ونەركاسىپ ءونىمى ءوندىرىسىنىڭ شامامەن 63%-ى وڭدەۋ سەكتورىنا تيەسىلى, ونداعى كاسىپورىندارمەن رەسپۋبليكا بويىنشا 100% ناتري تريپوليفوسفاتى, ناتري ءتسيانيدى وندىرىلەدى. وبلىس اكىمىنىڭ ايتۋىنشا, وڭىرگە تارتىلعان ينۆەستيتسيالاردىڭ جالپى كولەمىندەگى جەكە ينۆەستيتسيالار ۇلەسى بويىنشا ءوڭىر الدا تۇرعان 5 وبلىستىڭ قاتارىندا ەكەن. ال ينۆەستيتسيا كولەمىنىڭ ءوسۋ قارقىنى – رەسپۋبليكادا 3-ورىندا.
– اتاپ ايتساق, «Yonggang Iron And Steel Group Cو., LTD» جىلىنا 3 ملن تونناعا دەيىن پروكات مەتالل بۇيىمدارىن ءوندىرۋ بويىنشا مەتاللۋرگيالىق زاۋىتىن, «ەۆروحيم ۋدوبرەنيا» كومپانياسى جىل سوڭىنا دەيىن جىلىنا 800 مىڭ توننا كۇكىرت قىشقىلىن وندىرەتىن ءوندىرىستىڭ ءبىرىنشى كەزەڭىن ىسكە قوسۋدى جوسپارلاپ وتىر. كەلەسى جىلى جىلىنا 1 ملن توننا كۇردەلى تىڭايتقىش شىعاراتىن زاۋىت ىسكە قوسىلماق. «Zhongkai Kazakhstan International Sugar Industry Company» قۋاتتىلىعى جىلىنا 1 ملن توننا قانت قىزىلشاسىن وڭدەپ, 130 مىڭ توننا قانت, 72 مىڭ توننا قىزىلشا ۇنى مەن 54 مىڭ توننا مەلاسسا شىعاراتىن زاماناۋي قانت زاۋىتىنىڭ قۇرىلىسىن باستادى. سونداي-اق «Qazaq Soda» جىلىنا 1 ملن توننا كالتسيلەندىرىلگەن سودا ءوندىرىسىنىڭ, «شوكپار-گاگارينسكوە» كومپانياسى قورداي اۋدانىنداعى گاگارينسكوە كەن ورنىندا جىلىنا 500 مىڭ توننا قۇرامىندا التىن بار كەن وندىرەتىن تاۋ-كەن بايىتۋ كومبيناتىنىڭ قۇرىلىسىن باستادى, – دەدى اكىم.
وسى ءىرى ينۆەستيتسيالىق جوبالاردى عانا ىسكە اسىرۋدىڭ ەسەبىنەن وبلىس ەكونوميكاسىنا 3,8 ترلن تەنگە كولەمىندە ينۆەستيتسيا تارتىلماق. اتالعان جوبالاردىڭ باسىم بولىگى «Jibek Joly» ارنايى ەكونوميكالىق اۋماعىندا جانە «تاراز» يندۋستريالىق ايماعىندا ورنالاسقان.
بيىل جامبىل وبلىسى اۋىل شارۋاشىلىعىنىڭ جالپى ءونىم كولەمى 458,5 ملرد تەڭگەنى قۇراپتى. اۋىل شارۋاشىلىعى داقىلدارىنىڭ ەگىستىك القابى 640 مىڭ گەكتارعا جەتكەن. وڭىردە 3,3 ملن توننا ءونىم جينالدى, ونىڭ ىشىندە 283 مىڭ توننا ماساقتى ءداندى داقىلدار, 31,3 مىڭ توننا مايلى داقىلدار, 1,3 ملن توننا كوكونىس داقىلدارى, 207 مىڭ توننا كارتوپ, 389 مىڭ توننا باقشا داقىلدارى جينالعان. ەربول شىراقباي ۇلىنىڭ ايتۋىنشا, وڭىردە قانت قىزىلشاسى القابىنىڭ 88,1%-ى جينالىپ, 207 مىڭ توننا ءونىم الىنعان. 762 اۋىل شارۋاشىلىعى تەحنيكاسى ساتىپ الىنىپ, ناتيجەسىندە, اۋىل شارۋاشىلىعى تەحنيكاسىن جاڭعىرتۋ دەڭگەيى 5,6%-دى قۇراپتى.
– مال شارۋاشىلىعىندا ەت ءوندىرىسى – 2,7%-عا, ءسۇت 1,6%-عا ارتتى. 888 مىڭ توننا اۋىل شارۋاشىلىعى ءونىمى ەكسپورتتالدى, ونىڭ ىشىندە 400 مىڭ توننا پياز بار. پياز ەكسپورتى بويىنشا وبلىس ەلىمىزدە كوشباسشى بولىپ وتىر. 61,8 مىڭ گا پايدالانىلماعان اۋىل شارۋاشىلىعى باعىتىنداعى جەر تەلىمى قايتارىلدى. «اۋىل اماناتى» جوباسى اياسىندا وسى جىلى 3,2 ملرد تەڭگەگە 437 جوبا قارجىلاندىرىلدى. وبلىستا 66,5 مىڭ گا ەگىس القاپتارىنا سۋ ۇنەمدەۋ تەحنولوگيالارى ەنگىزىلدى. ءوڭىردىڭ 6 اۋدانىندا 37,2 ملرد تەڭگەگە 625 شاقىرىم بولاتىن 322 سۋ نىساندارى قايتا جاڭارتىلىپ جاتىر, – دەدى ايماق باسشىسى.
سۋ سالاسىن دامىتۋدىڭ كەشەندى جوسپارى اياسىندا 184 ملرد تەڭگە ەسەبىنەن 2029 جىلعا دەيىن 11 جاڭا سۋ قويماسىن سالۋ, 3 سۋ قويماسىن قايتا جاڭارتۋ, 312 كانالدى جوندەۋ جوسپارلانىپ وتىر. وبلىستا سۋ ۇنەمدەۋ تەحنولوگيالارىن قولدانۋدى كەڭەيتۋ اياسىندا ەكى جوبا ىسكە اسىرىلىپ جاتىر.
سونىمەن قاتار جامبىل وبلىسىندا كوپبالالى وتباسىلار مەن حالىقتىڭ الەۋمەتتىك وسال توپتارى ءۇشىن 710 پاتەر ساتىپ الۋ جوسپارلانىپ وتىر. «اۋليە اتا جاستارى» باعدارلاماسى اياسىندا 140 جاس وتباسى باسپانامەن قامتىلعان.
– گازداندىرۋ اياسىندا وبلىستىڭ 6 اۋدانىندا 20,5 ملرد تەڭگەگە 14 جوبا ىسكە اسىرىلىپ جاتىر. ناتيجەسىندە گازبەن جابدىقتاۋ دەڭگەيى 91,3%-دان 91,8%-عا دەيىن جەتەدى. وبلىس قالالارىندا جىلۋ جەلىلەرىنىڭ ۇزىندىعى 350,7 شاقىرىم بولسا, ولاردىڭ توزۋ دەڭگەيى 54%-دى قۇرايدى. بيىل تاراز قالاسىندا م-1 نەگىزگى جىلۋ ماگيسترالىن جاڭعىرتۋ, جاڭا مولتەك اۋدانىندا جىلۋ جەلىلەرىن كەڭەيتۋ بويىنشا جۇمىستار اياقتالدى. قاراتاۋ قالاسىندا مازۋت شارۋاشىلىعى مەن ورتالىق قازاندىقتار قايتا جاڭعىرتۋدان ءوتتى. سونىمەن قاتار تاراز قالاسىندا م-3 جىلۋ جەلىلەرىن جاڭارتۋ جۇرگىزىلىپ, جوسپارلانعان 1,4 شاقىرىمنىڭ 50%-ى اياقتالدى. ناتيجەسىندە, جىل قورتىندىسىمەن جىلۋ جەلىلەرىنىڭ توزۋ دەڭگەيى 53%-عا دەيىن تومەندەيدى, – دەيدى ە.قاراشوكەەۆ.
وبلىستاعى اۆتوموبيل جولدارىنىڭ جالپى ۇزىندىعى 10 مىڭ شاقىرىمدى قۇرايدى. وسى جىلى اۆتوجول سالاسىندا 182 جوبانى ىسكە اسىرۋعا 28 ملرد تەڭگە ءبولىنىپ, 460 شاقىرىم جولدىڭ قۇرىلىسى قولعا الىنىپ, قايتا جاڭعىرتۋ جانە جوندەۋ جۇمىسى جۇرگىزىلگەن. وسىنىڭ ارقاسىندا جىل قورىتىندىسىمەن جاقسى جانە قاناعاتتانارلىق جاعدايداعى جەرگىلىكتى ماڭىزى بار اۆتوجولدار ۇلەسى 99,5%-عا, ال كوشە-جول جەلىسى 89%-عا دەيىن جەتكىزىلەدى.
جامبىلدا الەۋمەتتىك ينفراقۇرىلىمدى دامىتۋ شەڭبەرىندە 25 ملرد تەڭگەگە 26 ءبىلىم بەرۋ نىسانىنىڭ قۇرىلىسى جۇرگىزىلىپ جاتىر. جىل باسىنان بەرى 7 مەكتەپ پايدالانۋعا بەرىلىپ, ونىڭ تورتەۋى «كەلەشەك مەكتەپتەرى» جوباسى اياسىندا سالىنعان. جىل سوڭىنا دەيىن تاعى 7 نىسان قۇرىلىسى اياقتالماق. وبلىس باسشىسىنىڭ سوزىنە سۇيەنسەك, 16 ءبىلىم نىسانىن كۇردەلى جوندەۋگە 11 ملرد تەڭگە بولىنگەن.
– «ادال ازامات» ءبىلىم بەرۋ باعدارلاماسى اياسىندا وبلىستاعى 22 مەكتەپ بىرىڭعاي ديزاين-كودىنا كوشۋدى باستاپ كەتتى. وبلىس وقۋشىلارى 16 جىل قاتارىنان رەسپۋبليكالىق عىلىمي جوبالار كونكۋرسىندا «ەڭ ۇزدىك كوماندا» اتانىپ, رەسپۋبليكالىق وليمپيادانىڭ قورىتىندىسىمەن «ۇزدىك وليمپيادالىق كوماندا» دەپ تانىلدى, – دەدى ءوڭىر باسشىسى.
جەكە قاراجات ەسەبىنەن اباي اتىنداعى جامبىل گۋمانيتارلىق كوللەدج ستۋدەنتتەرىنە تاراز قالاسىندا 120 ورىندىق جاتاقحانا قۇرىلىسى جۇرگىزىلىپتى.
سونداي-اق وبلىس اكىمى دەنساۋلىق ساقتاۋ سالاسىنىڭ دامۋىنا دا توقتالدى. ماسەلەن, 6 ملرد تەڭگەگە 32 بىرلىك مەديتسينالىق جابدىق ساتىپ الىنعان. بۇل ەرتە دياگنوستيكانىڭ, جەدەل جاردەم جۇمىسىنىڭ ساپاسى مەن اۋىلدىق جەرلەردە مەديتسينالىق قىزمەتتىڭ قولجەتىمدىلىگىن ارتتىرۋعا مۇمكىندىك بەرەدى. ناتيجەسىندە, دەنساۋلىق ساقتاۋ ينفراقۇرىلىمىنىڭ توزۋ دەڭگەيى 42%-عا دەيىن تومەندەپ, مەديتسينالىق جابدىقپەن جاراقتاندىرۋ دەڭگەيى 92%-عا دەيىن جەتكەن.
ودان بولەك, وڭىردە جاساندى ينتەللەكتىنى پايدالانا وتىرىپ, تمد ەلدەرىندە بالاماسى جوق بىرەگەي جوبا ىسكە اسىرىلدى. 22 مەديتسينالىق مەكەمە بىرىڭعاي راديولوگيالىق اقپاراتتىق جۇيەگە بىرىكتىرىلدى.
جالپى, وڭىردە 3,1 ملرد تەڭگەگە 21 سپورت كەشەنىنىڭ قۇرىلىسى جۇرگىزىلىپ جاتىر. 3 سپورت كەشەنى مەن 90 سپورت الاڭى پايدالانۋعا بەرىلگەن. سونىڭ ناتيجەسىندە حالىقتى سپورت ينفراقۇرىلىمىمەن قامتاماسىز ەتۋ دەڭگەيى 70,8%-عا, دەنە شىنىقتىرۋ جانە سپورتپەن شۇعىلداناتىن حالىق ۇلەسى 41,9%-عا دەيىن جەتكەن.
توكيو قالاسىندا وتكەن دۇنيەجۇزىلىك XXV جازعى سۋردليمپيادا ويىندارىنا وڭىردەن 12 سپورتشى قاتىسىپ, 1 التىن, 3 كۇمىس, 2 قولا مەدال جەڭىپ العانىن ايرىقشا اتاپ وتۋگە بولادى.
سونداي-اق تاراز قالاسىندا 3,5 ملرد تەڭگە بيۋدجەتتەن تىس قارجى ەسەبىنەن بالالار مەن جاسوسپىرىمدەرگە ارنالعان فۋتبول اكادەمياسىنىڭ قۇرىلىسى باستالعان. بۇدان بولەك, ايماق اكىمى «تاراز» جاستار تەاترى ستۋدياسى, «قولونەرشىلەر ءۇيى» شىعارماشىلىق ورتالىعى, «تەكتۇرماس» رەسپۋبليكالىق تاريحي-تانىمدىق جۋرنالىنىڭ اشىلعانىن دا اتاپ ءوتتى.
تۋريزم سالاسىندا 6 ملرد تەڭگەگە 10 ينۆەستيتسيالىق جوبا ىسكە اسىرىلىپ جاتىر. 1,2 ملرد تەڭگەگە 3 تۋريستىك نىسانعا ۇزىندىعى 34,8 شاقىرىم اۆتوموبيل جولدارى سالىنعان.
«قولجەتىمدى ينتەرنەت» ۇلتتىق جوباسى اياسىندا 148 ەلدى مەكەندە ينتەرنەت ساپاسى 4G دەڭگەيىنە جەتكىزىلگەن. بۇدان بولەك, ءباسپاسوز ءماسليحاتىندا وڭىردەگى رەسپۋبليكالىق ماڭىزى بار اۆتوموبيل جولدارىنىڭ بويىندا 12 انتەننالىق-دىڭگەكتى قۇرىلعىلاردىڭ قۇرىلىسى جۇرگىزىلىپ جاتقانى دا ايتىلدى.
