى. ياعني ساراپتامالىق كونسۋلتاتسيالار, پيتچينگكە دايىندىق, پرەزەنتاتسيانى نىعايتۋ – بارىندە ۇلكەن دەمەۋ بولدى. سونىمەن قاتار نازارباەۆ ۋنيۆەرسيتەتىندەگى «Social Startup» باعدارلاماسى ارقىلى رەسمي تۇردە الەۋمەتتىك جوبا رەتىندە تانىلىپ, نەبارى ءبىر اپتا بۇرىن 10 ملن تەڭگە كولەمىندەگى گرانتتى جەڭىپ الدىق. بۇل ءبىزدىڭ ميسسيامىزدىڭ قوعام ءۇشىن ماڭىزدى ەكەنىن تاعى دا دالەلدەدى», دەيدى اينۇر ءنۇرادىل.
كوماندانىڭ ماقساتى ءبىر عانا قوسىمشامەن شەكتەلمەيدى. «Green Álem Creative Studio» اياسىندا AR تەحنولوگياسى ەنگىزىلگەن كىتاپشالار مەن انيماتسيا جاساۋ جوسپارى بار. بۇل – قازاقشا بالالار مەدياسىن عىلىمي نەگىزدە, تەحنولوگيالىق دەڭگەيدە جۇيەلى تۇردە دامىتۋدى كوزدەيتىن كەڭىرەك ستراتەگيانىڭ ءبىر بولىگى.
