فوتو: دەنساۋلىق ساقتاۋ مينيسترلىگى
4 ادامنىڭ ءومىرى ساقتالدى
دونور 1967 جىلى تۋعان ەر ادام. وعان دارىگەرلەر ميدىڭ ءولىمىن بەلگىلەگەن. وتباسىنىڭ كەلىسىمى ارقىلى ودان جۇرەك, باۋىر جانە 2 بۇيرەك الىندى:
- جۇرەك 1967 جىلى تۋعان پاتسيەنتكە قوندىرىلدى («كارديولوگيا جانە ءىا عزي» اق);
- باۋىر 1967 جىلى تۋعان پاتسيەنتكە ترانسپلانتاتتالدى («ا.سىزعانوۆ اتىنداعى ۇعحو»);
- وڭ بۇيرەك – 2006 جىلى تۋعان رەتسيپيەنتكە («ا.سىزعانوۆ اتىنداعى ۇعحو»);
- سول بۇيرەك – 1990 جىلى تۋعان پاتسيەنتكە («ا.سىزعانوۆ اتىنداعى ۇعحو»).
كۇن سايىن 1 ادام كوز جۇمادى
سالا مينيسترلىگىنىڭ مالىمەتىنشە, ەل بويىنشا كۇتۋ پاراعىندا 4521 پاتسيەنت, ونىڭ ىشىندە 106 بالا تۇر. 2025 جىلدىڭ العاشقى 10 ايىندا عانا ءولىم سالدارىنان تىزىمنەن 272 ادام (كۇن سايىن 1 ادام) شىعارىلعان.
2025 جىلدىڭ 12 ايىندا قايتىس بولعاننان كەيىنگى دونورلاردان تەك 14 دونورلىق پروتسەسس جۇرگىزىلدى, ونىڭ بارىسىندا ومىرلىك ماڭىزدى اعزالاردى 60 ترانسپلانتاتتاۋ جۇزەگە اسىرىلعان.
اعزالارعا قاجەتتىلىك وتە جوعارى
ترانسپلانتاتتاۋدى جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىقتىڭ ديرەكتورى ايدار سيتقازينوۆتىڭ ايتۋىنشا, ءاربىر دونورلىق جاعداي – بۇل دارىگەرلەردىڭ, ۇيلەستىرۋشىلەردىڭ, زەرتحانالاردىڭ, ساناۆياتسيانىڭ جانە پروتسەسكە بىرنەشە مينۋت ىشىندە ەنگىزىلەتىن بارلىق قىزمەتتەردىڭ بىرلەسكەن زور جۇمىسىنىڭ ناتيجەسى.
«بىراق باستىسى – دونور وتباسىنىڭ شەشىمى. ولاردىڭ باتىلدىعىنىڭ ارقاسىندا بۇگىندە ءوز مۇمكىندىكتەرىن جىلدار بويى كۇتكەن ادامدار ءومىر ءسۇرىپ جاتىر. ستاتيستيكا كورسەتكەندەي, قازاقستاندا اعزالارعا قاجەتتىلىك وتە جوعارى. مىڭداعان پاتسيەنت ترانسپلانتاتتاۋدى كۇتۋدى جالعاستىرىپ جاتىر جانە ءبىز كۇن سايىن دەرلىك كومەكتەسە الاتىن ادامداردان ايىرىلامىز. سوندىقتان ءار قۇتقارىلعان پاتسيەنت – جاي عانا مەديتسينالىق جەڭىس ەمەس, قايتا ورالعان ادام ءومىرى», دەيدى ايدار سيتقازينوۆ.
