بۇل تۋرالى سيريا پرەزيدەنتى احمەد اش-شاراا دوحادا, كاتار استاناسىندا وتكەن "ادىلەت ءىس جۇزىندە: ۋادەلەردەن ىلگەرىلەۋگە" اتتى 23-فورۋمدا ايتتى.
احمەد اش-شاراا وتپەلى كەزەڭدە ەشبىر ۇكىمەت قوعامنىڭ بارلىق توبىنىڭ تولىق كەلىسىمىنە قول جەتكىزە المايتىنىن اتاپ ءوتتى. ونىڭ سوزىنشە, سوڭعى ءبىر جىلدا ورىن العان كەيبىر وقيعالاردى ولار مۇلدە قابىلداي المايدى, ال كىنالىلەر سوتقا تارتىلعان.
پرەزيدەنت ەلدەگى ەلەكترمەن قامتاماسىز ەتۋ جاعدايى ايتارلىقتاي جاقسارعانىن دا جەتكىزدى.
ء«بىز بيلىككە كەلگەن كەزدە ەلەكتر كۇنىنە نەبارى 1,5 ساعات بەرىلەتىن. قازىر بۇل ۋاقىت 12–14 ساعاتقا دەيىن ۇزاردى. جىل سوڭىنا قاراي تولىق ءوزىن-ءوزى قامتۋ دەڭگەيىنە جەتەمىز», دەدى ول.
اش-شاراا وسى كونتەكستە باستالعان بەس جىلدىق وتپەلى كەزەڭ اياقتالعاننان كەيىن, ءتورت جىلدان سوڭ ەلدە سايلاۋ وتەتىنىن جاريالادى.
ول سيريانىڭ بولاشاعى جەكە تۇلعالارعا ەمەس, ينستيتۋتتارعا سۇيەنگەن باسقارۋ مودەلىنە نەگىزدەلەتىنىن, ال ۇكىمەتتەگى وكىلدىك قاعيداتىنىڭ بىلىكتىلىككە قاراي قامتاماسىز ەتىلەتىنىن اتاپ ءوتتى.
پرەزيدەنت بۇرىنعى رەجيم قۇلاتىلعاننان كەيىن ەلدە جاڭا ۇكىمەت قۇرىلعانىن, وتپەلى كەزەڭنىڭ «جول كارتاسى» كۇشىنە ەنگەنىن ەسكە سالدى.
ونىڭ ايتۋىنشا, حالىق كەڭەسىنە سايلاۋ دا وسى وتپەلى پروتسەسس اياسىندا ءوتتى.
ءتورت جىلدان كەيىن جالپىۇلتتىق سايلاۋدى مىندەتتى تۇردە وتكىزەمىز, – دەدى ول.
ەكونوميكانى قالپىنا كەلتىرۋدىڭ ماڭىزىن اتاپ وتكەن اش-شاراا اقش-پەن "تسەزار" زاڭى بويىنشا سالىنعان سانكتسيالاردى الىپ تاستاۋ جونىندەگى كەلىسسوزدەر جالعاسىپ جاتقانىن, بۇل باستامانى ترامپ اكىمشىلىگى قولداپ وتىرعانىن ايتتى.
سونداي-اق ول بۇرىنعى بيلىك ء«دىني قاۋىمدار اراسىنداعى شيەلەنىستى كۇشەيتكەنىن» ايتا كەلە, وتپەلى كەزەڭدە قىلمىستاردى, اسىرەسە جاعالاۋ ايماقتارى مەن سۋۆەيداداعى قۇقىقبۇزۋشىلىقتاردى زەرتتەيتىن كوميسسيالار قۇرىلعانىن جەتكىزدى.
«بۇل ەكى وڭىردەگى وقيعالاردىڭ ءتۇبىرى – قۇلاتىلعان رەجيمنىڭ اۋىر مۇراسى. سول رەجيمنىڭ قۇربانى – بارلىعى», دەپ تۇيىندەدى سيريا پرەزيدەنتى.
