ابايدىڭ 180 جىلدىعىنا وراي وتكەن ۇيىمداستىرىلعان فورۋمنىڭ نەگىزگى ماقساتى – حاكىم ابايدىڭ رۋحاني مۇراسىن زاماناۋي تسيفرلىق ءداۋىر سۇرانىستارىمەن ساباقتاستىرا وتىرىپ, جاڭا عىلىمي دەڭگەيدە زەردەلەۋ. جيىندا قازاقستان جازۋشىلار وداعى باسقارماسىنىڭ توراعاسى, كورنەكتى قالامگەر مەرەكە قۇلكەنوۆ ءسوز سويلەپ, اباي مۇراسىن جاڭا تەحنولوگيالىق ورتادا قايتا پايىمداۋدىڭ ماڭىزىنا توقتالدى.
«ابايدى تانۋ – ۇلتتى تانۋ. ابايدى ۇعىنۋ – مەملەكەت دامۋىنىڭ رۋحاني باعدارىن انىقتاۋ. قازىر الەم جاساندى ينتەللەكتتىڭ ىقپالىنداعى جاڭا وركەنيەتكە اياق باستى. وسىنداي كەزەڭدە اباي ءسوزىن تسيفرلىق تانىممەن بايلانىستىرا زەرتتەۋ – ۋاقىت تالابى. ەگەر ءبىز حاكىم ويلارىن جاڭا تەحنولوگيا تىلىنە تۇسىرە الماساق, اباي ءسوزى بولاشاق ۇرپاق ساناسىنان بىرتىندەپ الىستاۋى مۇمكىن. سوندىقتان ابايدى تسيفرلىق كەڭىستىككە ەنگىزۋ – رۋحاني قاۋىپسىزدىگىمىزدىڭ دە كەپىلى, – دەدى قازاقستان جازۋشىلار وداعى باسقارماسىنىڭ توراعاسى.
فورۋم اياسىندا عالىمدار اباي شىعارمالارىن تسيفرلىق تالداۋ, ۆيرتۋالدى پەداگوگيكالىق پلاتفورمالارعا ەنگىزۋ, نەيروجەلىلىك مودەلدەردە پايدالانۋ جونىندەگى ءوز ۇسىنىستارىن ورتاعا سالدى.
