فوتو:depositphotos.com
قازاقستان قور بيرجاسىندا دوللار – 499,6 تەڭگە
تەڭگەنىڭ نىعايۋى – «داۋىل الدىنداعى تىنىشتىق» پا؟ ۇلتتىق بانك توراعاسى تيمۋر سۇلەيمەنوۆ تەڭگەنىڭ نەگە نىعايىپ جاتقانىن جانە الداعى ۋاقىتتا باعامنان نە كۇتۋ كەرەكتىگىن ءتۇسىندىردى.
سوڭعى اپتالاردا تەڭگە دوللارمەن سالىستىرعاندا كۇشەيىپ كەلەدى, وعان قاراماستان, شەتەل ۆاليۋتاسىنا سۇرانىس جوعارى. ۇلتتىق بانك مۇنى ەكى نەگىزگى فاكتوردىڭ ۇيلەسىمىمەن بايلانىستىرادى: ىشكى نارىقتاعى بەلسەندىلىك پەن بازالىق مولشەرلەمەنىڭ 18 پايىزعا دەيىن كوتەرىلۋىنە بايلانىستى ءىرى پورتفەلدىك ينۆەستيتسيالاردىڭ كەلۋى.
«كوپتەگەن كاسىپورىندار مەن ءۇي شارۋاشىلىقتارى ققس 16 پايىزعا كوتەرىلمەي تۇرىپ, الدىن الا ساتىپ الۋعا تىرىسىپ جاتىر. يمپورت دوللارلىق كەلىسىمشارتتار ارقىلى قارجىلاندىرىلادى, سوندىقتان دوللارعا سۇرانىس وتە جوعارى», دەدى ت.سۇلەيمەنوۆ.
سونىمەن قاتار, ونىڭ ايتۋىنشا, مولشەرلەمەنىڭ ءوسۋى تەڭگەمەن شىعارىلاتىن قارجى قۇرالدارىن شەتەلدىك ينۆەستورلار ءۇشىن تارتىمدى ەتتى.
«لوندون, نيۋ-يورك, ابۋ-دابيدەگى ينۆەستيتسيالىق قورلار دوللاردى تەڭگەگە ايىرباستاپ, ءبىزدىڭ وبليگاتسيالارىمىزدى ساتىپ الىپ جاتىر. بۇل نارىقتاعى دوللار ۇسىنىسىن ارتتىرادى», دەدى ول.
ۇلتتىق بانكتىڭ مالىمەتىنشە, پورتفەلدىك ينۆەستيتسيالار كولەمى ايتارلىقتاي ءوسىپ, نارىققا قوسىمشا دوللار بەرىپ, تەڭگەنىڭ نىعايۋىن كۇشەيتكەن.
جاڭا جىلدان كەيىن دوللار وسەدى مە؟
ت.سۇلەيمەنوۆ 1 قاڭتاردان باستاپ ققس وسسە دە, دوللار باعامى كۇرت قىمباتتايدى دەگەن كۇدىكتەردى جوققا شىعاردى.
«جوق, ارينە. باعام ماسەلەسى كوبىنە سىرتقى فاكتورلارعا بايلانىستى. ققس-نىڭ ءوسۋى باعالارعا اسەر ەتۋى مۇمكىن, بىراق بۇل ىشكى ماسەلە – نان, ءسۇت, ءبىرىنشى قاجەتتىلىك تاۋارلارى. بۇل ۆاليۋتا باعامىنا قاتىستى ەمەس», دەپ ءتۇسىندىردى ول.
ونىڭ ايتۋىنشا, ساۋداگەرلەر مەن وندىرۋشىلەردىڭ ەداۋىر بولىگى باعانى الدىن الا كوتەرىپ قويعان, ءارى «سۇرانىس شەكسىز ەمەس».
«سىرتقى ماكروەكونوميكالىق ورتا قازىر ءبىز ءۇشىن تۇراقتى. مۇنايدىڭ كۇتىلەتىن باعاسى – باررەلىنە شامامەن 60 دوللار. باعام بويىنشا قانداي دا ءبىر كۇرت وزگەرىستەردى كۇتىپ وتىرعان جوقپىز», دەدى ۇلتتىق بانك باسشىسى.
28 قاراشادا ۇلتتىق بانك بازالىق مولشەرلەمە بويىنشا شەشىم قابىلدادى – ول 18 پايىز دەڭگەيىندە ساقتالدى.
