سۋرەت: inbusiness.kz
«كرەاتيۆتىك وندىرىستەردى دامىتۋ قورىنىڭ قۇرىلۋى ماڭىزدى كەزەڭدەردىڭ ءبىرى بولدى. بۇل ينستيتۋتتىڭ نەگىزگى فۋنكتسيالارى – تالانتتاردى انىقتاۋ, جوبالاردى دامىتۋ جانە وتاندىق كرەاتيۆتىك ءونىمدى حالىقارالىق نارىقتارعا ىلگەرىلەتۋ. قوردىڭ قىزمەتى قارجىلىق جانە قارجىلىق ەمەس قولداۋ شارالارىن, سونىڭ ىشىندە گرانتتار مەن كونكۋرستىق باعدارلامالاردى قامتيدى. بۇدان بولەك, قوردى قارجىلاندىرۋعا قاتىستى نورما قابىلدانىپ, لوتەرەيا بيلەتتەرىن ساتۋ تابىسىنىڭ كەمىندە 3%-ى كرەاتيۆتىك يندۋستريالاردى دامىتۋعا باعىتتالاتىن بولدى», دەيدى مادەنيەت جانە اقپارات مينيسترلىگىنىڭ ءباسپاسوز قىزمەتى.
سونداي-اق اتالعان ۆەدومستۆو 16 جاسقا دەيىنگى بالالاردىڭ ونلاين-پلاتفورمالاردا تىركەلۋىنە تىيىم سالاتىن زاڭ جوباسى ازىرلەنگەنىن حابارلادى.
«قولدانىستاعى زاڭناماعا ەنگىزىلەتىن تۇزەتۋلەر توپتاماسى ازىرگە تەك كەڭ قوعامدىق تالقىلاۋعا شىعارىلدى. مينيسترلىككە اتا-انالاردان, مۇعالىمدەردەن جانە قوعامدىق ۇيىمداردان كوپتەگەن ءوتىنىش ءتۇستى. ولاردىڭ سۇرانىستارىن ەسكەرە وتىرىپ, ءبىز حالىقارالىق تاجىريبەنى زەردەلەپ, ساراپشىلارمەن كونسۋلتاتسيالار جۇرگىزدىك. سونىڭ ناتيجەسىندە 16 جاسقا تولماعان بالالاردىڭ ونلاين-پلاتفورمالاردا تىركەلۋىنە تىيىم سالۋ نورماسىن ەنگىزۋ تۋرالى شەشىم قابىلداندى. بۇل تىيىم مەسسەندجەرلەرگە ەمەس, تەك الەۋمەتتىك جەلىلەرگە قولدانىلادى», دەيدى ءباسپاسوز وكىلى.
ءيا, الەۋمەتتىك جەلىلەردەگى بۇل شەكتەۋ كامەلەتكە تولماعانداردىڭ قاۋىپسىزدىگىن كۇشەيتۋ, ولاردى زاڭعا قايشى كونتەنتپەن بايلانىس ورناتۋ قاۋپىنەن قورعاۋ ماقساتىن كوزدەيدى. ەسكە سالساق, مۇنداي تالاپتار الەمدىك تاجىريبەدە دە بار. ماسەلەن, بەلگيا, گەرمانيا, فرانتسيا, يتاليا ەلدەرىندە بالالار الەۋمەتتىك جەلىلەرگە اتا-اناسىنىڭ كەلىسىمىنسىز تەك 13-15 جاستان باستاپ تىركەلە الادى. باسقا بارلىق جاعدايدا تىركەلۋ ءۇشىن اتا-انانىڭ نەمەسە قامقورشىنىڭ رۇقساتى قاجەت. ال الەمدە العاشقى بولىپ الەۋمەتتىك جەلىلەردى 16 جاسقا دەيىنگى بالالارعا پايدالانۋعا تىيىم سالۋ تۋرالى شەشىمدى جاقىندا اۋستراليا مەملەكەتى قابىلدادى.
بۇدان بولەك مينيسترلىك وكىلى كينو, باق جانە ونلاين-پلاتفورمالارداعى كونتەنتتى بويىنشا ءتيىستى ۇسىنىستار ايتتى.
«ماسەلەن, كوپتىڭ تالقىسىنا ءتۇسىپ جاتقان «اۋرۋ» ءفيلمى باستاپقىدا پروكاتتىق كۋالىك الۋ ءۇشىن ءفيلمنىڭ 18+ جاس ەرەكشەلىگىن سۇرادى. الايدا كوميسسيا بۇل ءفيلمدى 21+ ساناتىنا جاتقىزدى. ارينە, بۇل كينوتۋىندىداعى كوپتەگەن نەگىزسىز زورلىق كورىنىستەرىنىڭ جانە دە بالاعات سوزدەردى كوپ پايدالانۋىنا بايلانىستى», دەپ مالىمدەيدى مينيسترلىكتەن.
ەسكە سالساق, ازاماتتىق قىزمەتشىلەردىڭ جالاقىسىن ارتتىرۋ جونىندەگى تاپسىرما مەملەكەت باسشىسى تاراپىنان بەرىلگەن بولاتىن. مينيسترلىك بۇل تاپسىرمانى ورىنداۋدا ءتيىستى جۇمىس جۇرگىزىپ جاتىر. اتاپ ايتساق, 2022–2025 جىلدار ارالىعىندا كىتاپحاناشىلاردىڭ جالاقىسى ەكى ەسەگە ءوستى.
«بۇگىندە كىتاپحاناشىلاردىڭ ورتاشا ايلىعى 150 مىڭنان 260 مىڭ تەڭگەگە دەيىنگى ارالىقتا, ول كىتاپحانانىڭ دەڭگەيىنە, ساناتىنا, تاجىريبەسىنە جانە لاۋازىمىنا بايلانىستى», دەيدى مينيسترلىك وكىلى.
ارينە, اۋىلدىق جەرلەردە جۇمىس ىستەيتىن قىزمەتكەرلەرگە, سونداي-اق ەكولوگيالىق اپات ايماقتارى مەن رادياتسيالىق قاۋىپ ايماقتارىندا ەڭبەك ەتەتىندەرگە قوسىمشا تولەمدەر قاراستىرىلعان. ۇكىمەت قاۋلىسىنا سايكەس جەرگىلىكتى اتقارۋشى ورگاندار اۋىلدىق ەلدى مەكەندەردە جۇمىس ىستەيتىن ارحيۆ ماماندارىنا كوتەرمەلەنگەن جالاقى بەكىتە الادى.
