پەتروپاۆلداعى ىشكى اسكەرلەر ۋچيليششەسى (قازىرگى ۇلتتىق ۇلان اكادەمياسى) مەن ۇلتتىق قورعانىس ۋنيۆەرسيتەتىندەگى ۇلتتىق ۇلان فاكۋلتەتىنىڭ قۇرىلۋ تاريحىنا توقتالعان ر.جاقسىلىقوۆ قۇقىقتىق ءتارتىپ اسكەرىنە بىلىكتى, جوعارى ساناتتى وفيتسەرلەر اۋاداي قاجەت بولعانىن ەسكە الدى. ول ۋاقىتتا ىشكى اسكەردە جوعارى اسكەري ءبىلىمى بار نەبارى 7-اق وفيتسەر قىزمەت ەتسە كەرەك. ال جەكە قۇرامعا جۇكتەلگەن مىندەتتەر كۇن سايىن ۇلعايىپ, كۇردەلەنە تۇسكەن ەدى.
«جاۋىنگەرلەرىمىز قوعامدىق ءتارتىپتى قامتاماسىز ەتۋدە كۇن سايىن قيىندىقتارعا تاپ بولاتىن, بۇزاقىلار توپتارىنا توسقاۋىل بولۋدا, تەرروريزممەن كۇرەستە دە قيىندىقتار تۋدى. ۋاقىت بىزدەن باسقارۋ جۇيەسىنىڭ زامان اعىمىنا, ەلىمىزدە ورىن الىپ جاتقان وزگەرىستەر مەن وقيعالارعا سايكەس بولدى. جوعارى وقۋ ورنىن اشۋ جولىندا قانشاما ۋاقىت كەتتى. دەگەنمەن ماقساتىمىزعا قول جەتكىزدىك. تۇڭعىش رەت زاڭ جۇزىندە قۇقىقتىق ءتارتىپ اسكەرىنىڭ ءبىلىم ورداسىن قۇردىق. وسى فاكۋلتەتتى دە قانداي ماقتانىشپەن اشقانىمىز ءالى ەسىمدە», دەدى ول.
رۋسلان فاتيح ۇلى پەتروپاۆلداعى ىشكى اسكەر ۋچيليششەسىن اسكەري ينستيتۋت ەتىپ قايتا رەفورمالاۋ ماسەلەسى دە ۇلكەن جۇمىس بولعانىن اڭگىمەلەدى. ول بۇل جۇمىستىڭ ءبارى ءوز ءىسىن شەكسىز سۇيگەن وفيتسەرلەردىڭ ارقاسىندا جۇزەگە اسقانىن ايتتى.
«بۇگىنگى اۋديتورياعا ەسىمى بەرىلىپ وتىرعان پولكوۆنيك تولەڭگىتوۆ تە ءوزىنىڭ جەكە ۋاقىتىن, ءتىپتى ءومىرىن ارناعانىنا مەن كۋامىن. ول كەزدە ينستيتۋت باستىعىنىڭ ورىنباسارى پولكوۆنيك احمەتوۆ ەدى, قانات فايزراحمان ۇلى ەكەۋىنىڭ ەڭبەگى كوپ ءسىڭدى», دەدى گەنەرال-پولكوۆنيك.
ۇلتتىق ۇلان باس قولباسشىسىنىڭ ورىنباسارى, گەنەرال-مايور باۋىرجان ءابجانوۆ: «قانات فايزراحمان ۇلىن اسكەري پەداگوگيكا سالاسىنىڭ بەلسەندى ارحيتەكتورى دەپ ەسەپتەيمىن. ونىڭ يدەيالارى, ەڭبەكتەرى مەن وقۋ-زەرتتەۋلەرى, اسكەري عىلىمعا دەگەن كوزقاراسى – كادرلىق وفيتسەرلەر دايارلاۋ جۇيەسىنە تىرەك بولدى دەپ نىق سەنىممەن ايتۋعا بولادى. سوندىقتان عالىمنىڭ ەسىمىن ۇلىقتاۋدى – ونىڭ كاسىبي مۇراسىن جاس بۋىنعا ۇلگى ەتۋ جانە ەل مۇددەسىنە ادال قىزمەت ەتۋدىڭ قۇندىلىعىن دارىپتەۋ دەپ ءتۇسىنۋ كەرەك», دەدى.
ۇلتتىق قورعانىس ۋنيۆەرسيتەتىنىڭ باستىعى, گەنەرال-مايور اسقار مۇستابەكوۆ قانات تولەڭگىتوۆپەن بىرگە قىزمەت ەتپەسە دە, بۇگىندە ۋنيۆەرسيتەت سول كىسىنىڭ جاساپ كەتكەن ەڭبەگىنىڭ جەمىسىن كورىپ وتىرعانىنا توقتالدى.
«ونىڭ عىلىمي ەڭبەكتەرىمەن تانىسىپ, ول كىسىنىڭ پاراساتتى ادام, ءوز ەلىنىڭ پاتريوتى, ەسىمى باس ارىپپەن جازىلار وفيتسەر ەكەنىنە كوزىم جەتتى. سەبەبى ول قىسقا عانا عۇمىرىندا وتە ۇلكەن ءىس اتقاردى, ساۋاپتى ءىس جاسادى, اسكەري ءبىلىمدى دامىتۋ جولىندا قىزمەت ەتىپ, ءىز قالدىرعان ازامات بولدى. بار-جوعى 42 جىل ءومىر ءسۇرىپ, مۇنداي ۇلكەن ءىستى تىندىرۋ ەكىنىڭ ءبىرىنىڭ قولىنان كەلمەيدى», دەدى ول.
عالىم اتىن يەلەنگەن اۋديتوريادا پولكوۆنيك قانات تولەڭگىتوۆتىڭ عىلىمي ەڭبەكتەرى, اسكەري قىزمەتتەگى جەتىستىكتەرى مەن ءومىر جولى تۋرالى باياندالعان تاقتا ورنالاستىرىلعان. فاكۋلتەت باسشىسى, پولكوۆنيك ساۆەردين يميروۆ اشىلۋ سالتاناتىندا بۇل اۋديتوريا بولاشاق وفيتسەرلەردى دايارلاۋ ىسىندە, عىلىمي زەرتتەۋ جۇمىستارىن جۇرگىزۋدە ءارى اسكەري-پاتريوتتىق تاربيەنى نىعايتۋدا ماڭىزدى ءرول اتقاراتىنىن ايتتى. ول عالىمنىڭ اناسى ساكەن مۇقاجانقىزى مەن اياۋلى جارى, پولكوۆنيك ەرا مۇحامەدجانقىزىنا سىي-سياپات كورسەتىپ, گۇل شوقتارىن ۇسىندى.
