بۇل ءتۋرنيردىڭ تاريحى تەرەڭ. «شىعىس سىمباتى» دوداسى 30 جىلدان بەرى ۇزدىكسىز وتكىزىلىپ كەلەدى. وسى ۋاقىت ىشىندە تالاي تالانت تانىلدى. ءبىر كەزدەرى ءدال وسى الاڭدا الەمگە ايگىلى رەسەيلىك گيمناست الينا كاباەۆا دا ونەر كورسەتكەن.
«مەن ۇستازدىق ەتكەن جىلدارى 55-تەن اسا سپورت شەبەرىن دايىندادىم. قىزدارىمنىڭ كوبى وزدەرى جاتتىقتىرۋشى بولىپ جۇمىس ىستەيدى. بىرقاتارى رەسەيگە, جاقىن قالالارعا كەتتى. وسىلايشا ءبىزدىڭ سپورت ءتۇرى كەڭىنەن دامىپ كەلەدى. گيمناست قىزدارىمىز ازياداعا بارىپ, ءبىر كۇمىس پەن ەكى التىن الىپ كەلدى. بۇل ءبىزدىڭ وبلىس ءۇشىن وتە ۇلكەن جەتىستىك», دەيدى جارىستىڭ نەگىزىن قالاۋشى ليليا كۋزمينا.
بيىلعى تۋرنيرگە پاۆلودار, اباي, شىعىس جانە استانا قالاسىنىڭ جاس سپورتشىلارىمەن قاتار, رەسەي, بەلورۋسسيا جانە مالايزيادان كوماندالار كەلدى. سپورتشىلار دا, جاتتىقتىرۋشىلار دا بۇل دوداعا ەرەكشە دايىندىقپەن كەلگەن. سىمباتتىلار سايىسىنا 5 پەن 15 جاس ارالىعىنداعى سپورتشىلار قاتىسىپ, ۇزدىكتەر انىقتالدى.
«كوركەم گيمناستيكاعا بالالار وتە ەرتە جاستان كەلەدى. سوندىقتان, الاڭدا 3 كۇن بويى تاجىريبەسى دە, دەڭگەيى دە ءارتۇرلى سپورتشىلار ءبىر مەزەتتە ونەر كورسەتتى. كورسەتكىش كوڭىلدەن شىقتى. كەلەسى ماۋسىمعا لايىقتى باعىت-باعدار ايقىندالدى. بيىلعى ماۋسىم وسىمەن اياقتالدى. كەلەسى كەزەڭ قاڭتار ايىندا باستالادى» دەدى وبلىستىق كەشەندى مامانداندىرىلعان بالالار-جاسوسپىرىمدەر وليمپيادالىق رەزەرۆ سپورت مەكتەبىنىڭ ديرەكتورى انار جانتاسوۆا.
جارىس گالا-كونتسەرتپەن تۇيىندەلدى. ءار كوماندا وزدەرىنىڭ ۇزدىك بي قويىلىمىن كوپشىلىككە ۇسىنىپ, الاڭ اتموسفەراسىن ەرەكشە كۇيگە بولەدى. ۇزدىكتەردى وبلىس اكىمى نۇرىمبەت ساقتاعانوۆ ماراپاتتادى. ايماق باسشىسى مۇنداي جارىستار جاس گيمناستتاردىڭ شەبەرلىگىن شىڭداپ, تاجىريبە الماسۋىنا مۇمكىندىك بەرەتىنىن اتاپ ءوتتى.
وسكەمەن
