تۇركىستان وبلىسى اكىمدىگىنىڭ قولداۋىمەن, «Farab» عىلىمي امبەباپ كىتاپحاناسى, «مەدياكراتيا» قوعامدىق بىرلەستىگى جانە «مارحابات» جۋرنالىنىڭ ۇيىمداستىرۋىمەن وتكەن باسقوسۋعا قالامگەرلەر, قوعام قايراتكەرلەرى مەن جاستار, جازۋشىنىڭ جاقىن تۋىستارى قاتىستى. «ماقامى بولەك مارحابات» اتتى جيناققا ەنگىزىلگەن ەستەلىكتەر, عىلىمي ماقالالار مەن تولعانىستار كلاسسيك جازۋشىنىڭ شىعارماشىلىق ەرەكشەلىكتەرىمەن بىرگە ادامي بولمىسىن جان-جاقتى اشا تۇسكەن. قازاق ادەبيەتىندە وزىندىك ورنى بار كورنەكتى قالامگەر مارحابات بايعۇت وسىدان ءۇش جىل بۇرىن 26 قاراشادا ءپاني دۇنيەدەن وتكەن ەدى. جيىندا جازۋشىنىڭ اياۋلى جارى قىزداركۇل پەرنەبايقىزى, ءىنىسى نىشان بايعۇتوۆ, ۇلى نۇرلان جۇرەكجاردى لەبىزدەرىن ءبىلدىردى. قالامگەرلەر اتىنان سەيدوللا سادىقوۆ, اسحان مايلىباەۆا, روزا نارىمبەتوۆا ساعىنىشتى سىرعا تولى ەستەلىكتەر ايتتى. «Miras» قوعامدىق كەڭەسىنىڭ توراعاسى حاليما جانتورەقىزى, وسى كەڭەستىڭ مۇشەسى, ايگىلى ايتىسكەر اقىن, «التىن دومبىرا» يەگەرى بەكارىس شويبەكوۆ تە وقىرمانعا وي تاستار پىكىرلەرىن ورتاعا سالدى. وبلىستىق مادەنيەت باسقارماسىنىڭ باسشىسى ءازىمحان قويلىباەۆ جازۋشىنىڭ مۇراسىن دارىپتەۋدىڭ ماڭىزىنا توقتالدى. «مارحابات» جۋرنالىنىڭ باس رەداكتورى, رەسپۋبليكالىق جازبا اقىندار بايقاۋىندا توپ جارىپ جۇرگەن, بولاشاعىنان ۇلكەن ءۇمىت كۇتتىرەتىن جاس تالانتتى اقىن, مارحابات بايعۇت اتىنداعى سىيلىقتىڭ لاۋرەاتى سەزىم مەرگەنباي جازۋشىعا ارناعان جىرىن وقىدى.
تەك قازاق ەلى ەمەس, كۇللى تۇركى الەمىنە كەڭىنەن تانىلعان, مىقتىلىعى مويىندالعان كەمەڭگەر تۇلعانىڭ شىعارمالارى الەم ەلدەرى تىلىنە اۋدارىلعان. ءالى دە اۋدارىلا بەرمەك. ماسەلەن, الداعى اپتادا وزبەكستان استاناسى تاشكەنت قالاسىندا وزبەك تىلىندەگى اۋدارماسىنىڭ كەزەكتى تۇساۋكەسەرى بولادى. كەزەكتى دەپ وتىرعانىمىز مارحابات بايعۇتتىڭ تۋىندىلارى بۇعان دەيىن دە وزبەكشەگە اۋدارىلعان بولاتىن. جيىن بارىسىندا «مەدياكراتيا» قوعامدىق بىرلەستىگىنىڭ العىسحاتى «مارحابات بايعۇتتىڭ تۋعانىنا 80 جىل» جوباسى اياسىنداعى بىرقاتار ءىس-شارانىڭ جوعارى دەڭگەيدە وتۋىنە اتسالىسقان «Farab» عىلىمي امبەباپ كىتاپحاناسىنىڭ ديرەكتورى جانات شارداربەكوۆاعا تاپسىرىلدى.
ايتا كەتەلىك, «مارحابات بايعۇتتىڭ تۋعانىنا 80 جىل» جوباسى اياسىنداعى مازمۇندى ءارى ماعىنالى ءىس-شارالار جىل بويى اتقارىلدى. اۋەلى «مارحابات» جۋرنالىنىڭ اقپارات ايدىنىنا جەلكەن كەرىپ شىعۋىنا بايلانىستى قاڭتار ايىندا شىمكەنتتەگى ءال-فارابي اتىنداعى كىتاپحانادا زيالى قاۋىمعا تانىستىرىلدى. كوكتەمدە «ماقامى بولەك مارحابات» اتتى حالىقارالىق سيمپوزيۋم ءوتتى. تۇركيا, وزبەكستان, قىرعىزستاننان جانە قازاقستان جازۋشىلار وداعىنىڭ باسشىلىق قۇرامى, ايتۋلى قالامگەرلەر, مەملەكەت جانە قوعام قايراتكەرلەرى, پارلامەنت دەپۋتاتتارى, اقپارات قۇرالدارىنىڭ جەتەكشىلەرى, عالىمدار, ادەبيەت سىنشىلارى قاتىسقان القالى جيىن تۇڭلىگى الدىمەن تۇركىستاندا ءتۇرىلدى. ەرتەڭىنە شىمكەنتتە حالىقارالىق جيىن جالعاسىن تاپتى. ءۇشىنشى كۇنى اۋقىمدى ءىس-شارا جازۋشىنىڭ تۋعان جەرى – تۇلكىباس اۋدانىندا «تاۋپىستەلى تاعلىمى» فورۋمىنىڭ ءتورتىنشى مارتە ۇيىمداستىرىلۋىنا ۇلاستى. وبلىس كولەمىندە «مارحابات وقۋلارى» شىعارماشىلىق بايقاۋى بىرنەشە ايعا سوزىلىپ, وتە تارتىستى ءوتتى. وعان 720 تالاپكەردىڭ قاتىسۋى ءبىراز جايتتى اڭعارتادى. ال كلاسسيكتىڭ پۋبليتسيستيكاسى مەن پروزاسىن تالداپ, تارازىلاعان جاستار, ستۋدەنتتەر اراسىنداعى بايقاۋدا ەلىمىزدىڭ 7 وڭىرىنەن ۇمىتكەرلەر باق سىنادى. بايقاۋلاردىڭ جۇلدەگەرلەرى سيمپوزيۋمدا ماراپاتتالدى. جازۋشى نۇرعالي ورازدىڭ مارحابات بايعۇت ءومىرىن ورنەكتەگەن دراماتۋرگيالىق شىعارماسىنىڭ ءۇزىندىسى سول حالىقارالىق سيمپوزيۋمدا قويىلدى. كەلەر جىلى تۇركىستانداعى تەاتردا تولىق نۇسقاسى ساحنالانىپ, قالىڭ كورەرمەنگە ۇسىنىلماق.
مارحابات بايعۇتتىڭ 80 جىلدىق مەرەيتويىنا وراي وتكىزىلگەن ءىس-شارالاردىڭ قورىتىندىسى ىسپەتتى وتكەن بۇل جيىندا جازۋشى ەڭبەگىن دارىپتەۋ, جان-جاقتى ناسيحاتتاۋ الداعى ۋاقىتتا دا تۇراقتى تۇردە جالعاساتىنى ايتىلدى. اسىرەسە وڭتۇستىكتە مارحابات بايعۇت اتىنداعى ادەبيەتشىلەر ءۇيىن اشۋ – كوپتىڭ قالاۋى. قاراپايىم وقىرماننان باستاپ ەلىمىزدەگى, تۇركى دۇنيەسىندەگى جازۋشىلار وداعى باسشىلىعى, قالام ۇستاعان قاۋىم وسى ورىندى ۇسىنىستى ءبىراۋىزدان قولداپ وتىر.
تۇركىستان وبلىسى
