ماڭعىستاۋ وبلىستىق اۋىل شارۋاشىلىعى باسقارماسىنىڭ مالىمەتىنشە, ءوڭىردىڭ تابيعي-كليماتتىق ەرەكشەلىكتەرىنە بايلانىستى نەگىزگى ازىق-ت ۇلىك ونىمدەرىنىڭ باسىم بولىگى سىرتتان جەتكىزىلەدى. بۇل ماسەلەنى كەزەڭ-كەزەڭىمەن شەشۋ ماقساتىندا بىرقاتار ماڭىزدى جوبالار قولعا الىنعان. سونىڭ ءبىرى – بيىل پايدالانۋعا بەرىلگەن سىيىمدىلىعى 22 مىڭ توننا بولاتىن زاماناۋي كوكونىس ساقتاۋ قويماسى.
-جاڭا قويمانىڭ ىسكە قوسىلۋى ماۋسىمارالىق كەزەڭدە ءونىمدى ساقتاۋعا, ىشكى نارىقتى كوكونىسپەن تۇراقتى قامتۋعا جانە باعانىڭ تۇراقتىلىعىن قامتاماسىز ەتۋگە مۇمكىندىك بەرەدى. بۇل ءوز كەزەگىندە ءوڭىردىڭ ازىق-ت ۇلىك قاۋىپسىزدىگىن نىعايتۋعا ەلەۋلى ۇلەس قوسادى, دەپ حابارلادى باسقارما وكىلدەرى.
سونىمەن قاتار, ماڭعىستاۋ وبلىستىق اۋىل شارۋاشىلىعى باسقارماسىنىڭ اقپاراتىنا سايكەس تۇپقاراعان اۋدانىنىڭ «ساۋرا» جەرىندە, «قىزىلسىعىرا» ماڭىندا «قاراعانتۇبەك» جشس-ءنىڭ تۇيە ساۋىن تسەحى اشىلدى. جوبانىڭ جالپى قۇنى 600 ملن تەڭگە. كاسىپورىننىڭ قۋاتتىلىعى تاۋلىگىنە 400 توننا ءسۇت وندىرۋگە جەتەدى. تسەحتىڭ باستى ەرەكشەلىگى - تۇيە ءسۇتىن تولىقتاي اۆتوماتتاندىرىلعان جۇيەدە ساۋ تەحنولوگياسىنىڭ ەنگىزىلۋى. بۇل جوبا وڭىردە تۇيە شارۋاشىلىعىن دامىتىپ, جەرگىلىكتى ءسۇت ونىمدەرىنىڭ كولەمىن ارتتىرۋعا مۇمكىندىك بەرەدى. سونداي-اق جاڭا جۇمىس ورىندارىن قالىپتاستىرىپ, اۋىلدىق اۋماقتاردىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى.
ماڭعىستاۋ وبلىسى
