سۋرەت: primeminister.kz
ەۋروپالىق وداقتىڭ ۇيىمداستىرۋىمەن وتكەن ءىس-شاراعا ەۋروپالىق كوميسسارلار, وزبەكستان, تاجىكستان مەن قىرعىزستان ۇكىمەتتەرى باسشىلارىنىڭ ورىنباسارلارى, تۇرىكمەنستان قارجى جانە ەكونوميكا مينيسترلىگىنىڭ باسشىلىعى قاتىستى.
«ەۋروپالىق وداق – ورتالىق ازيا» ەكونوميكالىق فورۋمى – ەۋرووداق پەن ورتالىق ازيا ەلدەرى اراسىنداعى ەكونوميكالىق ءوزارا ءىس-قيمىل, ساۋدا, ينۆەستيتسيالار مەن تۇراقتى دامۋ ماسەلەلەرىن تالقىلاۋ جونىندە ماڭىزدى الاڭ. فورۋم اياسىندا ەكونوميكالىق بايلانىستاردى كەڭەيتۋ, كولىك پەن ەنەرگەتيكالىق بايلانىستى دامىتۋ, ورنىقتى جەتكىزۋ تىزبەكتەرىن نىعايتۋ, سونداي-اق تسيفرلاندىرۋ ۇدەرىستەرىن ىلگەرىلەتۋ ماسەلەلەرى تالقىلاندى.
پلەنارلىق وتىرىستا سويلەگەن سوزىندە عالىمجان قويشىباەۆ قازاقستان مەن ەۋروپالىق وداق ەكونوميكالىق بايلانىستاردى كەڭەيتۋ بويىنشا تۇراقتى سەرپىندى ساقتاپ وتىرعانىن ايتتى. ول پرەزيدەنت قاسىم-جومارت توقاەۆتىڭ ەو-مەن كوپجاقتى ىنتىماقتاستىقتى ودان ءارى نىعايتۋعا ەرەكشە ءمان بەرەتىنىن ءارى ورتالىق ازيا ەلدەرى مەن ەۋروپالىق وداق اراسىنداعى كونسترۋكتيۆتى ديالوگتى جوعارى باعالايتىنىن اتاپ ءوتتى.
ەل دەلەگاتسياسىنىڭ باسشىسى وڭىردەگى جان-جاقتى ەكونوميكالىق كووپەراتسيانى دامىتۋدىڭ, ينۆەستيتسيالىق ىنتىماقتاستىقتى تەرەڭدەتۋدىڭ ماڭىزدىلىعىنا نازار اۋدارىپ, ۇلتتىق ەكونوميكانىڭ قۇرىلىمدىق ترانسفورماتسياسىنا باعىتتالعان رەفورمالار تۋرالى باياندادى.
عالىمجان قويشىباەۆ ەل ۇكىمەتىنىڭ ورتالىق ازيا ەلدەرى مەن ەۋروپالىق وداقپەن ۇزاقمەرزىمدى سەرىكتەستىك قۇرۋعا, ورنىقتى ورتاق دامۋدى قامتاماسىز ەتۋگە دايىن ەكەنىن مالىمدەدى.
فورۋم اياسىندا حالىقارالىق سەرىكتەستىك جونىندەگى ەۋروپالىق كوميسسار يوزەف سيكەلامەن جۇمىس كەزدەسۋى ءوتتى. كەزدەسۋ بارىسىندا تاراپتار قازاقستان مەن ەو اراسىنداعى قاتىناستاردىڭ ستراتەگيالىق سيپاتىنا نازار اۋدارىپ, ەكونوميكا سالاسىنداعى باسىم باعىتتار بويىنشا بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
ترانسكاسپي حالىقارالىق كولىك باعىتىن دامىتۋ مەن ەو-نىڭ «Global Gateway» باستاماسى اياسىنداعى پراكتيكالىق ىنتىماقتاستىقتى نىعايتۋعا ەرەكشە كوڭىل ءبولدى. اتالعان باستاما قازاقستان مەن بۇكىل ءوڭىردىڭ ترانزيتتىك الەۋەتىن ارتتىرۋعا قوسىمشا مۇمكىندىكتەر اشادى.
كەزدەسۋ قورىتىندىسىندا تاراپتار ستراتەگيالىق ىنتىماقتاستىقتى تەرەڭدەتۋگە, ورنىقتى ەكونوميكالىق بايلانىستاردى دامىتۋ مەن جاڭا ينۆەستيتسيالىق ءارى ينفراقۇرىلىمدىق جوبالاردى بىرلەسىپ جۇزەگە اسىرۋعا كەلىستى.
