ءىس-شارالار ءتورت كەزەڭنەن تۇردى. ءبىرىنشى كەزەڭ اياسىندا بەلسەندىلەر مەن ۇكىمەتتىك ەمەس ۇيىمداردىڭ وكىلدەرىنە ارنالعان ۆوركشوپ ۇيىمداستىرىلدى.
سپيكەرلەر قوعامدىق ۇيىمداردىڭ ءوز باستامالارىن كۇشەيتۋ ءۇشىن مەملەكەتپەن جانە قوعاممەن قالاي ءوزارا ارەكەتتەسۋ كەرەك ەكەنىن ءتۇسىندىردى. ۇەۇ مەن مەملەكەتتىك ورگانداردىڭ وكىلدەرى ورتاق ماسەلەلەردى تالقىلاپ, دامۋ نۇكتەلەرىن ايقىندادى.
ەكىنشى كەزەڭ پراكتيكالىق ءبولىم بولدى جانە ناقتى كەيستەرگە ارنالدى.
قاتىسۋشىلار الەۋمەتتىك جوبالاردىڭ مىسالدارىن تالداپ, ولاردىڭ كەڭەيۋىنە كەدەرگى كەلتىرەتىن فاكتورلاردى اتاپ ءوتتى. سونىمەن قاتار ءوز يدەيالارىن ۇسىندى.
ودان كەيىن تۇراقتى دامۋ ماقساتتارى كونتەكستىندە وزەكتى الەۋمەتتىك ماسەلەلەردى شەشۋگە باعىتتالعان جاڭا يدەيالاردى قوعام تالقىلاۋى ءوتتى.
قورىتىندى بولىمدە «استانادا تۇراقتى دامۋ ماقساتتارىنا قول جەتكىزۋ جانە ىسكە اسىرۋ» جوباسىنىڭ ناتيجەلەرى تالقىلانعان دوڭگەلەك ۇستەل ۇيىمداستىرىلدى.
«مەن استانادا كۇمىس ۆولونتەرمىن. بۇگىنگى كەزدەسۋ تاقىرىبى وتە وزەكتى ءارى قىزىقتى. بۇل باعىتپەن مەن كوپتەن بەرى اينالىسىپ كەلەمىن. مەنىڭ مىندەتىم – بۇگىن العان بارلىق اقپاراتتى ءبىزدىڭ كۇمىس ۆولونتەرلەرىمىز بەن ۋنيۆەرسيتەتتىڭ مۇشەلەرىنە جەتكىزۋ. ءبىز مۇنداي ءىس-شارالارعا العاش رەت قاتىسىپ وتىرعان جوقپىز. ۇسىنىلعان باعىتتاردى قاراپ, وزىمىزگە قولايلىسىنا بەلسەندى تۇردە اتسالىسۋعا تىرىسامىز. ءاربىر ازامات ءوزى قاتىسا الاتىن جانە قاتىسقىسى كەلەتىن ەكولوگيالىق باعىتتى تابۋى كەرەك دەپ ويلايمىن. تۇراقتى دامۋ ماقساتتارىن ىسكە اسىرۋعا ارنالعان وسىنداي ءىس-شارالار ءدال وسىعان ىقپال ەتەدى. بۇل – دۇرىس جول دەپ سانايمىن», دەدى «ۇزدىكسىز ءبىلىم بەرۋ» قورىنىڭ ديرەكتورى گۇلبارشىن قاسىمانوۆا.
بۇل كۇننىڭ ەرەكشەلىگى – ءبىر ۇستەل باسىنا ءار بۋىن مەن ءارتۇرلى سالانىڭ وكىلدەرى جينالدى. ارقايسىسىنىڭ ايتارى بولدى.
