فوتو: polisia.kz
بۇگىندە ءوڭىردىڭ 15 اۋىلى رەسمي تۇردە الكوگول ساتپايتىن جانە قولدانبايتىن «ىشىمدىكسىز ەلدى مەكەن» مارتەبەسىن الدى. بۇل شەشىم جەرگىلىكتى تۇرعىنداردىڭ, اكىمدىكتەردىڭ جانە ۋچاسكەلىك پوليتسيا ينسپەكتورلارىنىڭ باستاماسىمەن قابىلدانعان.
اۋىل جينالىستارىندا تۇرعىندار مەن قوعام بەلسەندىلەردىڭ پىكىرى ەسكەرىلدى. اتالعان باستاما وبلىستىڭ 10 اۋدانىن قامتىدى: اقسۋات, كوكپەكتى, جارما, ماقانشى, اياگوز, ءۇرجار, بەسقاراعاي, جاڭاسەمەي, بورودۋليحا جانە اباي اۋداندارى. بارلىق ەلدى مەكەندەردە تۇراقتى پوليتسەيلىك باقىلاۋ ۇيىمداستىرىلىپ, ءتۇسىندىرۋ جۇمىستارى جۇرگىزىلدى.
اۋىل اقساقالدارى مەن جاستار كوشباسشىلارى دا ءىس-شارالارعا بەلسەندى تۇردە تارتىلدى. اباي وبلىسى پوليتسيا دەپارتامەنتىنىڭ باسشىسى ەلدار دانياروۆ جوبانىڭ تيىمدىلىگىن اتاپ ءوتتى.
«وتباسىلىق-تۇرمىستىق جانجالدار سانى ايتارلىقتاي ازايدى, ماس كۇيىندە جاسالاتىن قىلمىستار دەڭگەيى تومەندەدى, قۇقىقتىق ءتارتىپتى قامتاماسىز ەتۋگە اۋىل تۇرعىندارىنىڭ قاتىسۋى كۇشەيدى. ىشىمدىكسىز اۋىل – بۇل تىيىم سالۋ ەمەس, حالىقتىڭ سانالى تاڭداۋى. ءبىز ازاماتتاردىڭ ءومىرىن قاۋىپسىز ءارى تىنىش ەتۋگە باعىتتالعان ءار باستامانى قولدايمىز», دەدى دەپارتامەنت باسشىسى.
ايتا كەتەيىك, العاش بولىپ بۇل باستامانى اقسۋات جانە اباي اۋداندارىنىڭ اۋىلدارى قولدادى, كەيىن وزگە اۋداندار دا قوسىلدى. ءاربىر ەلدى مەكەندە ۋچاسكەلىك ينسپەكتورلار جەرگىلىكتى اتقارۋشى ورگاندارمەن بىرلەسىپ, جوبانىڭ ورىندالۋىن قامتاماسىز ەتتى, كريمينوگەندىك جاعدايداعى وزگەرىستەردى باقىلاپ, تۇرعىندارعا قولداۋ كورسەتتى.
