فوتو: اقوردا
«باسەكەگە قابىلەتتى بيزنەس – كەز كەلگەن مەملەكەتتىڭ تىرەگى. بيىل قازاقستان ەكونوميكاسىنىڭ ءوسىمى 6 پايىزدان اسادى دەپ بولجانۋدا. بۇل – سوڭعى ون جىلداعى ەڭ جوعارى كورسەتكىش. ەلىمىزدىڭ ىشكى جالپى ءونىمى العاش رەت 300 ميلليارد دوللاردان اسپاق. وزدەرىڭىز بىلەسىزدەر, قازىر ءبىز ينفراقۇرىلىمدى دامىتۋعا, ەكونوميكانى ارتاراپتاندىرۋعا باسا ءمان بەرىپ جاتىرمىز. سوندىقتان ۇكىمەت دايىن ءونىم ەكسپورتىن ارتتىرۋ ىسىمەن بەلسەندى تۇردە اينالىسۋى قاجەت. قازىرگى تاڭدا بۇل سالادا ءبىراز جەتىستىكتەرىمىز بار», دەدى قاسىم-جومارت توقاەۆ.
ەلىمىزدىڭ وڭدەۋ ونەركاسىبىندەگى قوسىمشا قۇن كولەمى بەس جىلدا 25 پايىزدان استام ءوستى. بۇل تاۋ-كەن سالاسىنان ەداۋىر جوعارى كورسەتكىش بولىپ وتىر.
«سوڭعى جىلدارى نەگىزگى كاپيتالعا تارتىلعان ينۆەستيتسيا 70 پايىزعا كوبەيدى. ناقتى سەكتورداعى ەڭبەك ونىمدىلىگى 40 پايىزعا ارتتى. شيكىزاتتىق ەمەس ەكسپورت كولەمى 2 ەسەگە جۋىق ۇلعايدى. تاۋارىن شەتەلگە وتكىزەتىن كاسىپورىندار سانى 3 ەسە كوبەيدى. سونىڭ ارقاسىندا بۇگىندە ونىمدەرىمىز 140 مەملەكەتكە شىعارىلادى.
قازاقستان تاۋارلارى الەمدىك نارىقتان ءوز ورنىن الىپ جاتىر دەپ كۇمانسىز ايتۋعا بولادى. وسى ورايدا, شاعىن جانە ورتا بيزنەستىڭ ءرولى ايرىقشا ەكەنى ءسوزسىز. جالپى, ەلىمىزدەگى كاسىپكەرلىكتىڭ دامۋ قارقىنى – بەلسەندى, بۇگىندە ولاردىڭ ەكونوميكاداعى ۇلەسى 40 پايىزعا جەتتى. بەس جىلدا شاعىن جانە ورتا بيزنەس سۋبەكتىلەرىنىڭ سانى 1,5 ەسە ارتتى, ال شىعارىلاتىن ءونىم كولەمى 2,5 ەسە كوبەيدى. ەلىمىزدە جۇمىس ىستەيتىن ازاماتتاردىڭ جارتىسىنا جۋىعى, ياعني 4,5 ميلليون ادام بيزنەس سالاسىندا ەڭبەك ەتەدى», دەدى مەملەكەت باسشىسى.
