بايقاۋ اياسىندا جاس ونەرپازدار «قاراتاۋ» ءداستۇرلى ونەر مەكتەبىندە بەلگىلى ايتسكەرلەرمەن جۇزدەسىپ, شەبەرلىك سىنىبىنان ءوتتى. تانىمال ايتىسكەرلەر قاتارىندا انار جاپپارقۇلوۆا, ءومىرجان كوپبوسىنوۆ, ءبىرجان بايتۋوۆ پەن نۇرلان ەسەنقۇلوۆتار بولدى. «قاراتاۋ» ءداستۇرلى ونەر مەكتەبى جاستاردى ايتىس ونەرىنە دە باۋليدى. جاقىندا وسى ونەر ورداسىنىڭ جاس شاكىرتى «قولا دومبىرا» ايتىسىندا جەڭىمپاز اتاندى.
جىر سايىسىندا رەسپۋبليكاعا بەلگىلى ايتىسكەرلەر سەرىكزات دۇيسەنعازى, بەكارىس شويبەكوۆ, جانسايا مۋسينا, ءومىرجان كوپبوسىنوۆ, انار جاپپارقۇلوۆالار قازىلىق ەتتى.
ءىس-شارانىڭ اشىلۋ سالتاناتىندا ءسوز سويلەگەن س.دۇيسەنعازى:
«مۇحتار اۋەزوۆ ايتقانداي, «ايتىس – دالا تەاترى», بايقاۋدا وقۋشىلاردىڭ ءسوز ونەرى عانا ەمەس, ساحنادا ءوزىن-ءوزى ۇستاۋ مادەنيەتى مەن اكتەرلىك شەبەرلىكتەرى دە سىنعا تۇسەدى» دەدى.
جىر دوداسىندا جارىپ شىققان جاس ايتىسكەرلەرگە 1 ملن مەن 300 مىڭ تەڭگە اراسىندا قارجىلاي سىيلىقتار بەرىلدى. باس جۇلدەنى شىمكەنتتىك ايشا باقتيار يەلەنسە, ءبىرىنشى ورىندى قوستانايدان كەلگەن نۇريسلام راگات جەڭىپ الدى. ەكىنشى ورىنعا تۇركىستاندىق مەيىرجان بولات پەن استانالىق ايعانىم ماقسۇتقان يە بولدى. ال, ءۇشىنشى ورىن شىمكەنتتەن قاتىسقان يسلام ءالي مەن قىزىلوردا وبلىسىنان كەلگەن شىڭعىسحان قارىنبايعا بۇيىردى. ەكى جاس اقىنعا ارنايى جۇلدەلەر بەرىلسە, قالعان سەگىز جاس اقىنعا ىنتالاندىرۋ سىيلىقتارى تابىستالدى.
شىمكەنت
