2026 جىلى جالپى سوماسى 394 ملرد تەڭگە بولاتىن 50 جوبانى ىسكە اسىرۋ جانە 2 جارىم مىڭ جاڭا جۇمىس ورنىن اشۋ جوسپارلانىپ وتىر.
سونىڭ ءبىرى – جامبىل وبلىسىندا جۇزەگە اساتىن جوبا. وندا 300 مىڭ توننا جۇگەرىنى تەرەڭ وڭدەۋ كوزدەلسە, الماتى وبلىسىندا 25 مىڭ توننا جەمىس-جيدەكتى وڭدەۋ ءىسى قولعا الىنباق. بۇدان بولەك, بالمۇزداق ءوندىرىسى 35 مىڭ تونناعا دەيىن ۇلعايتىلادى جانە تاعى ءبىر جوبا اياسىندا 250 مىڭ توننا شاماسىندا استىق جانە مايلى داقىلدار وڭدەلمەك.
ءمينيستردىڭ دەرەگىنشە, قوستاناي وبلىسىندا كونديتەرلىك ونىمدەر ءوندىرىسى 13 مىڭ تونناعا ارتادى. ال اباي وبلىسىندا 7,2 مىڭ توننا شۇجىق ونىمدەرىنىڭ ءوندىرىسى ىسكە قوسىلادى. 2027 جىلى جالپى سوماسى 874,3 ملرد تەڭگە بولاتىن 26 جوبانى ىسكە اسىرۋ جانە 3,5 مىڭنان استام جۇمىس ورنىن قۇرۋ كوزدەلىپ وتىر.
ونىڭ ىشىندە استانا قالاسىندا 250 مىڭ توننا بيداي جانە 80 مىڭ توننا بۇرشاق وڭدەيتىن, ال اقمولا وبلىسىندا جىلىنا 1 ملن توننا بيداي وڭدەيتىن جوبا ىسكە اسپاق. قولعا الىناتىن باستامالار قاتارىندا جۇمىرتقا, كارتوپ, مال مەن وسىمدىك ونىمدەرىن وڭدەۋ جوبالارى بار.
ايتا كەتەيىك, بيىل 9 ايدا 2,5 ملرد دوللاردىڭ اۋىل شارۋاشىلىعى ونىمدەرى ەكسپورتقا شىعارىلدى.
