فوتو: قالا اكىمدىگى
استانا تۋريستەر ءۇشىن نەسىمەن تارتىمدى؟
استانانى جوعارى تەحنولوگيالارى, حالىقارالىق ستاندارتتارى جانە قولايلى باعاسى قىزىقتى ەتە تۇسەدى. بىرقاتار باعىت بويىنشا باعالار ەۋروپا, وڭتۇستىك كورەيا, تۇركيا ەلدەرىمەن سالىستىرعاندا الدەقايدا تومەن, بىراق قىزمەت ساپاسى سايكەس دەڭگەيدە تۇر. شەتەلدىك پاتسيەنتتەر ءۇشىن استانادا ورتاشا ەمدەلۋ قۇنى 2-5 مىڭ اقش دوللارىن قۇرايدى.
تىكەلەي اۋە رەيستەرىنىڭ بولۋى جانە دامىعان ينفراقۇرىلىم شەتەلدەن كەلەتىن پاتسيەنتتەرگە جولدى ەداۋىر جەڭىلدەتەدى. كۇز-قىس ماۋسىمىندا 18 ەلمەن, جاز ايلارىندا 20 ەلمەن اۋە بايلانىسى بار. اپتاسىنا 36 قالاعا شامامەن 250 حالىقارالىق رەيس ورىندالادى. بۇل كورسەتكىش مەديتسينالىق ءتۋريزمنىڭ دامۋىنا تىكەلەي اسەر ەتەدى, ياعني ەمدەلۋ ءۇشىن ساياحاتتاۋ الدەقايدا جەڭىلدەيدى.
جۇرەك-قان تامىرلارى مەديتسيناسىنىڭ جەتەكشى ورتالىقتارىنىڭ ءبىرى – استانا
استانادا جۇرەك-قان تامىرلارى بويىنشا اسا كۇردەلى وپەراتسيالاردىڭ بارلىق ءتۇرى جاسالادى, ونىڭ ىشىندە از ءينۆازيۆتى ارالاسۋلار, ستەنتتەۋ, شۋنتتاۋ جانە تۋا بىتكەن اقاۋلاردى تۇزەتۋ.
ەلوردانىڭ باستى جەتىستىكتەرىنىڭ ءبىرى – ALEM (Astana Life Ex-situ Machine) اپپاراتىنىڭ جاسالۋى. بۇل قۇرىلعى دونورلىق ورگانداردى ادام دەنەسىنەن تىس 24 ساعاتقا دەيىن ساقتاۋعا جانە ەمدەۋگە مۇمكىندىك بەرەدى.
ول 36-37°C تەمپەراتۋراسىن ۇستاپ تۇرادى, وتتەگىمەن قامتاماسىز ەتەدى, قىسىم مەن قاننىڭ گاز قۇرامىن باقىلايدى, دياگنوستيكا جۇرگىزۋگە جانە ءدارى ەنگىزۋگە مۇمكىندىك بەرەدى. وسىلايشا ترانسپلانتاتسيا ۋاقىتىن ەداۋىر ۇزارتىپ, اسقىنۋ قاۋپىن ازايتادى.
2025 جىلى مەديتسينالىق ورتالىق اۋرۋحاناسىندا العاش رەت جۇرەككە روبوتتىق وپەراتسيا جاسالدى.
ۇلتتىق نەيروحيرۋرگيا ورتالىعى ەڭ مىقتى ورتالىقتاردىڭ ءبىرى
باس شاھارداعى اتالعان ورتالىقتا Gamma Knife جۇيەسى ورناتىلعان, ول مي ىسىكتەرى مەن تامىرلىق پاتولوگيالاردى تىلىكسىز, جوعارى دالدىكپەن جانە مينيمالدى جاراقاتپەن ساۋلەمەن ەمدەۋگە مۇمكىندىك بەرەدى. قازاقستان – بۇل قۇرالدى ەنگىزگەن ورتالىق ازياداعى العاشقى ەل. 2 000-نان استام راديوحيرۋرگيالىق پروتسەدۋرا جاسالعان.
سونىمەن قاتار, استانا رەپرودۋكتيۆتى مەديتسينا بويىنشا ورتالىق ازياداعى جەتەكشى ورتالىق مارتەبەسىن سەنىمدى تۇردە ساقتاپ كەلەدى. جوعارى ناتيجەلىلىك, زاماناۋي ەمبريولوگيالىق زەرتحانالار جانە قولجەتىمدى ەم باعاسى شەتەلدىك پاتسيەنتتەردى كوپتەپ تارتادى. 2025 جىلدىڭ العاشقى 9 ايىندا «ەكومەد» كلينيكاسىنىڭ ەلوردالىق فيليالىنا 102 شەتەلدىك پاتسيەنت جۇگىنگەن. كەلۋشىلەر سانى بويىنشا رەسەي, قىتاي, قىرعىزستان العاشقى ۇشتىكتە.
ستوماتولوگيا – سۇرانىسقا يە باعىتتاردىڭ ءبىرى
ستوماتولوگيا جانە ەستەتيكالىق مەديتسينا – استاناداعى مەديتسينالىق ءتۋريزمنىڭ ەڭ سۇرانىسقا يە باعىتتارىنىڭ ءبىرى. سەبەپتەرى ايقىن: زاماناۋي جابدىق, جوعارى ساپا جانە ەۋروپا جانە تاياۋ شىعىسپەن سالىستىرعاندا الدەقايدا تومەن باعا. ەلوردا كلينيكالارى كەڭ اۋقىمدى قىزمەتتەردى ۇسىنادى: ەستەتيكالىق ستوماتولوگيا, يمپلانتاتسيا جانە پروتەزدەۋ; زاماناۋي ەلاينەرلەر مەن تسيفرلىق جوسپارلاۋ جۇيەلەرىن قولداناتىن ورتودونتيا; پلاستيكالىق حيرۋرگيا, ونىڭ ىشىندە رينوپلاستيكا, بلەفاروپلاستيكا, ليپومودەلدەۋ, رەكونسترۋكتسيالىق وپەراتسيالار.
شەتەلدىك پاتسيەنتتەر كوبىنە كونسۋلتاتسيالار, حيرۋرگيالىق ارالاسۋ جانە وپەراتسيادان كەيىنگى قولداۋدى قامتيتىن كەشەندى پاكەتتەردى تاڭدايدى ەكەن.
قالپىنا كەلۋدىڭ قىسقا مەرزىمدەرى مەن مامانداردىڭ جوعارى بىلىكتىلىگى بۇل باعىتتاردى مەديتسينالىق تۋريزم ءۇشىن ەڭ تانىمال ەتۋگە ىقپال ەتەدى.
جاڭا ءتۋرونىم
Astana Tourism كلينيكاسى Astana Vision-مەن بىرلەسىپ جاڭا ءتۋرونىمدى ىسكە قوستى. ول تۋريستەرگە ەلورداعا ساياحاتتى كوزدى كاسىبي دياگنوستيكالاۋ جانە كورۋدى تۇزەتۋ راسىمدەرىمەن ۇشتاستىرۋعا مۇمكىندىك بەرەدى. استاناعا ەمدەلۋ ماقساتىندا ەمەس كەلگەن قوناقتار دا تەكسەرۋدەن تەز ءوتىپ, لازەرلىك كوررەكتسيا نەمەسە باسقا دا پروتسەدۋرالاردى ءوز جوسپارلارىن وزگەرتپەي ورىنداي الادى.
وسىلايشا ەلورداعا ساپار تەك ساياحات ەمەس, دەنساۋلىققا جول اشاتىن قادامعا اينالادى.
«مەديتسينالىق تۋريزم – بۇگىندە ەڭ سۇرانىسقا يە باعىتتاردىڭ ءبىرى. قازاقستان JCI اككرەديتاتسياسىنان وتكەن كلينيكالار سانى بويىنشا الەمدە 25-ورىندا, ولاردىڭ 7-ەۋى استانادا ورنالاسقان.
2024 جىلى شامامەن 4,5 مىڭ شەتەلدىك پاتسيەنت JCI ستاندارتتارى بويىنشا ەم الدى. ولاردىڭ قاتارىندا چەكاپ باعدارلامالارى, رەپرودۋكتيۆتى مەديتسينا, كارديوحيرۋرگيا, ونكولوگيا بار.
ءبىز دياگنوستيكانى جانە ەمدەۋدى ەكسكۋرسيالىق باعدارلامالارمەن بىرگە ۇسىناتىن مەديتسينالىق تۋرپاكەتتەر قالىپتاستىرىپ جاتىرمىز», دەدى «Astana Tourism» ءتۋريزمدى دامىتۋ ورتالىعى باسقارماسىنىڭ توراعاسى ارتيوم كۆاشۋك.
