جاستاردىڭ قۇقىقتىق مادەنيەتىن ارتتىرىپ, سىبايلاس جەمقورلىققا قارسى كوزقاراسىن قالىپتاستىرۋدى ماقسات تۇتقان جيىنعا مەكتەپ وقۋشىلارى, كوللەدج جانە جوعارى وقۋ ورىندارىنىڭ ستۋدەنتتەرى, سونداي-اق قوعامدىق ۇيىم وكىلدەرى قاتىستى. فورۋمنىڭ اشىلۋىندا اباي وبلىسىنىڭ ىشكى ساياسات باسقارماسىنىڭ باسشىسى جارقىن ءجۇمادىلوۆ قاتىسۋشىلارعا ساتتىلىك تىلەي وتىرىپ, اتالعان ءىس-شارانىڭ قوعامداعى ماڭىزىن ايتتى.
«مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ء«بىز زاڭ مەن ءتارتىپ, ءبىلىم مەن پاراسات ۇستەمدىك ەتەتىن قوعام قۇرۋىمىز كەرەك», دەپ اتاپ ءوتتى. بۇل مىندەتتىڭ تابىستى ورىندالۋى جاس ۇرپاقتىڭ بويىنا ادالدىق, جاۋاپكەرشىلىك جانە ازاماتتىق مادەنيەتتى سىڭىرۋگە تىكەلەي بايلانىستى. سىبايلاس جەمقورلىق – كەز كەلگەن مەملەكەتتىڭ دامۋىن تەجەيتىن قاۋىپتى قۇبىلىس. ونىڭ ەڭ ءتيىمدى قارسى شاراسى – الدىن الۋ, ياعني سانانى وزگەرتۋ جانە ءبىلىم بەرۋ ارقىلى قوعامدىق مادەنيەتتى قالىپتاستىرۋ. بۇگىنگى فورۋم – وسى ماقساتقا باعىتتالعان ماڭىزدى باستامانىڭ ءبىرى», دەدى باسقارما باسشىسى.
فورۋم قاتىسۋشىلارى قوعامداعى ادالدىق, ادىلەتتىلىك جانە جاۋاپكەرشىلىك قۇندىلىقتارىن قالىپتاستىرۋ جونىندەگى پىكىرلەرىمەن ءبولىستى. اباي وبلىسىنىڭ ءبىلىم باسقارماسىنىڭ باسشىسى باۋىرجان ەردەمبەكوۆ, شاكارىم ۋنيۆەرسيتەتىنىڭ رەكتورى دۋمان ورىنبەكوۆ, جاستار بەلسەندىسى قۋانىش مولداقاشەۆ جانە رىمبەك بايسەيىتوۆ اتىنداعى سەمەي قارجى-ەكونوميكالىق كوللەدجىنىڭ ستۋدەنتى نازەركە كادەكوۆا جاستارعا ارنالعان جاڭا پروفيلاكتيكالىق باعدارلامالاردى تانىستىرىپ, ءوز كوزقاراستارىن ءبىلدىردى. شاكارىم ۋنيۆەرسيتەتىنىڭ رەكتورى دۋمان ورىنبەكوۆ ءبىلىم ورنىنداعى ادالدىق قاعيداتىن نىعايتۋ جونىندە اتقارىلىپ جاتقان جۇمىستارىن تانىستىردى.
«ۋنيۆەرسيتەت تاراپىنان ادالدىق قاعيداتىن قالىپتاستىرۋ ماقساتىندا ستۋدەنتتەرىمىز وزدەرىنىڭ تىڭ يدەيالارى مەن جوبالارىن ۇسىنىپ كەلەدى. بۇل باستامالار جاستاردىڭ جاۋاپكەرشىلىگىن ارتتىرىپ قانا قويماي, اكادەميالىق ادالدىق مادەنيەتىن نىعايتۋعا زور ۇلەسىن قوسۋدا. سونىڭ ناتيجەسىندە ءبىز وقۋ ورنىندا جاڭا باعىتتارعا بەت بۇرىپ, اشىقتىق پەن ادىلدىككە نەگىزدەلگەن ورتانى قالىپتاستىرۋعا مۇمكىندىك الىپ وتىرمىز», دەدى رەكتور.
تاعى ءبىر ماڭىزدى باعىت – وڭىردە جۇزەگە اسىرىلىپ جاتقان «ادال ازامات» ءبىرتۇتاس تاربيە باعدارلاماسى. بۇل باعدارلاما مەكتەپكە دەيىنگى كەزەڭنەن باستاپ قۇقىقتىق ساۋاتتىلىق, ازاماتتىق جاۋاپكەرشىلىك جانە ادىلدىك پرينتسيپتەرىن قالىپتاستىرۋدى كوزدەيدى. قازىرگى تاڭدا ايماقتا 286 مەكتەپتە 7 375 وقۋشىنى قامتيتىن «ادال ۇرپاق» كلۋبتارى, سونداي-اق 30 ستۋدەنتتىك كلۋبتا 490 ستۋدەنت جۇمىس ىستەيدى.
ء«بىزدىڭ باستى مىندەتىمىز – جاس ۇرپاققا جاۋاپتى ازاماتتىق قاسيەتتەردى ءسىڭىرىپ, ولاردى ادال جانە قۇقىققا قۇرمەتپەن قارايتىن ازاماتتار رەتىندە تاربيەلەۋ. «ادال ازامات» باعدارلاماسى مەكتەپتەن باستاپ قۇقىقتىق ساۋاتتىلىق, ادىلدىك پەن ادالدىق پرينتسيپتەرىن قالىپتاستىرۋعا باعىتتالعان. قۇقىقتىق مادەنيەت جۇيەلى تۇردە ەنگىزىلگەن جاعدايدا, وقۋشىلاردىڭ قۇقىقتىق ساۋاتتىلىعى ارتىپ, مەكتەپتەگى ءتارتىپ دەڭگەيى نىعايادى, سىبايلاس جەمقورلىققا توزبەۋشىلىك مادەنيەتى قالىپتاسادى, ادىلدىك, ادالدىق جانە جاۋاپكەرشىلىك قۇندىلىقتارى وقۋشىلاردىڭ مىنەز-قۇلقىنىڭ نەگىزىنە اينالادى», دەدى باۋىرجان ەردەمبەكوۆ.
اباي وبلىسى
