مۋزەي ديرەكتورى مۇحامبەتقالي كيپيەۆتىڭ ايتۋىنشا, 2023–2024 جىلدارى قىزىلقوعا اۋدانىنداعى اتالعان قورىمدارعا ارحەولوگيالىق قازبا جۇمىسى جۇرگىزىلىپتى. ارحەولوگتەر ءبىزدىڭ زامانىمىزعا دەيىنگى V–IV عاسىرلارعا جاتاتىن قۇندى قازىنانى زەرتتەپ, قالپىنا كەلتىردى.
«بۇل جادىگەرلەر – سارمات تايپالارىنىڭ وشپەس تاريحى. ەرتە كەزەڭدەگى تايپالاردىڭ وركەنيەتى, قولونەرى, اسكەري مادەنيەتى جانە ءدىني-عۇرىپتىق ءداستۇرى جوعارى دەڭگەيدە دامىعانىن ايقىن كورسەتەدى», دەيدى م.كيپيەۆ.
كونە تاريحتىڭ كومبەسى سەكىلدى ەسكى قورىمداردان تابىلعان التىن بۇيىمداردان بىرنەشە اڭنىڭ بەينەسى انىق كورىنەدى. ماسەلەن, التىن توعادان قوس جولبارىس پەن قوس ارقار كورۋگە بولادى. ال التىن بىلەزىكتىڭ ەكى ۇشىندا بارىستىڭ ءمۇسىنى بەينەلەنىپتى. سىناما تاستا التىن تۇتقا بار.
اڭ ستيلىندەگى جاپسىرمالار, ءبىر ورامدى القا, بىلەزىك پەن سىرعا دا قىزىقتىرادى. كۇن مەن جارتى اي بەينەلى سالپىنشاق سىرعانىڭ ءجونى بولەك. اعاش ىدىستىڭ جاپسىرمالارى اڭ ستيلىندە جاسالىپتى.
اتىراۋ وبلىسى
