كۇنى بويى قوناقتار ءۇشىن تاڭەرتەڭ بازالىق ستانتسيادا DJ-لەر, Stradivari كۆارتەتى, بي ۇجىمدارى ونەر كورسەتىپ, وتباسىمەن كەلگەندەرگە ارنالعان ينتەراكتيۆتى باعدارلامالار ۇيىمداستىرىلدى. كۇندىزگى باعدارلامانىڭ ءسانىن يندي-مۋزىكانت Dudeontheguitar كەلتىردى.
جاڭا ماۋسىمىنىڭ اشىلۋىنا وراي, مەدەۋدەگى الاڭدا Red Bull DJ-سەتتەرىن ويناسا, مۇز ايدىنىندا دا مانەرلەپ سىرعاناۋشىلاردىڭ ارنايى قويىلىمدارى سالتانات قۇردى.
بۇگىن تالعار اسۋىندا دا مۋزىكالىق ويىن-ساۋىق باعدارلامالارى ءوتتى. ال ورتاداعى ستانتسيادا العاش رەت Shymba Après Ski ءداستۇرىن باستادى.
«Après Ski» دەپ وتىرعانىمىز, شاڭعى تەۋىپ شارشاعاننان كەيىنگى ەركىن دامىلداۋ, اڭگىمەلەسۋ فورماتىنداعى كۇندىزگى دەمالىس. بيىلعى Shymba Après Ski مەرەكەسىن Elevation مەن Vihod پرومو-كوماندالارى بىرلەسە وتكىزدى. قوناقتار قالا پانوراماسىن, زاماناۋي مۋزىكالاردى تىڭداپ, اشىق تاۋ-شاڭعى قاۋىمداستىعىنىڭ كوڭىل-كۇيىن تاماشالادى. ەندى Shymba Après Ski ءار سەنبى سايىن Le Mont الاڭىندا ۇيىمداستىرىلماق.
قازىر شىمبۇلاق تاۋ-شاڭعى كۋرورتىندا «تالعار», «جاسىل قايىڭ», «اق ايۋ» مەن «اق بارىس» سىرعاناق جولدارى اشىق. اۋا رايى تۇراقتالعان كەزدە باسقا دا قوسىمشا جولدار ىسكە قوسىلادى. سونداي-اق تالعار اسۋىنداعى تۇنگى سىرعاناق ماۋسىمى باستالدى.
ء«ار ماۋسىمدى كۋرورتىمىزداعى سىرعاناۋ قاۋىپسىزدىگى مەن قىسقى دەمالىسقا مۇقيات دايىندىقتان باستايمىز. تەحنيكالىق ماماندار ارقانجولداردى تولىق تەكسەرىپ شىعىپ, جابدىقتىڭ ءبىرازىن جاڭارتتى. بيىل قوناقتار جالعا بەرىلەتىن ايماقتارىنىڭ كەڭەيگەنىن, قىزمەت كورسەتەتىن مامانداردىڭ جۇمىسى جاقسارعانىن بىردەن بايقادى. ءبىزدىڭ ماماندار بەتكەيلەردى سىرعاناۋعا ازىرلەۋدى جالعاستىرىپ جاتىر, ال تۇراقتى اياز باستالعاندا تاعى دا بىرنەشە جول اشىلادى. قوناقتارىمىزدىڭ وزدەرىن بەتكەيلەردە سەنىمدى ءارى قاۋىپسىز سەزىنۋى ءبىز ءۇشىن اسا ماڭىزدى», – دەيدى Chimbulak Development كومپانياسىنىڭ باسقارۋشى ديرەكتورى نۇرلان سەيتقازين.
