بۇگىندە ەلدى مەكەن توڭىرەگىندەگى جولدارداعى نەگىزگى ماسەلەلەردىڭ ءبىرى مالدىڭ كولىك جولىنا جاقىن ماڭدا جايىلىپ, ءارى-بەرى وتۋىندە بولىپ وتىر. اسىرەسە تۇندە ءوز اياعىمەن جايىلاتىن ورىستەگى ءىرى-قارا جول-كولىك شىرعالاڭىنا ءجيى سەبەپ بولىپ, جۇرگىزۋشىلەر مەن جولاۋشىلاردىڭ ومىرىنە قاۋىپ توندىرەدى.
اباي وبلىسىندا بۇل ماسەلەنى شەشۋ ءۇشىن زاماناۋي تەحنولوگيالار ەنگىزىلە باستادى. اۋدان اكىمدىكتەرىنىڭ قولداۋىمەن جەرگىلىكتى پوليتسيا بولىمشەلەرى پاترۋلدىك قىزمەتى اۋماقتى تۇراقتى باقىلاۋعا, اۆتوجول ماڭىندا ەركىن جايىلىپ جۇرگەن مالدى جەدەل انىقتاۋعا مۇمكىندىك بەرەتىن دروندارمەن جابدىقتالدى. جوعارى ساپالى كامەراسى بار ۇشقىنسىز العىر اپپاراتتار مالدىڭ جۇرگەن جەرىن انىقتاپ, ناقتى ۋاقىت رەجىمىندە كورسەتىپ, تەز ارەكەت ەتۋگە جاعداي جاسايدى.
ماسەلەن, جاڭاسەمەي اۋدانىندا جۇرگىزىلگەن باقىلاۋ جۇمىسى بارىسىندا 59 باس جىلقى انىقتالىپ, جول جيەگىنەن الىستاتىلعان. مامانداردىڭ ايتۋىنشا, قاراۋسىز جۇرگەن مال سەمەي – وسكەمەن جانە ومبى – مايقاپشاعاي باعىتتارىنداعى قوزعالىسى كوپ جولداردا ءجيى كەزدەسەتىنى بايقالدى. درونداردى قولدانۋ بۇل قاۋىپ-قاتەردى ايتارلىقتاي تومەندەتىپ, وڭىردەگى جول قاۋىپسىزدىگى دەڭگەيىن جاقسارتۋعا مۇمكىندىك بەرمەك.
ستاتيستيكا دا بۇل جۇمىستىڭ تيىمدىلىگىن راستاپ وتىر. ماسەلەن, جىل باسىنان بەرى پوليتسيا قىزمەتكەرلەرى مالدىڭ قاراۋسىز جايىلۋىنا قاتىستى 2 284 قۇقىق بۇزۋشىلىقتى انىقتاعان. ارنايى ايىپ تۇراقتارىنا 9 729 باس مال جەتكىزىلىپ, ولاردىڭ يەلەرى «اكىمشىلىك قۇقىق بۇزۋشىلىق تۋرالى» كودەكستىڭ 408-بابىمەن جاۋاپكەرشىلىككە تارتىلعان.
ارينە, بۇل دا – وڭاي شارۋا ەمەس. اياقتى ماق ۇلىق قاۋىپ-قاتەر دەگەندى قايدان ۇقسىن, وت قۋالاپ جايىلا بەرەدى. ول ءۇشىن مال يەسى ايىپپۇل ارقالاۋى دا – داۋ تۋدىرماي تۇرمايتىن جايت. وسى رەتتە جاڭا تەحنولوگيانىڭ مۇمكىندىگىن ءتيىمدى پايداعا اسىرۋ قاي تاراپقا دا قۇبا-قۇپ ءىس بولىپ وتىر.
«سونىمەن قاتار اۋىل شارۋاشىلىعى جانۋارلارىن سايكەستەندىرۋ تالاپتارىنىڭ بۇزىلۋىنا قاتىستى 201 دەرەك تىركەلىپ, ماتەريالدار ۆەتەرينارلىق ينسپەكتسياعا جولداندى. زاماناۋي تەحنولوگيالاردى پروفيلاكتيكالىق ءىس-قيمىلدارمەن ۇشتاستىرۋ پوليتسياعا وقىس وقيعالاردىڭ الدىن الۋعا عانا ەمەس, مال يەلەرىنىڭ جاۋاپكەرشىلىك مادەنيەتىن ارتتىرۋعا دا مۇمكىندىك بەرەدى. وسىنداي كەشەندى ءتاسىل اباي وبلىسىنىڭ جولدارىن اناعۇرلىم قاۋىپسىز ەتۋگە ءوز ۇلەسىن قوسىپ جاتىر», دەيدى وبلىستىق پوليتسيا دەپارتامەنتىنىڭ ءباسپاسوز قىزمەتى.
اباي وبلىسى
