شىلدە ايىندا تەگىن مەديتسينالىق كومەكتىڭ كەپىلدەندىرىلگەن كولەمى (تمككك) جانە مىندەتتى الەۋمەتتىك مەديتسينالىق ساقتاندىرۋ (مامس) شەڭبەرىندە مەديتسينالىق كومەك الۋعا قاتىستى بىرقاتار وزگەرىستەر مەن تولىقتىرۋلار قابىلداندى.
ەڭ الدىمەن, كومەك پاكەتتەرى قايتا قارالدى. سونىمەن بىرگە, الەۋمەتتىك ساناتتار ءۇشىن مەملەكەت تولەيتىن جارنا مولشەرلەمەلەرى, سونداي-اق جۇمىسشىلاردىڭ ءمامس جارنالارىن ەسەپتەۋ شەگى مەن جۇمىس بەرۋشىلەردىڭ اۋدارىمدارىنا قاتىستى شەكتى مولشەرلەر وزگەردى. بۇدان بولەك, ءال-اۋقاتى تومەن ازاماتتاردى قامتۋعا باعىتتالعان شارالار قابىلداندى.
وزگەرىستەردىڭ ءبىر بولىگى بۇگىندە كۇشىنە ەنگەن, ال كەيبىرى 2026 جىلى, تاعى بىرقاتارى 2027 جىلى قولدانىسقا ەنگىزىلمەك.
ءمامس تۋرالى زاڭنىڭ جاڭا نورمالارى جونىندە دەنساۋلىق ساقتاۋ مينيسترلىگىنىڭ ءمامس جۇيەسىن جەتىلدىرۋ جانە تالداۋ دەپارتامەنتىنىڭ ديرەكتورى ءلاززات شومانوۆا ايتىپ بەردى. ونىڭ ايتۋىنشا, مەديتسينالىق قىزمەتتەردىڭ ەڭ كوپ تۇتىنۋشىلارى – بالالار مەن قارتتار.
«ەلىمىزدە ءومىر ءسۇرۋ ۇزاقتىعىنىڭ ارتۋ كورسەتكىشتەرى جاقسى. حالقىمىزدىڭ ءومىر ءسۇرۋ ۇزاقتىعى ءوسىپ كەلەدى. بۇل – مەديتسينالىق قىزمەتتەرگە قولجەتىمدىلىكتىڭ جاقسارۋىنىڭ ناتيجەسى. ياعني, ازاماتتار دەنساۋلىقتارىنا كوبىرەك كوڭىل بولە باستادى, بۇرىن قولجەتىمسىز بولعان جوعارى تەحنولوگيالىق, قىمبات مەديتسينالىق كومەكتى الا باستادى. ءمامس ەنگىزىلگەلى مۇنداي قىزمەتتەردىڭ كولەمى ارتتى», دەدى ول.
ءلاززات شومانوۆانىڭ ايتۋىنشا, تەگىن مەديتسينالىق كومەكتىڭ كەپىلدەندىرىلگەن كولەمىنە الەۋمەتتىك ءمانى بار اۋرۋلار ەنگىزىلگەن.
«الەۋمەتتىك ءمانى بار اۋرۋلاردىڭ تىزبەسى مينيسترلىك تاراپىنان قايتا قارالدى. ال ديناميكالىق باقىلاۋدى قاجەت ەتەتىن وزگە سوزىلمالى اۋرۋلاردى بىرتىندەپ ءمامس پاكەتىنە كوشىرۋ جۇمىسى ءجۇرىپ جاتىر», دەيدى ول.
سونىمەن قاتار, كەيبىر ازاماتتار وزدەرىنىڭ ءمامس-كە جوعارى مولشەردە جارنا تولەيتىنىن ايتىپ, ءوزىن-ءوزى جۇمىسپەن قامتيتىندار ءۇشىن قازىرگى 4250 تەڭگە مولشەرىندەگى جارنانى ارتتىرۋدى سۇراعان.
ء«بىز بۇل سومانى بۇرىنعى دەڭگەيدە قالدىردىق. سەبەبى ازاماتتاردىڭ بۇل جۇيەگە قينالماي كىرۋىن قامتاماسىز ەتكىمىز كەلەدى», دەدى شومانوۆا.
ول الەم ەلدەرىندەگى تاجىريبەگە دە توقتالدى. ونىڭ ايتۋىنشا, باسقا مەملەكەتتەردە تەگىن مەديتسينالىق كومەكتىڭ كەپىلدەندىرىلگەن كولەمى وتە از. ونىڭ ۇستىنە, بار پاكەت كولەمىنىڭ ءوزى تولىق مەديتسينالىق كومەك الۋعا مۇمكىندىك بەرمەيدى – بەلگىلى شەكتەۋلەر بولادى.
ء«مامس-كە جارنا تولەۋدىڭ ۇزدىكسىز بولۋى مىندەتتى. بىزدە بۇعان دەيىن قىمبات دياگنوستيكالىق زەرتتەۋلەر ءمامس پاكەتىنە كىرەتىن, ەندى ولار تمككك-گە اۋىستىرىلدى. حالىق مۇنى ءبىلۋى كەرەك جانە بۇل مۇمكىندىكتى پايدالانىپ, ونكولوگيالىق اۋرۋلاردى ەرتە كەزەڭدە انىقتاۋعا كوڭىل ءبولۋى ءتيىس», دەدى ول.
