قازاقستان مەديتسينالىق ءتۋريزمنىڭ دامۋ قارقىنى بويىنشا ورتا ازيادا كوشباسشى سانالادى. بۇنى ءبىز ەمەس, قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتس ايتتى. ناقتى سانعا توقتالساق, بۇگىنگە دەيىن 80 مىڭعا جۋىق شەتەل ازاماتى ءبىزدىڭ ەلدە ەمدەلگەن. ونىڭ ىشىندە ەۋروپادان كەلەتىندەر كەيىنگى 5 جىلدىڭ شاماسىندا كوبەيگەن. دەمەك, ەلدەگى مەديتسينالىق كومەكتىڭ باعاسى مەن ساپاسى شەتەلدىكتەردىڭ دە كوڭىلىنەن شىعىپ جاتىر دەگەن ءسوز. كورمە اياسىندا وتكەن كونفەرەنتسيادا مەديتسينالىق ءتۋريزمدى دامىتۋعا مۇددەلى تاراپتار باس قوستى.
كورمەنىڭ اشىلۋىندا دەنساۋلىق ساقتاۋ ۆيتسە-ءمينيسترى ءاليا رۇستەموۆا مەديتسينالىق ءتۋريزمنىڭ ەل مەديتسيناسىنداعى ورنى تۋرالى ايتتى.
«مەملەكەت باسشىسى جولداۋدا ءتۋريزمدى كەشەندى دامىتۋعا باسىمدىق بەرۋ كەرەگىن العا تارتتى. بۇل رەتتە مەديتسينالىق ءتۋريزمدى دە دامىتۋعا جاڭا كوزقاراس قاجەت ەكەنىن ايتقىم كەلەدى. ەلىمىزدە قازىر حالىقارالىق JCI اككرەديتاتسياسى بار 8 جەتەكشى كلينيكا جۇمىس ىستەيدى. ولار شەتەلدىك ەمدەلۋشىلەرگە مەديتسينالىق كومەك ۇسىنادى. ونىڭ ىشىندە كارديوحيرۋرگيا, ترانسپلانتولوگيا, ونكولوگيا, نەيروحيرۋرگيا جانە باسقالارى بار. قاراشادا ۇلتتىق عىلىمي ونكولوگيا ورتالىعىندا پروتوندى تەراپيا ءبولىمى اشىلدى. مۇنداي ءبولىم بىزدە عانا ەمەس, ورتالىق ازيادا جالعىز. مەديتسينالىق كومەك ساپاسىن ارتتىرۋ ماقساتىندا ناۋقاستارعا جايلى جاعداي جاساۋعا مىقتاپ كوڭىل ءبولىنىپ جاتىر. تسيفرلىق شەشىمدەرگە, يننوۆتسيالىق تەحنولوگيالارعا باسىمدىق بەرىلىپ كەلەدى. مۇنىڭ بارلىعى مەديتسينالىق ءتۋريزمنىڭ الەۋەتىن ارتتىرۋعا سەپتەسەدى».
ءىس-شارانىڭ وتۋىنە ۇيىتقى بولعان قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتس باستاعان ۇجىم قوناقتارعا تابىس تىلەپ, ءتۋريزمنىڭ وسى باعىتىن بىرگە دامىتۋعا شاقىردى.
«كورمەگە 16 ەلدەن مەديتسينالىق تۋريزم باعىتىندا وزىندىك ورنى بار ۇجىمدار كەلدى. ولاردىڭ تاجىريبەسى, تىڭ ىزدەنىستەرى ءبىزدىڭ مەديتسيناعا دا قاجەت. كونفەرەنتسيادا مەديتسيناداعى يننوۆاتسيالىق شەشىمدەر, مەديتسيناداعى IT باعىتتار دا قامتىلادى. بايقاعانىمىز, قازىر بىزگە شەتەلدىك تۋريستەر كارديوحيرۋرگيا, نەيروحيرۋرگيا جانە رەپرودۋكتيۆتى مەديتسينا ءۇشىن كوبىرەك كەلەدى. ولاردى قىزىقتىراتىنى بىزدەگى باعا مەن ساپا. كورمەگە 40-تان استام ساراپشى كەلىپ وتىر. ونكولوگيا, نەيروحيرۋرگيا, رەپرودۋكتيۆتى مەديتسينا, ستوموتولوگيا تاعىسىن-تاعى سالالار بويىنشا ساراپشىلار بار. ولار كورمە اياسىندا ازاماتتارعا تەگىن كەڭەس بەرەدى. سول سەكىلدى دارىگەرلەر ءۇشىن شەبەرلىك ساعاتى, دوڭگەلەك ۇستەل وتەدى», دەيدى كريستينا كريۆەتس.
تۋريزم جانە سپورت مينيسترلىگى تۋريزم يندۋسترياسى كوميتەتى توراعاسىنىڭ ورىنباسارى ايدىن قاپاشەۆتىڭ ايتۋىنشا, بۇگىندە الەمدىك مەديتسينالىق تۋريزم نارىعىنىڭ كولەمى شامامەن 85 ملرد دوللاردى قۇرايدى. ال 2029 جىلعا قاراي بۇل كورسەتكىش 230 ملرد دوللاردان اسۋى ابدەن مۇمكىن. سالاداعى سەرپىلىس ەلىمىزدە 2022 جىلدان بەرى ەسەلەنىپ وسكەنى بايقالادى.
«مىسالى, استانادا شەتەلدىك ەمدەلۋشىلەر سانى 2022 جىلى 561 بولسا, 2024 جىلى 4 500-گە جەتكەن. بۇل ەل مەديتسيناسىنىڭ ساپاسىنا سەنىمدىلىكتى كورسەتەدى. سالا ماماندارى وسى باعىتتا كۇش بىرىكتىرۋگە دايىن ەكەنىن اڭعارتىپ وتىر. تۋريزم جانە سپورت مينيسترلىگى مەن دەنساۋلىق ساقتاۋ مينيسترلىگى ەكىجاقتى ىنتىماقتاستىق تۋرالى كەلىسىمشارتقا قول قويدى. بۇل قۇجات مەديتسينالىق ءتۋريزمدى دامىتۋدا كۇش بىرىكتىرۋگە جانە ەلدىڭ حالىقارالىق تارتىمدىلىعىن ارتتىرۋعا باعىتتالعان قادام», دەيدى ايدىن قاپاشەۆ.
قورىتا كەلە, كورمە اياسىندا جەتەكشى ساراپشىلار, مەديتسينالىق ۇيىمداردىڭ وكىلدەرى, زەرتتەۋ ينستيتۋتتارىنان بولەك, الەمنىڭ تۇكپىر-تۇكپىرىنەن تۋريستىك كومپانيالار باس قوسقانىن ايتا كەتكەنىمىز دۇرىس بولار. وسىعان قوسا, استاناعا يزرايل, گەرمانيا, كيپر مەن تۇركيادان بىلىكتى دارىگەرلەر ارنايى كەلدى. قوناقتار ەكى كۇن بويى يننوۆاتسيالىق تەحنولوگيالارىن تانىستىرىپ, مەديتسينالىق ءتۋريزمدى دامىتۋعا قاتىستى ساۋالداردى سارالايدى.
