سۋرەت: primeminister.kz
جوبا مەملەكەت باسشىسىنىڭ اۋىل شارۋاشىلىعى سالاسىن دامىتۋ مەن وزىق اگروتەحنولوگيالاردى ەنگىزۋگە قاتىستى تاپسىرمالارىن جۇزەگە اسىرۋدى كوزدەيدى. ماقساتى – القاپتا ماقتا وسىرۋدەن باستاپ دايىن كيىم وندىرۋگە دەيىن ءوندىرىستىڭ تولىق تسيكلىن قالىپتاستىرۋ. ناتيجەسىندە, وتىرار اۋدانى مەن ارىس قالاسىندا 60 مىڭ گا سۋارمالى جەر الاڭىندا ورتالىق ازياداعى ءىرى ماقتا ءوسىرۋ كەشەنىن قۇرۋ جوسپارلانىپ جاتىر. 1,4 مىڭنان استام تۇراقتى, 300-دەن استام ۋاقىتشا جۇمىس ورنى اشىلادى.
ينۆەستور – قىتايلىق Xinjiang Lihua (Group) Co., Ltd. كومپانياسى. جوبانى جۇزەگە اسىرۋدىڭ ءبىرىنشى كەزەڭىندە 58 ملرد تەڭگەدەن استام ينۆەستيتسيا كوزدەلگەن, شەتەلدىك ينۆەستيتسيالاردىڭ جالپى كولەمى 200 ملرد تەڭگەدەن اسادى, بۇل تۋرالى بۇرىن پرەمەر-مينيستر ولجاس بەكتەنوۆ پەن Xinjiang Lihua باسشىسى چجان تسيحايدىڭ كەلىسسوزدەرى بارىسىندا ۋاعدالاستىقتارعا قول جەتكىزىلدى.
تامشىلاتىپ سۋارۋدىڭ تيىمدىلىگى جوعارى, جۇيە 196 سورعى ستانساسىن, 500 شاقىرىمنان استام سۋارۋ مەن تاراتۋ ارنالارىن, ءۇش ءىرى سورعى كەشەنىن, ءۇش ترانسفورماتورلىق قوسالقى ستانسانى, تىڭايتقىشتاردى ينتەگراتسيالانعان ادىسپەن بەرۋ جۇيەسىن, سونداي-اق الەمدىك جەتەكشى وندىرۋشىلەردىڭ زاماناۋي اۋىل شارۋاشىلىعى تەحنيكاسىن – جوعارى قۋاتتى تراكتورلاردى, ماقتا جيناۋ ماشينالارىن, بۇرىككىشتەر, مامانداندىرىلعان قۇرىلىس تەحنيكاسىن پايدالانادى.
سونىمەن قاتار كەشەن اۋماعىندا پوليەتيلەندى قايتا وڭدەۋ مەن تامشىلاتىپ سۋارۋعا ارنالعان قۇرال مەن يىلگىش قۇبىرلاردى شىعارۋ جەلىسى قۇرىلادى, بۇل يمپورتقا تاۋەلدىلىكتى ازايتۋعا ءارى ماقتا وسىرۋدەن باستاپ يىرىلگەن ءجىپ, ماتالار مەن كيىمدەردى شىعارۋعا دەيىنگى تۇيىق وندىرىستىك تسيكلدى قالىپتاستىرۋعا مۇمكىندىك بەرەدى. بۇگىندە ەلىمىزدە جىل سايىن 70–75 مىڭ توننا ماقتا تالشىعى وندىرىلەدى, ونىڭ 85%-ى ەكسپورتتالادى.
جوبانى جۇزەگە اسىرۋ ەل ىشىندە تەرەڭ قايتا وڭدەۋ ۇلەسىن ۇلعايتۋعا, قوسىلعان قۇنى جوعارى دايىن توقىما ونىمدەرىن شىعارۋدى كەڭەيتۋگە مۇمكىندىك بەرەدى. بۇل, تۇتاستاي العاندا, وتاندىق توقىما ونەركاسىبىنىڭ وندىرىستىك بازاسىن نىعايتادى, ەكسپورتتىق الەۋەتتى ارتتىرادى, سونداي-اق شاعىن جانە ورتا بيزنەستى – لوگيستيكانى, تەحنيكانى جوندەۋدى ءارى اۋىل شارۋاشىلىعى ونىمدەرىن قايتا وڭدەۋدى دامىتۋدا درايۆەر بولادى.
