جوعارى مارتەبەلى!
قۇرمەتتى دەلەگاتتار!
ورنىقتى دامۋ ماقساتتارىنا ساي حالىقارالىق ەرىكتىلەر جىلىن جاريالاۋعا ارنالعان القالى جيىندا ءسوز سويلەۋ – مەن ءۇشىن زور مارتەبە.
بۇل ايتۋلى ۋاقيعا ەرىكتىلەردىڭ ءرولىن كۇشەيتۋگە, ولاردىڭ ۇلتتىق جانە جاھاندىق پروگرەسكە قوساتىن ۇلەسىن ەسەلەۋگە باعىتتالعان ورتاق ۇمتىلىسىمىزدى كورسەتەدى.
قازاقستان حالىقارالىق سەرىكتەستەرمەن تىعىز ىنتىماقتاستىق جاساي وتىرىپ, وسى باستامانى كوتەردى.
ەرىكتىلەر قوزعالىسى ورنىقتى دامۋ ماقساتتارىنا جەتۋ جولىنداعى ازاماتتىق بەلسەندىلىك پەن پروگرەسكە ىقپال ەتەتىن ىزگى امالدىڭ جاسامپازدىق قۋاتىنا اينالارىنا كامىل سەنەمىز.
قازىرگىدەي الماعايىپ زاماندا ەرىكتىلەر ادام ءومىرىن ساقتاۋ, قيىندىققا دۋشار بولعان جاندارعا جاردەمدەسۋ, قوعامداعى سەنىم مەن ىنتىماقتى نىعايتۋ ارقىلى اسا ماڭىزدى ميسسيا اتقارىپ كەلەدى.
بۇۇ ەرىكتىلەر باعدارلاماسى دۇنيە ءجۇزىنىڭ ءار قيىرىندا قىزمەت ەتەدى. الەمنىڭ تۇكپىر-تۇكپىرىندەگى ادامداردى ءبىر ماقساتقا جۇمىلدىرادى.
جەر-جاھانداعى ميلليونداعان ادام ۇيىمنان بولەك تە ۆولونتەرلىك قىزمەتكە اتسالىسادى.
«تازا قازاقستان» جالپىۇلتتىق اكتسياسى قورشاعان ورتانى قالپىنا كەلتىرۋگە, ەكولوگيالىق جاۋاپكەرشىلىك مادەنيەتىن دارىپتەۋگە ۇلەس قوسقىسى كەلەتىن مىڭداعان ازاماتتى بىرىكتىردى. بۇل جوبا بۇۇ-نىڭ ورنىقتى دامۋ سالاسىنداعى جاھاندىق باستامالارىمەن ۇندەسەدى.
وسى ورايدا الماتى قالاسىن بىرىككەن ۇلتتار ۇيىمىنىڭ قولداۋىمەن حالىقارالىق ىنتىماقتاستىق حابىنا اينالدىرۋ نيەتىن قۇپتايمىز. ورتالىق ازيا مەن اۋعانستانعا ارنالعان ورنىقتى دامۋ ماقساتتارى جونىندەگى بۇۇ وڭىرلىك ورتالىعىنىڭ قۇرىلۋى وسىنداي مۇمكىندىككە جول اشتى.
بۇل رەتتە الماتىدا بۇۇ ەرىكتىلەر باعدارلاماسىنىڭ سۋبوڭىرلىك كەڭسەسىنىڭ اشىلۋى قازاقستاننىڭ ازاماتتىق بەلسەندىلىكتى جانە جاھاندىق سەرىكتەستىكتى دامىتۋعا بەيىل ەكەنىن كورسەتەدى.
اتالعان باستامالار الەمدەگى سىن-قاتەرلەردى بىرلەسكەن كۇش-جىگەر مەن ءوزارا سەنىمنىڭ ارقاسىندا ەڭسەرۋگە بولاتىنىن راستايدى.
بارشا ەلدىڭ ەرىكتىلەرىن بۇۇ-نىڭ قورشاعان ورتانى قورعاۋ, الەۋمەتتىك ينتەگراتسيا جانە جاستاردى قولداۋ باعىتىنداعى باستامالارىنا قوسىلىپ, ءوزارا تاجىريبە الماسۋعا جانە بىرلەسكەن جوبالاردى جۇزەگە اسىرۋعا شاقىرامىز.
قازاقستان بۇۇ ەرىكتىلەر باعدارلاماسىنا ريزاشىلىعىن بىلدىرەدى. سونىمەن قاتار جاستاردىڭ, ايەلدەردىڭ جانە شالعاي ايماق تۇرعىندارىنىڭ مۇمكىندىكتەرىن كەڭەيتۋ ءۇشىن سەرىكتەستىك اياسىن كەڭەيتۋگە ۇندەيدى.
بيىل بىرىككەن ۇلتتار ۇيىمىنىڭ قۇرىلعانىنا 80 جىل تولدى. وسى ماڭىزدى كەزەڭدە بارشاڭىزدى ءادىل ءارى جاسىل الەم قالىپتاستىرۋ جولىندا ىنتىماق-بىرلىگىمىزدىڭ بەرىك ەكەنىن كورسەتىپ, ادامزات يگىلىگى ءۇشىن بىرلەسىپ ارەكەت ەتۋگە شاقىرامىن.
قازاقستان ايتۋلى جىل اياسىندا جانە ودان كەيىنگى كەزەڭدەردە دە الەۋمەتتىك ماڭىزى بار ەرىكتىلەر قىزمەتىن قولداۋ ءۇشىن بۇۇ-عا مۇشە بارلىق مەملەكەتپەن جانە ازاماتتىق قوعاممەن ىنتىماقتاسا جۇمىس ىستەۋگە ءاردايىم دايىن.
