فوتو: اشىق دەرەككوز
Energy Monitor تەلەگرام ارناسىنىڭ مالىمەتىنشە, قازاقستان حالىققا ەڭ تومەن باعادا گاز جەتكىزۋ بويىنشا الەمدەگى ۇزدىك ۇشتىككە كىرەدى. الايدا تشو, كپو جانە NCOC كومپانيالارى ەلدەگى جالپى كوممەرتسيالىق گاز ءوندىرىسىنىڭ (تازارتىلعان شيكى گاز) 75%-ىن قۇرايدى.
قىستا گازعا سۇرانىس كۇرت ارتاتىندىقتان, قازاقستان ەكسپورتتاۋشىدان ءىشىنارا يمپورتتاۋشىعا اينالادى. بۇل كەزەڭدە گاز – جىلۋ, ەلەكتر جانە تۇرمىستىق قاجەتتىلىك ءۇشىن اسا ماڭىزدى رەسۋرس.
ارنانىڭ جازۋىنشا, كتك-عا جاسالعان شابۋىل ءدال قىس مەزگىلىندە ورىن العانى ەل ءۇشىن قاۋىپ توندىرەتىن فاكتورلاردىڭ ءبىرى. سەبەبى مۇنداي جاعدايدا گاز تاپشىلىعى تۋىنداسا, ونى قازاقستان رەسەيدەن نەمەسە تۇرىكمەنستاننان يمپورتتاۋعا ءماجبۇر بولادى. QazaqGaz شىعىندارىنىڭ ارقاسىندا حالىق گاز جەتىسپەۋشىلىگىن سەزبەۋى مۇمكىن, الايدا كورشى ەلدەر جەتكىزۋدى شەكتەيتىن جاعداي تۋىنداسا, بۇل قيىندىقتار ىشكى نارىققا ىقپال ەتۋى ىقتيمال.
Energy Monitor سونداي-اق كتك باعىتىنداعى جاعدايعا بايلانىستى قازاقستان بيلىگى مەن وپەراتور جوسپارلاعان اتق-3 قوندىرعىسىنىڭ ىسكە قوسىلۋىن كەيىنگە شەگەرۋگە ءماجبۇر بولعانىن اتاپ ءوتتى. قوڭىرجاي اۋا رايى جاعدايىندا قولدا بار ەكى قوندىرعى رەزەرۆۋارلاردا جينالعان مۇنايدى جونەلتۋگە جەتكىلىكتى بولعانىمەن, قاۋىپسىزدىك تاۋەكەلدەرى ەسكەرىلىپ وتىر.
جالپى العاندا, كتك-داعى تەحنيكالىق قيىندىقتار قازاقستان مۇنايشىلارى مەن بيۋدجەتىنە ايتارلىقتاي شىعىن كەلتىرمەۋى مۇمكىن, الايدا گاز تاپشىلىعى تاۋەكەلى – الدەقايدا ماڭىزدى فاكتور. بۇعان دەيىن قاشاعانداعى سلاگ-كەتچەردى اۋىستىرۋ مەرزىمىن كەيىنگە قالدىرۋ ماسەلەسى دە ەلدەگى تاۋارلىق گاز تاپشىلىعى قاۋپىنە بايلانىستى كوتەرىلگەن بولاتىن.
