فوتو: الماتى وبلىسى اكىمدىگى
قالالىق مادەنيەت ءۇيى اۋماعىندا اۋىل شارۋاشىلىعى كورمەسى ۇيىمداستىرىلدى. كورمەدە ءوڭىردىڭ اگروونەركاسىپ كەشەنىندەگى وزىق تەحنولوگيالار, جاڭا ونىمدەر جانە شارۋاشىلىقتار جۇمىسىنىڭ ناتيجەلەرى تانىستىرىلدى.
ءوڭىر باسشىسى مارات سۇلتانعازيەۆ جينالعانداردى ايتۋلى مەرەكەمەن قۇتتىقتاپ, اگرارلىق سالا ءوڭىر ەكونوميكاسىنىڭ ماڭىزدى بولىگى ەكەنىن اتادى. سونىمەن قاتار اۋىل ەڭبەككەرلەرىنىڭ تاباندى ەڭبەگى مەن اۋىل شارۋاشىلىعى ونىمدەرىنىڭ ءوسىمىن قامتاماسىز ەتۋدەگى ءرولىن جوعارى باعالادى.
«بۇگىنگى كليماتتىق وزگەرىس جاعدايىندا سۋدىڭ ماڭىزى ارتىپ كەلەدى. سول سەبەپتى ءبىز سۋارمالى جەرلەردى جاڭعىرتۋعا, تسيفرلاندىرۋ مەن ۇنەمدەۋ تەحنولوگيالارىن ەنگىزۋگە ەرەكشە ءمان بەرىپ وتىرمىز. جاڭا تەحنولوگيالاردى ەنگىزۋ تەك تابيعي رەسۋرستاردى قورعاپ قانا قويماي, فەرمەردىڭ تابىسىن ارتتىرۋعا مۇمكىندىك بەرەدى. بۇل – ونىمدىلىكتى ارتتىرۋ, شارۋانىڭ شىعىنىن ازايتۋ جانە نارىقتاعى باسەكەگە قابىلەتتىلىكتى كۇشەيتۋ. ءبىز وبلىس دەڭگەيىندە وسى باعىتتاعى جوبالاردى قولداپ, فەرمەرلەرگە ناقتى پراكتيكالىق شەشىمدەر ۇسىنامىز», دەدى وبلىس اكىمى.
الماتى وبلىسى ەلىمىزدەگى الەۋەتى ارتىپ, ەڭ قارقىندى دامىپ كەلە جاتقان وڭىرلەردىڭ ءبىرى. بيىلعى جىلى جالپى وڭىرلىك ءونىم كورسەتكىشى ءوسىپ, بۇرىنعى ونىنشى ورىننان بەسىنشى ورىنعا كوتەرىلدى. بۇل – ستراتەگيالىق جوسپارلاۋ مەن اۋىل ەڭبەككەرلەرىنىڭ ماڭداي تەرىنىڭ ناتيجەسى.
مەرەيلى مەرەكە كۇنىندە وبلىستا «ۇلگىلى اۋىل» بايقاۋىنىڭ جەڭىمپازدارى انىقتالىپ, ارنايى ماراپاتتار تابىستالدى.
بايقاۋ قورىتىندىسى بويىنشا الماتى وبلىسىنىڭ «ەڭ ۇلگىلى اۋىلى» نوميناتسياسىن قاراساي اۋدانىنا قاراستى جىبەك جولى اۋىلى ۇتىپ الدى. ال ەكىنشى ورىندى ىلە اۋدانىنىڭ بايكەنت اۋىلى ەنشىلەسە, ءۇشىنشى ورىندى ەڭبەكشىقازاق اۋدانىنىڭ اششىساي اۋىلى يەلەندى. اتالعان ايماقتارعا ارنايى اۋىل شارۋاشىلىعى تەحنيكاسى سىيعا تارتىلدى.
«بۇل ماراپات ءبىز ءۇشىن ۇلكەن مارتەبە. ەندى اۋىلىمىزدى كوركەيتۋ ماقساتىندا بۇرىنعىدان دا بەلسەندىلىك تانىتۋعا تىرىسامىز جانە بار كۇشىمىزدى سالىپ ەڭبەك ەتەمىز», دەدى جىبەك جولى اۋىلدىق وكرۋگىنىڭ اكىمى ديدار نۇراقىنوۆ.
الماتى وبلىسىنىڭ تۇرعىن ءۇي-كوممۋنالدىق شارۋاشىلىق جانە اباتتاندىرۋ باسقارماسىنىڭ باسشىسى ديماش قوجابەكوۆ بايقاۋدىڭ ماقساتىن تىلگە تيەك ەتتى.
«بۇل بايقاۋ «تازا قازاقستان» ەكولوگيالىق مادەنيەتىن دامىتۋ تۇجىرىمداماسىنىڭ ءىس-شاراسى اياسىندا جۇرگىزىلىپ وتىر. بايقاۋعا 8 اۋداننان 8 اۋىل قاتىستى. وبلىستىق كوميسسيا شەشىمى بويىنشا ءۇش اۋىل ۇزدىك دەپ تانىلىپ, اۋىل شارۋاشىلىعى تەحنيكالارىمەن ماراپاتتالدى. ارنايى تەحنيكالار ينفراقۇرىلىم جاعدايىن جاقسارتۋعا ۇلكەن كومەك بەرەدى دەگەن ويدامىن. ءىس-شارانىڭ نەگىزگى ماقساتى – وڭىردەگى اۋىلدىڭ ىشىندەگى ينفراقۇرىلىم, سانيتارلىق تازالاۋ, ادامداردىڭ اراسىنداعى ەكولوگيالىق مادەنيەتتى قالىپتاستىرۋعا ۇلكەن سەرپىن بەرۋ», دەدى ول.
بايقاۋعا قاتىسۋشىلاردىڭ جۇمىسى 16 كريتەري بويىنشا باعالانعان. سونىڭ ىشىندە «تازا قازاقستان» ەكولوگيالىق اكتسياسى اياسىنداعى جۇمىستاردىڭ ۇيىمداستىرىلۋى, تۋريزم الەۋەتى, ءوڭىردىڭ ەكونوميكالىق-الەۋمەتتىك كورسەتكىشتەرى جانە ەكولوگيالىق مادەنيەتتىڭ دامۋى نەگىزگى تالاپتار رەتىندە قاراستىرىلعان.
الماتى وبلىسى
