بۇل – حالقىمىز ءۇشىن جاۋاپتى كەزەڭ

ەلىمىزدە بولىپ جاتقان ساياسي-ەكونو­ميكالىق جاعدايدى, بىزدەر, ونەر ادامدارى دا ۇنەمى نازاردا ۇستاپ وتىرامىز. وسى كۇندەرى ەل قۇلاعىن ەلەڭ ەتكىزگەن قازاقستان حالقى اسسامبلەياسى وكىلدەرىنىڭ پرەزيدەنتتىك سايلاۋدى مەرزى­مى­نەن بۇرىن وتكىزۋ تۋرالى ۇسى­نىسىن مەن دە شىن كوڭىلمەن قول­دايمىن. وسى ۇسىنىستىڭ ءوزى حال­قىمىزدىڭ, ەلىمىزدىڭ بولا­شاعىنا نەمقۇرايلى قاراي الماي­تىندىعىنىڭ كۋاسى, ەلباسىنىڭ جۇرگىزىپ وتىرعان سارابدال ساياسا­تىنا كورسەتىلگەن سەنىم دەپ بىلە­مىن. قازاقستانداعى سان الۋان ۇلت پەن ۇلىستاردىڭ مادەني-رۋحاني دامۋىنا جاعداي جاسالىپ, قازاق حالقىمەن بىرلىك پەن تاتۋلىقتا ءبىر تۋعانداي ءومىر ءسۇرۋىنىڭ ءوزى ۇلكەن اقىل-پاراساتتىلىقتىڭ ناتيجەسى. بۇگىندە ەگەمەندى ەلىمىزدى بۇكىل الەم مويىنداپ وتىر. ەلباسىنىڭ كەمەڭگەرلىگى مەن ەرىك-جىگەرىنىڭ ناتيجەسىندە ەلىمىز تالاي قيىن كەزەڭدەردەن ءوتىپ, دامىعان, ىرگەسى بەرىك, بەدەلدى مەملەكەتكە اينالدى. وسى جولدا ونەر ادامدارىنىڭ وزدەرى دە الەمگە تانىلىپ, قازاقستاندى دا تانىتۋى – پرەزيدەنتىمىزدىڭ مادەنيەت پەن ونەرگە دەگەن ەرەكشە كوزقاراسى مەن قامقورلىعىنىڭ ارقاسى. ەلوردادا اشىلعان, تمد ەلدەرى اراسىندا تەڭدەسى جوق «استانا وپەرا» تەاترى سونداي قامقورلىقتىڭ ءبىر ەرەكشە كورىنىسى دەپ ويلايمىن. وسى تەاتردىڭ جۇمىسىن ۇيىمداستىرۋ بارىسىندا جاس مامانداردى تارتىپ, ولاردىڭ بىلىكتىلىگىن كوتەرۋدىڭ دۇنيە ءجۇزىنىڭ تانىمال ونەر ۇجىمدارىمەن شىعارماشىلىق بايلانىس ورناتۋ ارقىلى جۇرگىزىلۋىنە شىن جۇرەكتەن قۋانامىن. سونداي-اق, جاستاردى قوعامنىڭ وركەن­دەپ دامۋىنا ارالاستىرىپ, بالالارىمىزدى الەمنىڭ تانىمال ءبىلىم وردالارىنان وقىتىپ جاتقانىمىزدىڭ ءوزى – ەل بولاشاعىنىڭ كەپىلى. پرەزيدەنتتىك سايلاۋدى مەرزىمىنەن بۇ­رىن وتكىزۋ قازىرگى الەمدى جايلاعان ەكو­نو­ميكالىق داعدارىس كەزىندە ەلىمىزدىڭ قي­­نالماۋىنىڭ, حالىققا اۋىرت­پاشىلىق تۇسىرمەۋدىڭ كەپىلى دەپ بىلەمىن. بۇل – حال­قىمىز ءۇشىن جا­ۋاپتى كەزەڭ. سوندىقتان دا, مەن قازاقستان­نىڭ جارقىن دا باقىتتى بو­لاشاعىنا دەگەن سەنىم­دى تەك قانا ەل­با­سى نۇرسۇلتان نازارباەۆ­تىڭ اتىمەن بايلانىستىرامىن. بيبىگۇل تولەگەنوۆا, كسرو حالىق ءارتىسى, كسرو جانە قر مەملەكەتتىك سىيلىقتارىنىڭ لاۋرەاتى, سوتسياليستىك ەڭبەك ەرى.