فوتو: pexels.com
نارىن-سىرداريا سارقىراماسىنا كەلىپ تۇسەتىن سۋ كولەمى ايتارلىقتاي تومەندەگەن. بۇل كەلەسى جىلعى ۆەگەتاتسيالىق كەزەڭدە سۋ تاپشىلىعىن تۋدىرۋى مۇمكىن. وسىعان بايلانىستى كەزدەسۋدە سۋ رەسۋرستارى مينيسترلىگى سۋ قويمالارىنىڭ جۇمىس رەجيمدەرىنە قاتىستى بىرنەشە بولجامدىق نۇسقا ازىرلەنگەنىن اتاپ ءوتتى.
سۋ تىم از كەلگەن جاعدايدا رەسۋرستاردى قايتا ءبولۋ جانە ليميتتەردى تۇزەتۋ ماسەلەسى قارالادى.
قالىپتاسىپ وتىرعان جاعدايعا قاتىستى اۋىل شارۋاشىلىعى مينيسترلىگى ىلعالدى كوپ قاجەت ەتەتىن داقىلداردىڭ القاپتارىن قىسقارتىپ, قۇرعاقشىلىققا ءتوزىمدى, سۋدى از قاجەت ەتەتىن داقىلداردى ەنگىزۋ ارقىلى ەگىس القاپتارىن ءارتاراپتاندىرۋدى ۇسىنىپ وتىر.
سونداي-اق سىرداريا وزەنىنىڭ تومەنگى اعىسىندا توتەنشە جاعداي تۋىنداماۋى ءۇشىن وڭىردە كەلەر جىلى كۇرىش القابى 70 مىڭ گەكتاردان اسپاۋى ءتيىس.
«ەگىس القاپتارى جىل سايىن وڭتايلاندىرىلىپ جاتقانىنا قاراماستان, ورتاشا ونىمدىلىك ءوسىپ كەلەدى (2024 جىلى 85 مىڭ گەكتار القاپتىڭ گەكتارىنان – 58 تسەنتنەر, 2025 جىلى 80 مىڭ گەكتار القاپتىڭ گەكتارىنان – 58,1 تسەنتنەر ءونىم الىندى). بۇعان جاڭا كۇرىش سۇرىپتارىن ەنگىزۋ جانە زاماناۋي تەحنيكانى پايدالانۋ سىندى شەشىمدەر سەپتەسىپ وتىر. سونداي-اق وڭىردە سۋ ۇنەمدەۋ تەحنولوگيالارىن قولداناتىن ەگىستىك كولەمى ارتىپ كەلەدى. ەگىن القاپتارىندا سۋدىڭ ىسىراپ بولۋىنىڭ الدىن الۋ ءۇشىن لازەرلىك تەگىستەۋ جۇمىستارى جۇرگىزىلىپ جاتىر. بۇل ءادىس سۋدى 20%-عا دەيىن ۇنەمدەپ, ونىمدىلىكتى ارتتىرۋعا مۇمكىندىك بەرەدى. بيىل 60 مىڭ گەكتار كۇرىش القابى تەگىستەلدى», دەلىنگەن ۇكىمەت تاراتقان حابارلامادا.
زاماناۋي سۋ ۇنەمدەۋ تەحنولوگيالارىن ەنگىزۋ تاۋەكەلدەردى ازايتىپ, اگرارلىق-ونەركاسىپتىڭ ورنىقتى دامۋىن قامتاماسىز ەتەدى. بۇگىندە بۇل تەحنولوگيالار رەسپۋبليكا بويىنشا 500 مىڭ گەكتاردان استام جەردە قولدانىلۋدا. ال 2030 جىلعا قاراي بۇل كورسەتكىشتى 1,3 ملن گەكتارعا دەيىن (سۋارمالى جەرلەردىڭ شامامەن 70%-ى) جەتكىزۋ جوسپارلانعان. اتالعان ماقساتتارعا جەتۋ ءۇشىن ۇكىمەت كەشەندى شارالار قابىلداپ, سونىڭ ىشىندە سۋبسيديالاۋ ماسەلەلەرىن دە شەشۋدى كوزدەپ وتىر.
2026-2028 جىلدارعا ارنالعان رەسپۋبليكالىق بيۋدجەتتىڭ شەڭبەرىندە ينۆەستيتسيالىق شىعىنداردى وتەۋگە باعىتتالعان جالپى ترانسفەرتتەر كوزدەلگەن, ال قارجىلاندىرۋ كولەمى 215 ملرد تەڭگەگە دەيىن ۇلعايدى.
«الداعى ۆەگەتاتسيالىق ماۋسىمدا جوعارىدان كەلەتىن سۋ كولەمى ايتارلىقتاي ازايۋى مۇمكىن. ونداي جاعدايدا سۋ ۇنەمدەيتىن تەحنولوگيالار تىڭايتقىشتار مەن وسىمدىكتى قورعاۋ قۇرالدارىمەن قاتار وسىمدىك شارۋاشىلىعى جۇيەسىنىڭ مىندەتتى ەلەمەنتى بولۋى ءتيىس. قىزىلوردا وبلىسىنىڭ اكىمدىگى سۋ رەسۋرستارى جانە يرريگاتسيا مينيسترلىگى, اۋىل شارۋاشىلىعى مينيسترلىگى جانە عىلىمي ۇيىمدارمەن بىرلەسىپ, يننوۆاتسيالىق پرەپاراتتاردى قولدانۋ ءۇشىن كەمىندە 100 گەكتار جەر تەلىمىن انىقتاپ, ولاردى جەرگىلىكتى بيۋدجەت قاراجاتى ەسەبىنەن قارجىلىق قولداۋدى قامتاماسىز ەتۋى قاجەت», دەدى قانات بوزىمباەۆ.
كەزدەسۋدە فەرمەرلەرگە سۋدى پايدالانۋ اشىقتىعىن قامتاماسىز ەتۋ جانە سۋ رەسۋرستارىن ەسەپكە الۋدى ودان ءارى تسيفرلاندىرۋ ءۇشىن ەنگىزىلىپ جاتقان تسيفرلىق پلاتفورما تۋرالى دا ايتىلدى. اتالعان پلاتفورمادا ءوتىنىم بەرۋ جانە كەلىسىمشارت جاساسۋدان باستاپ, ناقتى تۇتىنۋدى ەسەپكە الۋ جانە تولەم جاساۋعا دەيىنگى فۋنكتسيالاردىڭ بارلىعى قامتىلعان. جۇيە پروتسەستەردى وڭتايلاندىرادى, سۋدى ءبولۋ مەن ەسەپ ايىرىسۋدىڭ اشىقتىعىن قامتاماسىز ەتەدى, سونداي-اق ناقتى كولەمدەردى ءدال ەسەپكە الۋعا مۇمكىندىك بەرەدى.
ۆەگەتاتسيالىق كەزەڭ باستالعانعا دەيىن قىزىلوردا وبلىسىنىڭ اكىمدىگىنە ديقاندار اراسىندا ءتيىستى ءتۇسىندىرۋ جۇمىستارىن جۇرگىزۋ تاپسىرىلدى. ال «قازسۋشار» رمك-عا ىلعالدى كوپ قاجەت ەتەتىن داقىلدارعا بەكىتىلگەن ليميتتەرگە قاتاڭ سايكەس كەلەتىن سۋ بەرۋ شارتتارىن جاساسۋ, سونداي-اق قۇقىق قورعاۋ ورگاندارىمەن بىرلەسىپ, الداعى ۆەگەتاتسيالىق كەزەڭدە «قارا سۋ نارىعىمەن» كۇرەستى كۇشەيتۋ تاپسىرىلدى.
سۋ شارۋاشىلىعىنداعى احۋال وزگەرگەن جاعدايدا سۋ رەسۋرستارى جانە يرريگاتسيا مينيسترلىگىنە 2026 جىلعى ۆەگەتاتسيالىق كەزەڭگە ارنالعان وڭىرلەر بويىنشا سۋ تۇتىنۋ ليميتتەرىن 2026 جىلدىڭ 1 اقپانىنا دەيىن اۋىل شارۋاشىلىعى مينيسترلىگىنە جولداۋ جۇكتەلدى. اۋىل شارۋاشىلىعى مينيسترلىگىنە 2026 جىلدىڭ 1 ناۋرىزىنا دەيىن ىلعالدى كوپ قاجەت ەتەتىن داقىلداردىڭ ەگىستىك قۇرىلىمىن ناقتى قولجەتىمدى سۋارۋ سۋىنىڭ كولەمىنە سايكەس تۇزەتۋ تاپسىرىلدى.
