سەنات توراعاسى اپوستولدىق نۋنتسيگە ءىلتيپات بىلدىرە كەلىپ, كەيىنگى جىلداردا قازاقستان مەن قاسيەتتى تاق اراسىنداعى كوپجاقتى بايلانىس ايتارلىقتاي جاندانىپ, جاڭا دەڭگەيگە كوتەرىلگەنىن, ەلىمىز ونى ودان ءارى نىعايتۋعا مۇددەلى ەكەنىن اتاپ ءوتتى. سونداي-اق ول پرەزيدەنتتىڭ ۆاتيكانعا رەسمي ساپارى ەكىجاقتى ىنتىماقتاستىقتىڭ دامۋىنا تىڭ سەرپىن بەرگەنىن ايتتى.
– ەلىمىز قاسيەتتى تاقپەن اراداعى جۇيەلى تۇردە كەڭەيىپ كەلە جاتقان تىعىز قارىم-قاتىناسقا ۇنەمى باسا ءمان بەرەدى. جوعارى دەڭگەيدەگى تۇراقتى بايلانىستار قازاقستان مەن ۆاتيكان اراسىنداعى دوستىق قارىم-قاتىناستىڭ بەرىك نەگىزىن قامتاماسىز ەتەدى. مەملەكەت باسشىسى بىلتىر ۆاتيكانعا رەسمي ساپارى كەزىندە قازاقستان شىنايى دوستىققا, كەلىسىم مەن ءوزارا قۇرمەتكە نەگىزدەلگەن قاسيەتتى تاقپەن اراداعى بۇرىننان كەلە جاتقان سەرىكتەستىك بايلانىستاردى جوعارى باعالايتىنىن اتاپ ءوتتى. جاقىندا قاسيەتتى تاق جانىندا قازاقستان ەلشىلىگىنىڭ اشىلۋى ەكىجاقتى ىنتىماقتاستىقتى ءارى قاراي نىعايتۋدى كوزدەيتىن شىنايى نيەتىمىزدىڭ جارقىن كورىنىسى ەكەنى انىق», دەپ م.اشىمباەۆ قاسيەتتى تاقتىڭ اپوستولدىق نۋنتسيىنە ديالوگ پەن ىنتىماقتاستىقتى ارتتىرۋعا قوسقان ۇلەسى ءۇشىن العىس ءبىلدىردى.
سونىمەن قاتار پالاتا سپيكەرى الەمدىك جانە ءداستۇرلى دىندەر كوشباسشىلارى سەزىنىڭ يدەيالارىن جان-جاقتى جانە دايەكتى قولداعانى ءۇشىن ۆاتيكان تاراپىنا العىس ايتتى. كەزدەسۋدە سەزدىڭ بىرلەسكەن كۇش-جىگەردىڭ ارقاسىندا دىندەر اراسىنداعى ءوزارا تۇسىنىستىك پەن سىيلاستىقتى نىعايتۋعا ارنالعان ىرگەلى الاڭعا اينالعانى ايتىلدى. سونداي-اق سەنات توراعاسى قازىرگى سىن-قاتەرلەردى ەڭسەرۋ جولىندا رۋحاني ديپلوماتيانىڭ ماڭىزىنا توقتالىپ, ەلىمىزدىڭ كونفەسسياارالىق كەلىسىمدى دامىتۋ مەن جاھاندىق دىنارالىق ديالوگتى ىلگەرىلەتۋگە ارنالعان باستامالارعا توقتالدى.
– الەمدىك جانە ءداستۇرلى دىندەر كوشباسشىلارىنىڭ VIII سەزىنىڭ كۇن ءتارتىبى وزەكتى ءارى مازمۇندى بولدى. ءبىز بۇۇ وركەنيەتتەر اليانسىمەن بىرلەسىپ, ءدىني نىسانداردى قورعاۋ جونىندە ارنايى سەسسيا وتكىزدىك. ودان بولەك, جاس ءدىني ليدەرلەردىڭ ەكىنشى فورۋمى ۇيىمداستىرىلدى. اتالعان ءىس-شاراعا ءتۇرلى ءدىني كونفەسسيالاردىڭ وكىلدەرى, عالىمدار, ساراپشىلار قاتىستى. سەزد اياسىندا قازىرگى حالىقارالىق قاتىناستارداعى رۋحاني ديپلوماتيانىڭ رولىنە ارنالعان ساراپتامالىق دوڭگەلەك ۇستەل دە وتكىزىلدى. وسىنداي باستامالاردىڭ ءبارى مادەنيەتتەر مەن دىندەردىڭ جاقىنداسۋىنا ايتارلىقتاي ۇلەس قوستى دەۋگە تولىق نەگىز بار, – دەپ م.اشىمباەۆ الداعى بىرلەسكەن جۇمىستىڭ باسىم باعىتتارىن اتاپ ءوتتى.
دجوردج پانامتۋنديل دە قاسيەتتى تاق قازاقستاننىڭ بەيبىت باستامالارىن تولىق قولدايتىنىن ايتتى. سونىمەن قاتار ول تولەرانتتىلىق, ۇيلەسىمدىلىك پەن باۋىرلاستىق يدەيالارىن دارىپتەۋگە مۇددەلى ەكەنىن مالىمدەدى.
كەزدەسۋدە بۇعان قوسا دەنساۋلىق ساقتاۋ, عىلىم, مادەنيەت, باسقا دا بىرقاتار سالاداعى بايلانىستاردى كەڭەيتۋ ماسەلەلەرى دە تالقىلاندى.
