فوتو: astanahub.com
4sell.ai – الەمدە بالاماسى جوق AI-پلاتفورما. ول سەرۆيستىڭ ساپاسى مەن كليەنت تاجىريبەسىن ولشەۋگە مۇمكىندىك بەرەدى. ستارتاپتى قاراعاندىلىق سىنىپتاستار – رومان بەلوپولسكي جانە كونستانتين بالزين قۇرعان.
جۇيە قىزمەتكەرلەردىڭ قۇرىلعىلارىندا تىكەلەي جۇمىس ىستەيدى: كاسسالاردا, كولل-ورتالىقتاردا جانە داياشىلاردىڭ تەرمينالدارىندا. سەرۆيس بيزنەسكە قوسىمشا ساتىلىمداردى ارتتىرۋ ارقىلى تابىس وسىرۋگە, real-time كەڭەستەردىڭ كومەگىمەن قاتەلەردى ازايتۋعا, پەرسونالدى ءتيىمدى وقىتۋعا جانە قۇپيا ساتىپ الۋشىلارسىز – ءار فيليال مەن قىزمەتكەر بويىنشا كۇن سايىن اشىق اناليتيكا الۋعا مۇمكىندىك بەرەدى.
«ورتاشا چەك كولەمىنىڭ نەبارى 8%-عا ءوسۋى 50 كافە جەلىسىنە جىلىنا 1 ملن دوللار قوسىمشا تابىس اكەلۋى مۇمكىن», دەيدى 4sell.ai كومپانياسىنىڭ باس ديرەكتورى رومان بەلوپولسكي.
Astana Hub مالىمەتىنشە, قىزمەتكەرلەر ستاندارتتاردى ورىنداعانى ءۇشىن لەزدە بونۋس الادى – گەيميفيكاتسيا سەرۆيس ساپاسىن باقىلاۋدى موتيۆاتسيا مەن ءوسۋدىڭ قۇرالىنا اينالدىرادى. موتيۆاتسيا مەن گەيميفيكاتسيا ەنگىزىلگەن سوڭ, كليەنت جەلىلەرىندەگى قوسىمشا ساتىلىمداردىڭ ۇلەسى ورتا ەسەپپەن +8%-عا, ال جەكەلەگەن قىزمەتكەرلەردە 16-19%-عا جەتكەن. Hani جەلىسىندەگى العاشقى ەنگىزۋلەر ورتاشا چەك پەن پەرسونال بەلسەندىلىگىنىڭ ارتقانىن كورسەتىپ وتىر. كليەنتتەر قاتارىندا HoReCa نارىعىنىڭ جەتەكشىلەرى – SF, Zebra Coffee, Coffee Hub, سونداي-اق العاشقى ءدارىحانا جەلىسى Biopharma بار. قازىرگى كليەنتتەردىڭ جالپى فيليال سانى 200-دەن اسادى.
تارتىلعان قارجى پلاتفورمانى دامىتۋ مەن ەنگىزۋ قارقىنىن كۇشەيتۋگە باعىتتالادى: داياشىلارعا ارنالعان جاڭا قوسىمشا, self-service فۋنكتسيالارى, جەتىلدىرىلگەن گەيميفيكاتسيا, سونداي-اق سويلەۋ ءاناليزىنىڭ دالدىگىن ارتتىرۋ جانە edge-اناليز فورماتىنا كوشۋگە ارنالعان R&D جاسالادى.
2026 جىلى 4sell.ai 1000 نىسانعا دەيىن اۋقىمىن كەڭەيتۋدى, ءوزىن-ءوزى اقتاۋ دەڭگەيىنە جەتۋدى جانە اقش نارىعىنا شىعۋعا دايىندىقتى جوسپارلاپ وتىر.
رومان بەلوپولسكيدىڭ ايتۋىنشا, MOST Accelerator Fund باعدارلاماسى دامۋ مەن فاندرەيزينگكە دەگەن كوزقاراستى قايتا قاراۋعا كومەكتەسكەن.
ء«بىز ينۆەستورلارمەن دۇرىس قارىم-قاتىناس قۇرۋدى ۇيرەندىك جانە كومانداعا ارتىق قاتەلىكسىز وسۋگە كومەكتەسەتىن ادۆايزەر تاپتىق. اۋقىمدى كەڭەيتۋگە العاشقى سەرپىن قاراعاندىداعى مۇرات ءابدىراحمانوۆتىڭ ۆەنچۋرلىق ويلاۋ تۋرالى ءدارىسى بولدى. سول دارىستەن كەيىن ءبىز ونىمگە جاڭاشا قاراپ, العاش رەت حالىقارالىق نارىق تۋرالى ويلاي باستادىق. بۇل شارانى ۇيىمداستىرعان Terricon Venture جەتەكشىسى ماريا جيركوۆاعا العىس ايتامىز», دەيدى رومان بەلوپولسكي.
ايتا كەتەلىك, MOST Accelerator Fund – ورتالىق ازياداعى AI B2B ستارتاپتارىن قولدايتىن, كولەمى 10 ملن دوللاردى قۇرايتىن ۆەنچۋرلىق قور-اكسەلەراتور. قور پورتفەلىندە 10 كوماندا بار, ولاردىڭ بارلىعى قاتاڭ ىرىكتەۋدەن وتكەن جانە حالىقارالىق نارىققا شىعۋ الەۋەتىن كورسەتەدى.
MA7 Ventures – ورتالىق ازياداعى ەڭ ءىرى كاسىپكەر مۇرات ءابدىراحمانوۆ نەگىزىن قالاعان ۆەنچۋرلىق ەكوجۇيە. پورتفەلدە 60-تان استام جوبا بار, ينۆەستيتسيالار كولەمى 25 ملن دوللاردان اسادى. بۇل – ايماقتاعى العاشقى پايدا اكەلەتىن ۆەنچۋرلىق ەكوجۇيە.
Axiom Capital – كورپوراتيۆتىك B2B-باعدارلامالىق قامتۋ سالاسىنداعى كومپانيالارعا ماماندانعان ۆەنچۋرلىق قور.
