كورشى ەل دەلەگاتسياسى اۋەزوۆ اۋدانىنداعى كوميۋنيتي ورتالىعىنىڭ جۇمىس تاجىريبەسىمەن تانىستى. مەيمانداردى ورتالىق قىزمەتكەرلەرىمەن بىرگە قارسى العان مادەنيەت جانە اقپارات ۆيتسە-ءمينيسترى قانات ىسقاقوۆ كورشى ەلمەن بايلانىستىڭ ءمانى تەرەڭدە ەكەنىنە توقتالدى. ول ەكى ەل اراسىندا تەك مادەني, رۋحاني ارىپتەستىك قانا ەمەس, وسىنداي تاجىريبە الماسۋلار دا بولعانى ماڭىزدى ەكەنىن ايتتى.
قىرعىز دەلەگاتسياسى ەلىمىزدە بولىپ جاتقان رەفورمالار مەن وزگەرىستەرگە ءاردايىم تىلەكتەستىك بىلدىرەتىنىن ءارى ماڭىزدى شەشىم قابىلدار كەزدە وزدەرى دە سول تاجىريبەگە سۇيەنەتىنىن جەتكىزدى.
«قازاق-قىرعىز ەجەلدەن تامىرى مەن تاريحى ەگىز حالىق بولعاندىقتان, ءبىز ەڭ الدىمەن قاي سالادا دا قازاقستاننىڭ تاجىريبەسىن العا ۇستايمىز. قۇرامىندا پرەزيدەنت اكىمشىلىگى, مينيسترلەر كابينەتىنىڭ وكىلدەرى بار ءبىزدىڭ دەلەگاتسيا الماتىداعى حالىققا قىزمەت كورسەتۋ نىساندارىن ارالاي وتىرىپ, تاجىريبەلەرىڭىزگە ءتانتى بولدىق. اشىعىن ايتقاندا, دەنساۋلىق ساقتاۋ, ءبىلىم بەرۋ, يننوۆاتسيا, تسيفرلاندىرۋ سەكىلدى نەگىزگى سالالاردىڭ بارىندە قازاقستاننىڭ ۇلگىسىنەن ۇيرەنەرىمىز مول. جاڭا تەحنولوگيا داۋىرىندە زاماناۋي مۇمكىندىكتەردى كەڭىنەن پايدالانۋ – ەل ءومىرىن جاقسارتۋداعى باسىم باعىتتاردىڭ ءبىرى», دەدى ەديل بايسالوۆ.
«جاستار» عىلىمي-زەرتتەۋ ورتالىعىنىڭ ديرەكتورى گ ۇلىسحان ناحباەۆانىڭ ايتۋىنشا, جىلىنا 800 مىڭنان استام جاسقا قىزمەت كورسەتۋدى ماقسات تۇتقان الاڭ شىعارماشىلىق باستامالاردى دامىتۋ مەن يدەيا الماسۋدى كوزدەيدى. اتالعان الاڭداردىڭ نەگىزگى ماقساتى – جۇمىسسىز جۇرگەن NEET ساناتىنداعى جاستارعا قولداۋ ءبىلدىرۋ جانە وسكەلەڭ ۇرپاقتى مەكتەپ باعدارلاماسىنان بولەك, قوسىمشا داعدىلاردى مەڭگەرۋگە باۋلۋ. «قازاق-قىرعىز جاستارىنىڭ ءارتۇرلى پلاتفورمالاردا باس قوسىپ تۇرۋى قالىپتى قۇبىلىسقا اينالعان. بۇل كەزدەسۋ ءبىزدىڭ جاستارىمىز اراسىنداعى بايلانىستىڭ جاڭا دەڭگەيىنىڭ كورسەتكىشى» دەيدى ول.
سونىمەن قاتار قوناقتار الماتىدا ەڭبەك موبيلدىلىگى ورتالىعىنا باس سۇعىپ, الەۋمەتتىك-ەڭبەك سالاسىنداعى قىزمەت تۇرلەرى شوعىرلانعان ۇجىمنىڭ تىنىس-تىرشىلىگىمەن دە تانىستى. دەلەگاتسيانى ەڭبەك جانە الەۋمەتتىك قورعاۋ ءمينيسترى سۆەتلانا جاقىپوۆا قارسى الىپ, ەلىمىزدىڭ الەۋمەتتىك تسيفرلاندىرۋ سالاسىنداعى تىڭ جاڭالىقتار تۋرالى باياندادى.
ورتالىق بارلىق ەڭبەككە قابىلەتتى ساناتتارعا قىزمەت كورسەتەدى. مۇندا مەملەكەتتىك قىزمەت تۇتاستاي اۆتوماتتاندىرىلعان. مامانداردىڭ ايتۋىنشا, ازاماتتار قىزمەتتەردى ەلەكتروندىق ەڭبەك بيرجاسى ارقىلى الىپ, وتىنىمدەر قالدىرا الادى. مينيستر, قىرعىز ەلىنەن كەلگەن ارىپتەستەرىنە ەل تۇرعىندارىنا قاتىستى بارلىق مالىمەتتەر تىزبەگى شوعىرلانعان ەلەكتروندى الاڭنىڭ جۇمىسى تۋرالى ايتىپ, جىل وتكەن سايىن جۇيە جەتىلدىرىلىپ وتىرعانىن جەتكىزدى. قىرعىز ەلىنەن كەلگەن دەلەگاتسيا نەگىزگى سالالاردى تسيفرلاندىرۋ باعىتىندا ەلىمىزدىڭ تاجىريبەسىن جوعارى باعالادى. سونداي-اق تاراپتار ەكى ەل اراسىنداعى جان-جاقتى ارىپتەستىك, اسىرەسە تسيفرلاندىرۋ الەۋمەتتىك قامسىزداندىرۋ, ەكونوميكا جانە ءبىلىم سالالارىندا ايتارلىقتاي قارقىن الا باستاعانىنا توقتالدى.
مەملەكەتتىك قىزمەتتەردى تسيفرلاندىرۋ بويىنشا ەلىمىزدىڭ eGov تاجىريبەسى قىرعىزستانعا ۇلگى رەتىندە ۇسىنىلىپ, بىرقاتار بىرلەسكەن جوبالار ىسكە اسىپ كەلەدى. سول سەكىلدى زەينەتاقى جۇيەسى, الەۋمەتتىك تولەمدەر, حالىقتى تىركەۋ جانە اتاۋلى كومەك كورسەتۋ پروتسەستەرى بويىنشا تاجىريبە الماسۋ باعىتىندا بىرلەسكەن باستامالار وڭ ناتيجەسىن بەرىپ وتىر.
گۇلبارشىن ايتجانبايقىزى,
ارمان وكتيابر,
«Egemen Qazaqstan»
الماتى
