فوتو: مەملەكەتتىك قىزمەت ىستەرى اگەنتتىگى
كونفەرەنتسيادا ادالدىق مادەنيەتىن قالىپتاستىرۋداعى ارداگەرلەر كەڭەسىنىڭ ءرولى, تالىمگەرلىكتى دامىتۋ ماسەلەلەرى تالقىلاندى. الدىڭعى بۋىن ارداگەرلەر تاجىريبەسىن كەيىنگى جەتكىنشەكتەرگە ۇلگى-ونەگە رەتىندە ۇسىنۋدىڭ ماڭىزدىلىعى اتالدى.
كوپشىلىككە ءمالىم, مەملەكەتتىك قىزمەت ىستەرى اگەنتتىگىنە بۇرىنعى سىبايلاس جەمقورلىققا قارسى ءىس-قيمىل اگەنتتىگىنىڭ بىرقاتار فۋنكتسياسى مەن وكىلەتتىگى بەرىلگەن بولاتىن. اتاپ ايتقاندا, سىبايلاس جەمقورلىققا قارسى ساياساتتى جۇزەگە اسىرۋ, وسى سالاداعى ءىس-قيمىلداردى ۇيلەستىرۋ, سونداي-اق سىبايلاس جەمقورلىققا قارسى مادەنيەتتى قالىپتاستىرۋ مىندەتتەرى جۇكتەلدى. ال جەمقورلىقپەن كۇرەس سەكىلدى كەشەندى يدەولوگيالىق جۇمىستا ءداستۇر ساباقتاستىعىنىڭ ماڭىزى ەرەكشە.
ءىس-شارا بارىسىندا ءسوز العان مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي: «جەمقورلىقتىڭ الدىن-الۋ شارالارىن تۇراقتى تۇردە جەتىلدىرۋدە تالىمگەرلىك ينستيتۋتىنىڭ ماڭىزى ەرەكشە. جەمقورلىققا قارسى قىزمەت ارداگەرلەرى كەڭەسىنىڭ تاجىريبەسى – جاس مامانداردى قولداۋ, تاجىريبە الماسۋ, كاسىبي داستۇرلەردى نىعايتۋ مەن ساباقتاستىق ءۇشىن وتە ماڭىزدى ءرول اتقارادى», دەدى.
كونفەرەنتسيا قورىتىندىسى بويىنشا تاراپتار سىبايلاس جەمقورلىقتىڭ الدىن الۋ مادەنيەتىن نىعايتۋ باعىتىنداعى ىنتىماقتاستىق تۋرالى قۇجاتقا قول قويدى.
