جولداماعا اركىمنىڭ بار تالاسى

كەلەسى جىلدىڭ 6-22 اقپان كۇندەرى يتاليانىڭ ميلان, كورتينا-د’امپەتستسو قالالارىندا ءتورت جىل­دىقتىڭ باستى دوداسى – XXV قىسقى وليمپيا ويىندارى وتەدى. باي­راقتى باسەكەگە الەمنىڭ 93 ەلىنەن 3 500-دەن استام سپورتشى دوداعا ءتۇسىپ, مەدال جولىندا باق سىنايدى. ولاردىڭ قاتارىندا وتاندىق سپورتشىلارىمىز دا بار. قازىر ساڭلاقتار قىسقى وليمپياداعا قاتىسۋعا وراي تۋعىزاتىن جولدامالاردى ولجالاۋ ماقساتىندا حالىقارالىق جارىستار مەن الەم كۋبوگى كەزەڭدەرىنە قاتىسىپ جاتىر. وليمپيادا ليتسەنزياسى سول جارىستارداعى ناتيجەلەر مەن جيناعان ۇپاي سانىنا قاراي ۇلەستىرىلەدى. قىر استىندا تۇرعان قىسقى الاماننىڭ ءدۇبىرى جاقىنداپ كەلەدى. بىزدە ازىرگە تەك ەكى ليتسەنزيا عانا بار. ەكى جولدامانى مانەرلەپ سىرعاناۋشىلار ميحايل شايدوروۆ پەن سوفيا سامودەلكينا يەلەنگەن بولاتىن. ولار وزدەرىنىڭ الەۋەتىن سىناپ, الەمدىك دودالارعا قاتىسۋدى كوزدەپ وتىر. ميحايل 4-7 جەلتوقساندا جاپونيانىڭ ناگويا قالاسىنداعى گران-پري جارىسىنا, سوفيا 3-6 جەلتوقساندا حورۆاتيا استاناسى زاگرەبتەگى تۋرنيردە الەۋەتىن باعامداپ الماقشى.

بۇگىنگە دەيىن شورت-ترەكتەن ەلىمىزدىڭ ۇلتتىق قۇراماسى الەم­دىك تۋردىڭ كەزەڭدەرىن اياق­تادى. بۇل سپورت تۇرىنەن سوڭعى, ياعني IV كەزەڭ وتكەن اپتادا نيدەرلاندتىڭ دوردرەحت قالاسىندا ءوتتى. الداعى ۋاقىتتا شورت-ترەكتەن وليمپياداعا باراتىن سپورتشىلاردىڭ ەسىمدەرى انىقتالادى. ۇلتتىق قۇراما باپ­كەرلەرى 4 سپورتشىمىز ليتسەنزيا ەنشىلەيدى دەپ ءۇمىت ارتىپ وتىر.

كونكيمەن جۇگىرۋ سپورتىندا جولدامادان ءۇمىتتى ۇزدىكتەر 5-7 جەلتوقساندا نيدەرلاندتىڭ حەرەنۆەن, 12-14 جەلتوقساندا حامار قالاسىندا وتەتىن الەم كۋبوگى كەزەڭدەرىندە باق سىنايدى. فريستايل-موگۋل سپورتشىلارى 4 جەلتوقساننان 2026 جىلدىڭ 18 قاڭتارىنا دەيىن فينليانديا, كانادا, اقش-تاعى الەم كۋبوگىنە, سونداي-اق FIS-ءتىڭ فرانتسيادا وتكىزەتىن حالىقارالىق تۋرنيرىنە قاتىسادى. فريستايل-اكروباتيكا سايىسىنان سىنعا تۇسەتىن سپورتشىلارىمىز 6 جەلتوقساننان 2026 جىلدىڭ 18 قاڭتارىنا دەيىن الەم كۋبوگىنىڭ بەس كەزەڭىندە باق سىناپ, ليتسەنزيا يەلەنۋگە بارىن سالادى. الەم كۋبوگىنىڭ كەزەڭدەرى فينليانديا, قىتاي , اقش-تا وتەدى. بياتلونشىلار الەم كۋبوگىنىڭ التى كەزەڭى مەن IBU اياسىنداعى التى حالىقارالىق تۋرنيردە شەبەرلىگىن سىناپ, كورسەتكىشتەرىنە قاراي جولداما يەلەنەدى. الەم كۋبوگىنىڭ كەزەڭدەرى شۆەتسيا, اۋستريا, فرانتسيا, گەرمانيا مەن چەحيادا وتسە, حالىقارالىق تۋرنيرلەردى اۋستريا, يتاليا, شۆەيتساريا, گەرمانيا, سلوۆەنيا, نورۆەگيا ەلدەرى ۇيىمداستىرادى. شاڭعىشىلار فينليانديا, نور­ۆەگيا, شۆەيتساريا, يتاليادا وتەتىن الەم كۋبوگىنىڭ بەس كەزەڭىندە باق سىناسا, شاڭعىمەن ترامپليننەن سەكىرۋشىلەر الەم كۋبوگىنىڭ 12 كەزەڭىنە, سونداي-اق ەكى رەت FIS كۋبوگىنە, ەكى مارتە اۋستريا, گەرمانيادا وتەتىن, باسقا دا قۇرلىقتىق سايىستارعا قاتىسادى. ءدۇبىرلى دودالار 20 قاراشادان 2026 جىلعى 18 قاڭتار ارالىعىندا وتەدى. ازىرگە وتانداستارىمىز ەكى الەم كۋبوگىنە قاتىستى. تاۋ شاڭعىسى سپورتشىلارىنىڭ دا بايراقتى باسەكەلەرى جەتكىلىكتى. الەم كۋبوگىنىڭ توعىز كەزەڭىنىڭ ۇشەۋى ءوتتى, الدا التى اسۋ بار. 12 جەلتوقسان مەن 2026 جىلعى 25 قاڭتار ارالىعىندا شۆەيتساريا, فرانتسيا, اۋستريا, چەحيادا جەلدەي جۇيتكىگەن ساڭلاقتار سىنعا تۇسەدى. شاڭعى قوسسايىسىندا الەم كۋبوگىنىڭ التى كەزەڭىن فينليانديا, نورۆەگيا, اۋستريا, گەرمانيا ەلدەرى ۇيىمداستىرادى دا, تارتىس 4 جەلتوقساننان 2026 جىلعى
1 اقپانعا دەيىن جالعاسادى.

ەلىمىزدىڭ سپورتشىلارىن 2026 جىلعى باستى سپورتتىق ءىس-شاراعا جوعارى دەڭگەيدە باپتاۋ ماقساتىندا تۋريزم جانە سپورت مينيسترلىگى سپورت فەدەراتسيالارىمەن بىرلەسىپ, ۇلتتىق قۇرامالاردى دايارلاۋدىڭ كەشەندى جوسپارىن ازىرلەدى. وقۋ-جاتتىعۋ جيىندارىن ۇيىمداستىرۋ, مەدي­تسينالىق, پسيحولوگيالىق قولداۋ, قارجىلاندىرۋ, قاجەت­­تى سپورت قۇرال-جابدىق­تارىمەن قام­تاما­سىز ەتۋ, تاماق­تاندىرۋ, سونداي-اق بىلىكتى جاتتىقتىرۋشىلاردى تارتۋ ءىسى قانشالىقتى ناتيجەلى بولاتىنى يتالياداعى اق وليم­پيادادا بەزبەندەلەدى.