سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
كەزدەسۋدە مەملەكەت باسشىسى ۇيىمنىڭ قازاقستان شاحمات فەدەراتسيياسىنا, جاتتىقتىرۋشىلار مەن جاس سپورتشىلارعا كورسەتكەن قولداۋىن جوعارى باعالادى.
پرەزيدەنت ەلىمىزدە شاحمات سپورت ءتۇرى عانا ەمەس, زياتكەرلىك مادەنيەتتىڭ, تاربيە مەن ءبىلىمنىڭ ماڭىزدى بولىگى سانالاتىنىن اتاپ ءوتتى.
مەملەكەت باسشىسى بالالار مەن جاستار اراسىندا شاحماتقا قىزىعۋشىلىقتىڭ ارتىپ كەلە جاتقانىنا نازار اۋداردى. پرەزيدەنتتىڭ ايتۋىنشا, ءبىلىم بەرۋ جۇيەسىندە شاحمات ينفراقۇرىلىمىن دامىتۋعا جانە ىلگەرىلەتۋگە باسا ءمان بەرىلىپ وتىر.
اڭگىمەلەسۋ بارىسىندا ۇلتتىق فەدەراتسيانىڭ ۇيىممەن جان-جاقتى ىنتىماقتاستىقتى ودان ءارى كەڭەيتۋ, سونىڭ ىشىندە ءىرى حالىقارالىق جارىستار وتكىزۋ مەن بىرلەسكەن جوبالاردى ىسكە اسىرۋ ماسەلەلەرى پىسىقتالدى.
اركادي دۆوركوۆيچ قازاقستاندا قابىلدانعان شاحماتتى دامىتۋعا ارنالعان كەشەندى جوسپاردىڭ ماڭىزى تۋرالى ايتتى. اتالعان قۇجات مەملەكەت, بيزنەس جانە ۇلتتىق فەدەراتسيانىڭ بىرلەسىپ جۇمىس ىستەۋىنە جول اشادى. سونداي-اق بىلتىر قازاقستاندىق شاحماتشىلار FIDE اياسىندا وتكەن بارلىق جارىستان ەڭ كوپ مەدال جيناعانىنا نازار اۋداردى.
قاسىم-جومارت توقاەۆ حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچتى قازاقستانداعى شاحماتتى وركەندەتۋگە قوسقان ۇلەسى ءۇشىن ءىى دارەجەلى «دوستىق» وردەنىمەن ماراپاتتادى.
سونىمەن قاتار مەملەكەت باسشىسى الەم بىرىنشىلىكتەرىندە توپ جارعان جاس شاحماتشىلارمەن كەزدەستى. كەزدەسۋگە 8 جاسقا دەيىنگى ساناتتا الەم چەمپيوندارى اتانعان ءادينۇر ادىلبەك پەن اليشا بيساليەۆا, 12 جاسقا دەيىنگى ساناتتا الەم چەمپيونى بولعان دانيس قۋاندىق ۇلى, 14 جاسقا دەيىنگى ساناتتا الەم بىرىنشىلىگىندە جەڭىس تۇعىرىنان كورىنگەن مارك سميرنوۆ, 16 جاسقا دەيىنگى سانات بويىنشا الەم چەمپيوناتىندا التىننان القا تاققان ەدگار مامەدوۆ, 16 جاسقا دەيىنگى شاحماتشىلار اراسىندا الەم بىرىنشىلىگىنىڭ كۇمىس جۇلدەسىنە قول جەتكىزگەن ساۋات نۇرعاليەۆ قاتىستى.
مەملەكەت باسشىسىنىڭ ايتۋىنشا, جاس سپورتشىلاردىڭ جەتىستىكتەرى حالىقارالىق ارەنادا ەلىمىزدىڭ مەرەيىن ۇستەم ەتەدى ءارى ەلىمىزدە شاحماتتىڭ كەلەشەگى زور ەكەنىن كورسەتەدى. پرەزيدەنت چەمپيونداردىڭ بيىك ماقساتتارعا ۇمتىلۋى قاجەتتىگىن جەتكىزىپ, ولارعا جارقىن جەڭىستەر تىلەدى.
– شاحمات دەگەن ۇلكەن ونەر. سوندىقتان شاحماتپەن كۇندەلىكتى, مۇقيات, ارنايى كىتاپتاردى وقي وتىرىپ اينالىسۋ قاجەت. بۇگىن حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچپەن كەزدەسىپ وتىرسىزدار. بۇل – سىزدەردىڭ باقىتتى ساتتەرىڭىزدىڭ ءبىرى, – دەدى مەملەكەت باسشىسى.
كەزدەسۋ سوڭىندا قاسىم-جومارت توقاەۆ شاحمات تاقتاسىنا ەستەلىك جازبا قالدىردى.
