بۇرىنعى كەزەڭمەن سالىستىرعاندا, قازىر سايلانبالى جۇيەمەن اكىم بولىپ وتىرعانىمىزدىڭ ءوزى – حالىقتىڭ تالابىنا جاۋاپ بەرەتىن, حالىققا قۇلاق اساتىن مەملەكەت قۇرۋدىڭ ماڭىزدى قادامى.
بۇگىنگى فورۋمدا دا وسى باعىتتاعى ناقتى ساياساتتى جۇزەگە اسىرۋ جونىندە كۇردەلى ماسەلەلەر تالقىلاندى. سونىڭ ىشىندە ەرەكشە اتاپ وتەتىن جايت – پرەزيدەنتىمىزدىڭ باستاماسىمەن جۇرگىزىلىپ جاتقان «تازا قازاقستان» ەكولوگيالىق اكتسياسى. بۇل باستامانى بۇكىل ەل قولداپ جاتىر, ءبىز دە اۋىل تۇرعىندارىمەن بىرگە بەلسەنە اتسالىسىپ كەلەمىز. حالىقتىڭ بۇل ىسكە بەلسەندى ارالاسۋى ۇلكەن جەتىستىك دەپ ويلايمىن.
فورۋمدا باسقا دا اكىمدەر ءوز ويلارىمەن ءبولىسىپ, اۋىل اكىمدەرىنە موتيۆاتسيا بەرەتىن جاقسى ۇسىنىستار ايتتى. بۇل – ءبىز ءۇشىن ۇلكەن كورسەتكىش. بارلىعىمىزدىڭ ورتاق ماقساتىمىز – حالىقتىڭ تۇرمىسىن جاقسارتۋعا ۇلەس قوسۋ. مەملەكەت باسشىسىنىڭ «اۋىل اماناتى» باعدارلاماسى اياسىندا دا كوپتەگەن وتباسىنىڭ جاعدايى تۇزەلىپ كەلەدى. 2,5 پايىزدىق نەسيە ارقىلى اۋىل تۇرعىندارى ءوز كاسىبىن اشىپ, دامىتىپ جاتىر. بۇل كاسىپتىڭ وركەندەۋىنە عانا ەمەس, اۋىلدىڭ كىرىس كوزىن ۇلعايتۋعا دا زور سەرپىن بەرىپ وتىر.
سونىمەن قاتار فورۋمدا اۋىل اكىمدىكتەرىنىڭ كىرىس كوزىن كوبەيتۋ ماسەلەسى دە قوزعالدى. بۇعان دەيىن اۋداندىق نەمەسە وبلىستىق بيۋدجەتكە ءتۇسىپ كەلگەن كەيبىر كىرىستەردى اۋىل اكىمدىگىنىڭ قاراماعىنا بەرۋ جونىندە تاپسىرمالار بەرىلدى. بۇل قادام اۋىل اكىمدىكتەرىنىڭ وزدىگىنەن دامۋىنا ۇلكەن مۇمكىندىك تۋعىزباق.
اۋىل اكىمدەرىنىڭ سايلانبالى جۇيەسىنە كەلسەك, بۇل – وتە دۇرىس قادام دەپ سانايمىن. ءوزىم قورداي اۋىلدىق وكرۋگىنە ەكىنشى رەت سايلانىپ وتىرمىن. بۇرىن كەيبىر تۇرعىندار اۋىل اكىمىن مۇلدەم تانىمايتىن. ال قازىرگى جۇيە بويىنشا ءتۇرلى كانديداتتار شىعىپ, حالىق ولارمەن تانىسادى, ولاردىڭ باعدارلامالارىن زەردەلەيدى. كەيىن سول باعدارلامالاردىڭ ورىندالۋىن اۋىل تۇرعىندارىنىڭ وزدەرى باقىلاي الادى.
ادىلەت قاسپاقباەۆ,
قورداي اۋىلدىق وكرۋگىنىڭ اكىمى
جامبىل وبلىسى,
قورداي اۋدانى
