سۋرەت: kaz.inform.kz
كەڭەستە ەكولوگيا جانە تابيعي رەسۋرستار ءمينيسترى ەرلان نىسانباەۆ, سونداي-اق باسقا دا مەملەكەتتىك ورگانداردىڭ وكىلدەرى ءسوز سويلەدى. ەكولوگيا مينيسترلىگىنىڭ دەرەكتەرىنە سۇيەنسەك, ەلدەگى كيىكتەردىڭ سانى بۇگىن رەكوردتىق دەڭگەيگە جەتتى. قازىر 4 ملن بولسا, تولدەگەن سوڭ شامامەن 5 ملن-عا جەتەدى. وسىنداي قارقىندى ءوسۋدى ەسكەرە وتىرىپ, ۋاكىلەتتى ورگاندار زوولوگيا ينستيتۋتى دايىنداعان بيولوگيالىق نەگىزدەمە نەگىزىندە اۋىل شارۋاشىلىعىنا زيان كەلتىرمەۋ, ەكوجۇيەلىك تەپە-تەڭدىكتى ساقتاۋ ماقساتىندا جانۋارلار سانىن تۇراقتى باسقارۋ جونىندە ءىس-شارالار جۇرگىزدى.
بيىلعى 1 شىلدەدەن 30 قاراشاعا دەيىن 196 مىڭعا جۋىق كيىك ۇشاسى وتاندىق ەت وڭدەۋ كاسىپورىندارىنا بەرىلدى. جۇمىستار عىلىمي ۇسىنىمدارعا سايكەس قاتاڭ تۇردە جۇرگىزىلدى.
دەريۆاتتاردى ەسەپكە الۋعا ءارى ساقتاۋعا ەرەكشە نازار اۋدارىلادى. كيىكتەردىڭ ءمۇيىزى تاڭبالانىپ, مينيسترلىككە قاراستى «وحوتزووپروم» ءوب» رمقك ۇيىمىندا كۇشەيتىلگەن كۇزەت پەن مامانداندىرىلعان ينفراقۇرىلىم جاعدايلارىندا ساقتالادى.
دەريۆاتتاردى تسيفرلىق تاڭبالاۋ مەن حالىقارالىق رەتتەۋ ماسەلەلەرى جەكە قارالدى. «قازاقتەلەكوم» اق-مەن بىرلەسىپ تولىق قاداعالاۋدى ءارى زاڭدى اينالىمدى قامتاماسىز ەتەتىن كيىك مۇيىزدەرىن تاڭبالاۋ جوباسى جۇزەگە اسىرىلىپ جاتىر. ۇسىنىلعان جۇيە CITES حالىقارالىق كونفەرەنتسياسىندا قولداۋ تاپتى ءارى وتاندىق دەريۆاتتاردىڭ ەكسپورتىنا شەكتەۋلەردى كەزەڭ-كەزەڭىمەن الىپ تاستاۋعا نەگىز رەتىندە قاراستىرىلادى.
جيىن قورىتىندىسىندا رومان سكليار ەكولوگيا جانە تابيعي رەسۋرستار مينيسترلىگى مەن باسقا دا مۇددەلى مەملەكەتتىك ورگاندارعا 2026 جىلعا كيىك سانىن تۇراقتى باسقارۋعا دايىندىق بويىنشا شارالار قابىلداۋدى, سونداي-اق CITES شەشىمدەرىن ەسكەرە وتىرىپ, دەريۆاتتاردىڭ تاڭبالانۋى مەن اينالىمى جونىندەگى نورماتيۆتىك بازانى قالىپتاستىرۋدى اياقتاۋدى تاپسىردى.
