ۇلتتىق بانكتىڭ مالىمەتىنشە, 2025 جىلعى قازان ايىندا ەل بانكتەرىندەگى دەپوزيتتەر كولەمى 26,7 ترلن تەڭگەگە جەتكەن. بۇل وتكەن جىلمەن سالىستىرعاندا 17,6 پايىزعا كوپ.
دەپوزيتتەردىڭ باسىم بولىگى – 20,6 ترلن تەڭگە (77,42 پايىز) ۇلتتىق ۆاليۋتادا ساقتالۋدا. قالعان 6 ترلن تەڭگە (22,58 پايىز) شەتەل ۆاليۋتاسىنداعى سالىمدار. ءبىر اي ىشىندە تەڭگەدەگى دەپوزيتتەر شامامەن 1 پايىزعا, ۆاليۋتالىق سالىمدار 1,4 پايىزعا وسكەن.
قازىرگى كەزدە جيناق دەپوزيتتەردە 3,9 ترلن تەڭگە, مەرزىمدى جانە مەرزىمسىز دەپوزيتتەردە 19,3 ترلن تەڭگە, شارتتى سالىمداردا 6,3 ملرد تەڭگە ساقتالىپ وتىر. سونداي-اق 3,5 ترلن تەڭگەگە جۋىق قاراجات تالاپ ەتىلگەنگە دەيىنگى جانە اعىمداعى شوتتاردا, ياعني حالىقتىڭ بانك كارتالارىندا تۇر.
2025 جىلعى 1 قاراشاداعى جاعداي بويىنشا دەپوزيتتەر قۇرىلىمى:
– تەڭگەدە: 20,6 ترلن تەڭگە
– شەتەل ۆاليۋتاسىندا: 6,1 ترلن تەڭگە
– جالپى: 26,7 ترلن تەڭگە
سالىمداردىڭ ارتۋىنا بايلانىستى بانكتەر دەپوزيتتىك ونىمدەر بويىنشا تالاپتارىن دا بىرتىندەپ جاقسارتىپ كەلەدى. ماسەلەن, ۇلتتىق بانك دەرەكتەرىنە سۇيەنسەك, وتكەن جىلى قازان ايىندا اشىلعان دەپوزيتتەردىڭ ورتاشا نارىقتىق مولشەرلەمەسى 13,1 پايىز بولسا, بيىل بۇل كورسەتكىش 14,6 پايىزعا دەيىن وسكەن.
بۇل وسىمگە ەلدەگى اقشا-نەسيە ساياساتىنىڭ قاتايۋى دا اسەر ەتتى. قازان ايىندا ۇلتتىق بانك بازالىق مولشەرلەمەنى 18 پايىزعا دەيىن كوتەرگەن ەدى. سونىڭ ناتيجەسىندە ەكىنشى دەڭگەيلى بانكتەر دە سالىمشىلاردى كوبىرەك تارتۋ ءۇشىن دەپوزيتتىك مولشەرلەمەلەرىن ارتتىردى.
