فوتو: sportilinet.kz
«Qazaq Style» كومانداسى VADA-نىڭ ءبىرىنشى العان اناليزدەرى تازا شىققانىنا قاراماستان ەكىنشى تەكسەرۋدە كىنارات تابىلعانىنا تاڭعالىپ وتىرعانىن جەتكىزدى. سونداي-اق جەكپە-جەك وتكىزىلمەيتىنىن رەسمي تۇردە جاريالادى.
«بۇل جاڭالىققا ءبىز قالاي تاڭعالساق كوپ جانكۇيەر دە سولاي اڭ-تاڭ بولعانىن بىلەمىز. ولاردىڭ دا كوڭىل كۇيلەرى تۇسكەنىن سەزىپ وتىرمىز. ويتكەنى تاقىم قىسىپ تىلەۋلەس بولىپ وتىرعان اعايىن وتە كوپ. اسىعا كۇتكەن جەكپە-جەك وتپەيتىن بولدى», دەلىنگەن «Qazaq style» team تاراتقان حابارلامادا.
سونداي-اق جانىبەك ءالىمحان ۇلىنىڭ كومانداسى قايتا اناليز تاپسىرۋعا ءوتىنىش بەرگەن.
«VADA-نىڭ ءبىرىنشى العان اناليزدەرى تازا دەگەن حابار كەلگەن بولاتىن. ال ەكىنشى اناليزدە داۋلى ماسەلە بار دەگەن حابار جەتتى. ەكى اناليز اراسىندا تاماققا, ۆيتامينگە دە ەشقانداي وزگەرىس جاسامادىق. بۇل قالاي بولعانىن تۇسىنبەي وتىرمىز. قازىر مەنەدجەرلەر مەن زاڭگەرلەر جۇمىس ىستەپ جاتىر. قايتا اناليز تاپسىرساق دەگەن ءوتىنىشتى ايتتىق. ەسكى ءاناليزدىڭ ەكىنشى نۇسقاسىن دا تەكسەرتۋ بويىنشا جۇمىستار جۇرگىزىلىپ جاتىر. مامانداردان حابار كۇتۋدەمىز», دەلىنگەن حابارلامادا.
ۇلكەن سپورتتا ءارتۇرلى قيىندىق بولاتىنىن ەسكەرتكەن كوماندا بۇل ماسەلەنى دە ەڭسەرەتىنىنە سەنىم بىلدىرگەن.
ايتا كەتەيىك, ەل بوكسشىسى 12 قاراشا كۇنى دوپينگ سىناماسىن تاپسىرعان ەدى.
ال WBO جانىبەك ءالىمحان ۇلىنىڭ دوپينگ داۋىنا قاتىستى تەكسەرىستى باستادى.
