فوتو: اشىق دەرەككوز
سەرىك جاراسباەۆتىڭ مالىمدەۋىنشە, قازىرگى ۋاقىتتا مينيسترلىك جانىبەك ءالىمحان ۇلىنىڭ كومانداسىمەن تۇراقتى بايلانىستا جۇمىس ىستەپ جاتىر.
سونىمەن قاتار ۆيتسە-مينيستر دوپينگكە قارسى ۇيىمنىڭ سىناماداعى مەلدونيگە قاتىستى مالىمەتى سالدارىنان جوسپارلانعان جەكپە-جەك وتپەيتىنىن راستاپ, الايدا بوكسشىنىڭ ءوز تۇسىندىرمەسىنە سەنەتىندەرىن جەتكىزدى.
ء«بىز جانىبەك ءالىمحان ۇلىنىڭ ايتقاندارىنا سەنەمىز. ونىڭ دوپينگ قولدانباعانىنا ەش كۇمانىمىز جوق. زاتتىڭ اعزاعا قالاي تۇسكەنىن انىقتاۋ ءۇشىن دوپينگكە قارسى ۇيىممەن بىرلەسىپ جۇمىستى جالعاستىرۋ قاجەت», دەدى جاراسباەۆ ءماجىلىس كۋلۋارىندا.
سەرىك جاراسباەۆ جاعدايعا اسىعىس قورىتىندى جاساماۋعا شاقىرىپ, تەكسەرۋ تولىق اياقتالعان سوڭ عانا ناقتى شەشىم شىعاتىنىن اتاپ ءوتتى. ونىڭ سوزىنشە, قاجەت بولعان جاعدايدا حالىقارالىق ساراپشىلاردى تارتۋ مۇمكىندىگى دە بار.
«مينيسترلىك بۇل جاعدايدى نازاردان تىس قالدىرمايدى. ءبىز سپورتشىعا جان-جاقتى كومەك كورسەتۋگە ءازىرمىز. قازىرگى ۋاقىتتا ءتۇرلى بولجام ايتىلىپ جاتىر, بىراق رەسمي اقپاراتتار شىقپايىنشا ناقتى باعا بەرۋ دۇرىس ەمەس. ءار سپورتشىنىڭ ءوز قۇقىعىن قورعاۋ تەتىكتەرى بار, ءبىز ولاردىڭ كومانداسىنا قاجەت قولداۋدى كورسەتۋگە دايىنبىز», دەدى ول.
ايتا كەتەيىك, «The Ring magazine» باسىلىمى جانىبەك ءالىمحان ۇلىنىڭ دوپينگ تەستىنەن وتپەي قالعانىن حابارلاعان ەدى.
كەيىننەن جانىبەك ءالىمحان ۇلى دوپينگ-تەستىلەۋدەن وتە الماعانى تۋرالى اقپاراتقا ءوز تاڭدانىسىن ءبىلدىرىپ, قايتا تالداۋ سۇراتقانى بەلگىلى بولدى.
بۇعان دەيىن, WBO جانىبەك ءالىمحان ۇلىنىڭ دوپينگ داۋىنا قاتىستى تەكسەرىستى باستاعانىن جانە وتانداسىمىزدىڭ كومانداسى داۋعا قاتىستى جانىبەك ءالىمحان ۇلى مەن ەريسلاندي لارا اراسىنداعى جەكپە-جەك وتپەيتىنىن رەسمي تۇردە مالىمدەگەنىن جازعان ەدىك.
ەستەرىڭىزگە سالا كەتەيىك, 6 جەلتوقسان كۇنى جانىبەك ءالىمحان ۇلى ءۇش بەلبەۋ ءۇشىن كۋبالىق ەريسلاندي لاراعا قارسى جەكپە-جەك وتكىزۋى ءتيىس بولعان ەدى.
