جىل سوڭىندا اۆتونەسيەگە دەگەن سۇرانىس تومەندەۋى مۇمكىن

اۆتونارىقتا نەسيە شارتتارى جاقسارعاندىقتان سۇرانىس تا ارتقان. بانكتەر مەن اۆتوديلەرلەر اكتسيا ۇسىنىپ, باعدارلاما سانىن كوبەيتتى. قارىز الىشۋلار ءاۆتوموبيلدى تەك ءجۇرىپ-تۇرۋ ءۇشىن ەمەس, جەتكىزۋ, تاكسي جانە شاعىن بيزنەس سياقتى سالالاردا تابىس قۇرالى رەتىندە پايدالاندى. بۇل قارجىلىق شارتتار قيىنداعانىنا قاراماستان تۇراقتى سۇرانىستى قالىپتاستىردى.

قازاقستان قارجىگەرلەر قاۋىمداستىعى اناليتيكتەرىنىڭ ايتۋىنشا, ءوتىنىم بەرگەندەردىڭ سانى ناقتى بەرىلگەن نەسيەلەرگە تىكەلەي اسەر ەتتى. اۆتونەسيە بولشەك نەسيە سەگمەنتتەرى اراسىندا جاڭا نەسيە راسىمدەۋ بويىنشا ءوسىم كورسەتتى. بىلتىرعىدان (35 %) 47%-عا جوعارى.

اۆتوكرەديتتىڭ ورتاشا مولشەرلەمەسى جىلدىڭ العاشقى جارتىسىندا تومەندەپ بارا جاتتى, بىراق اكتسيالار اياقتالىپ, قارجىلاندىرۋ قۇنى ءوسىپ, جۇيەدەگى جالپى مولشەرلەمە وسكەندىكتەن 2025 جىلدىڭ باسىنداعى دەڭگەيگە ورالدى.

سوڭعى 9 ايدا ماقۇلدانعان ءوتىنىم ۇلەسى 16.5%-دان  17.5%-عا جەتتى, بۇعان جالاقىنىڭ ءوسۋى (+11.3 %) جانە جۇمىسى بار ادامداردىڭ (+103 مىڭ) كوبەيۋى اسەر ەتتى. كەيبىر قارىز الۋشىنىڭ تولەم قابىلەتى جاقسارىپ, بانك تالابىنا سايكەس كەلدى. دەگەنمەن بۇل راسىمدەلگەن بولشەك نەسيە كورسەتكىشىنىڭ ورتاشا دەڭگەيىنەن (27.1 %) ايتارلىقتاي تومەن.

قاۋىمداستىق ۋاقىتىلى تولەنبەگەن اۆتونەسيەنىڭ ۇلەسى (3.3 %) بولشەك نەسيە كورسەتكىشىنىڭ ورتاشا دەڭگەيىنەن (4%) كەم ەكەنىن اتاپ ءوتتى. بۇل قارىز الاتىن ادامداردىڭ سەنىمدى ەكەنىن كورسەتەدى. كولىك كەپىلدە تۇرعاندىقتان ولار نەسيەسىن ۋاقىتىندا تولەۋگە تىرىسادى, تولەمەي قويۋ قاۋپى ازايادى.

بيىلعى 9 ايدا ەلدەگى زاۋىتتار 106.7 مىڭ كولىك (بىلتىرعى وسى كەزەڭدە – 91 مىڭ) جاسادى, ناتيجەسى اۆتونەسيەگە وڭ ىقپالىن كورسەتتى. جالپى تىركەلگەن كولىكتەردىڭ ىشىندە قازاقستاندا شىققانداردىڭ ۇلەسى 6-دان 11%-عا وستى.

اناليتيكتەر ءتورتىنشى توقساندا اۆتونەسيەگە سۇرانىس تومەندەيدى دەپ بولجادى. بۇعان ناۋرىزدا بازالىق مولشەرلەمەنىڭ 15.25%-دان 16.5 %-عا, كەيىن قازاندا 18%-عا جوعارىلاۋى جانە قارىز الۋشىلارعا قويىلاتىن تالاپتاردىڭ قاتاڭداۋى سەبەپ بولعان. جاڭا اۆتوليزينگ باعدارلاماسى جاعدايدى جاقسارتۋى مۇمكىن.

ايتا كەتەيىك, ەلىمىزدە 12 قاراشادان باستاپ جەكە تۇلعاعا ارنالعان اۆتوليزينگ رەسمي تۇردە ىسكە قوسىلدى. ەندى ەل ازاماتتارى اۆتوكولىكتى ليزينگ ارقىلى راسىمدەپ, ونى بەلگىلى ءبىر مەرزىم پايدالانعاننان كەيىن تولىقتاي ساتىپ الۋ نەمەسە كومپانياعا قايتارىپ بەرۋ مۇمكىندىگىنە يە بولادى.