جاننا كەنجينا قازىنالى قاراشىعاناعىمەن ايگىلى ءبورلى اۋدانىنىڭ ورتالىعى اقساي قالاسىندا تۋىپ-وسكەن. اتا-اناسى قاراپايىم جۇمىسشى بولدى. ەڭبەك جولىن تەمىرجول ستانساسىندا پويىز ديسپەتچەرى بولىپ باستاعان جاننا ەس بىلگەلى ەڭبەكپەن شىڭدالعان جان. 2004 جىلدان كاسىبىن ۇزدىكسىز دامىتىپ, 2008 جىلى «دسك پريوريتەت» اتتى جشس قۇردى.
– ءبىز زاماناۋي ستاندارتقا ساي قاۋىپسىز, ۇيىمداسقان ەڭبەك ورتاسىن قۇرا بىلدىك. سونداي-اق قىزمەتكەرلەردى وقىتۋ مەن كاسىبي دامۋعا ەرەكشە ءمان بەرىپ كەلەمىز. جۇمىسىن جاڭا باستاعان مەكەمە سەنىمگە يە بولىپ, تولىققاندى تاپسىرىس الۋعا ءبىراز ۋاقىت كەرەك. العاشقى كەزدە ءتۇرلى مەكەمە اۋلاسىنداعى ىشكى جولداردى جاساپ جۇردىك. كەيىن «سامال» شاعىن اۋدانىنا بارار جولدى, اسان اۋىلى مەن جۇلدىز شاعىن اۋدانىنا دەيىنگى تاۋەلسىزدىك كوشەسىنە توسەپ شىقتىق. ۇلكەن جاۋاپكەرشىلىكپەن اتقارىلعاندىقتان بولار, ءبىر قابات قانا اسفالت توسەلگەن سول كوشەلەرگە ءالى ەشقانداي سىزات تۇسكەن جوق. 2011 جىلى ورال قالاسىنىڭ كوپ بولىگىن سۋ باسقاندا قازىلىپ قالعان بولىكتەرى بولماسا, جاقسى ساقتالدى, – دەيدى كومپانيا باسشىسى.
سودان بەرى قيىندىعى مول, سىناعى كوپ جيىرما جىلعا جۋىق ۋاقىت ءوتىپتى. «دسك پريوريتەت» باتىس قازاقستان وبلىسىندا جول سالاتىن ءىرى كومپانيالاردىڭ بىرىنە اينالدى. بۇگىنگە دەيىن كومپانيا جالپى ۇزىندىعى 1000 شاقىرىمنان استام رەسپۋبليكالىق, وبلىستىق, اۋىلدىق ماڭىزى بار اۆتوكولىك جولدارىن كۇردەلى جوندەپ, سالىپ شىققان. وڭىردەگى ينفراقۇرىلىمدى دامىتۋعا باعىتتالعان مەملەكەتتىك باعدارلامالاردى ىسكە اسىرۋعا, سونداي-اق رەسپۋبليكالىق, وبلىستىق, قالاىشىلىك ماڭىزى بار اۆتوكولىك جولدارىن سالۋ, جوندەۋ جۇمىسىنا بەلسەنە قاتىساتىن كومپانيا كاسىبي بىلىكتىلىگىنىڭ ارقاسىندا جول قۇرىلىسى سالاسىندا تۇراقتى ءارى جاۋاپتى مەردىگەر رەتىندە تانىلدى.
كومپانيا جولدار مەن اۆتوماگيسترالدار سالىپ قانا قويماي, جول-قۇرىلىس ماتەريالدارىن وندىرەدى. جول قۇرىلىسى سالاسىندا زەرتحانالىق سىناقتار جۇرگىزۋ, ارنايى جول-قۇرىلىس تەحنيكاسىمەن قامتاماسىز ەتۋ سەكىلدى قىزمەتتەردى دە قوسا الىپ جۇرگەن ۇلكەن ۇجىمنىڭ كولىك پاركىندە قازىر جول قۇرىلىسى جۇمىسىنا ارنالعان 100-دەن استام ارنايى تەحنيكا بار. ۇيىم وندىرىستىك قاجەتتىلىككە سايكەس تەحنيكالىق پاركتى جىل سايىن جاڭارتىپ, تولىقتىرىپ وتىرادى.
كومپانيا وسى كەزگە دەيىن «قازاۆتوجول» ۇلتتىق كومپانياسىنىڭ, «Karachaganak Petroleum Operating B.V.» اليانسىنىڭ, باتىس قازاقستان وبلىسى جولاۋشىلار كولىگى مەن اۆتوموبيل جولدارى باسقارماسىنىڭ, ورال قالاسى, بايتەرەك, ءبورلى, تەرەكتى, تاسقالا اۋداندارى تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى بولىمدەرىنىڭ تاپسىرىسىن ورىنداپ, رەسپۋبليكالىق ماڭىزى بار «پودستەپنوە – فەدوروۆكا – رەسەي شەكاراسى» اۆتوموبيل جولىنىڭ ءبىراز بولىگىن قايتا جاڭعىرتتى. وبلىستىق ماڭىزى بار «تاسقالا – اققۋراي – بولاشاق – رەسەي شەكاراسى», «اقساي – شىڭعىرلاۋ», «تەرەكتى – اقساي» اۆتوكولىك جولدارى ورتاشا, كۇردەلى جوندەۋدەن ءوتتى. ورال قالاسىندا, زاشاعان, دەركول, كرۋگلووزەرنوە كەنتتەرىندە كوشەلەر قايتا جاڭعىرتىلىپ, كۇردەلى, ورتاشا جوندەۋ جۇمىسى جاسالدى. بايتەرەك اۋدانى اۋىلدارىنا, سونداي-اق ءبورلى, تەرەكتى, تاسقالا اۋداندارىنىڭ ەلدى مەكەندەرىنە كىرەبەرىس جولدارى سالىندى.
نەگىزىنەن ەر-ازاماتتار قىزمەت ەتەتىن ۇلكەن كومپانيانى باسقارۋ ايەل ادامعا قيىن ەمەس پە؟ وسىنداي وي وقىرمانعا دا كەلەتىن شىعار.
– ءوزىمدى بۇل سالاسىز ەلەستەتە المايمىن. جاسىراتىنى جوق, قيىن. بىراق ۇجىمدى ايەل ادام باسقارعاننىڭ ارتىقشىلىعى دا بار. مەن ءار قىزمەتكەردىڭ ىشكى دۇنيەسىنە ۇڭىلۋگە تىرىسامىن. جۇمىسقا قۇلشىنىسىن, قابىلەتىن بايقاپ جۇرەمىن. قالادا, دالادا جول سالۋ – ەكى ءتۇرلى. وعان قىزمەتكەردى دە لايىقتى تاڭداي ءبىلۋ كەرەك. ۇجىمدا كوبى ەر ادام بولعان سوڭ مەنى قۇرمەتتەپ, ارقاشان قولداپ جۇرەدى, – دەيدى قايسار قىز.
تاقتايداي تەگىس جول باتىسقازاقستاندىقتاردىڭ باعزىدان كەلە جاتقان باس اۋرۋى. ويتكەنى وڭىردەگى رەسپۋبليكالىق ماڭىزى بار 1 349 كم جولدىڭ 17%-ى, جەرگىلىكتى ماڭىزى بار 4 834 كم اۆتوجولدىڭ 44%-ى قالىپقا ساي كەلمەيدى. كەيدە مەملەكەتتىڭ ميللياردتاعان تەڭگەسى جۇمسالىپ جوندەلگەن جولدىڭ ساپاسى دا سىن كوتەرمەي جاتادى. «اقساي قالاسىنا ايىنا ەكى رەت باراتىن ادام رەتىندە ايتايىن, 31 ملرد تەڭگە قاراجاتقا «قازكومسەرۆيس» سالعان جول مەن 15 ملرد تەڭگەگە «دسك پريوريتەت» سالعان جولدىڭ ايىرماسى جەر مەن كوكتەي» دەپ جازدى جاقىندا الەۋمەتتىك جەلىگە ورال قالالىق ءماسليحاتىنىڭ دەپۋتاتى ەرلان جۇماتاەۆ.
جاننا تاجىعۇلقىزى باسقاراتىن كومپانيانىڭ اتىنا جەلىدە ايتىلعان وسىنداي جىلى پىكىر وتە كوپ. كومپانيا باسشىسى كوپشىلىك سىنىنا سەرگەك قارايدى, ۇنەمى ىقىلاسپەن جاۋاپ بەرەدى. ەكى ۇلدىڭ اناسى, شاڭىراقتىڭ ۇيىتقىسى بولىپ وتىرعان جاننىڭ تاۋسىلماس ىشكى قۋاتى تاڭعالدىرادى. ول ىسكەر ايەلدەر قاۋىمداستىعىنىڭ بەلسەندى مۇشەسى, 2018 جىلدان بەرى «Amanat» پارتياسىنىڭ قاتارىندا. VII شاقىرىلعان ورال قالالىق ءماسليحاتىنىڭ دەپۋتاتى. ەل تاۋەلسىزدىگىنىڭ 30 جىلدىعى قارساڭىندا جاننا كەنجينا «ەرەن ەڭبەگى ءۇشىن» مەدالىمەن ماراپاتتالدى. وبلىس كولەمىندە قايىرىمدىلىق قىزمەتىنىڭ دامۋىنا ەرەكشە ۇلەس قوسقانى ءۇشىن «جومارت جۇرەك» سىيلىعىنا يە بولدى. جالپى, «دسك پريوريتەت» كومپانياسى ءبىلىم, مادەنيەت, سپورت سالاسى, اباتتاندىرۋ جۇمىسىنا تۇراقتى قولداۋ كورسەتەدى. تەك 2024–2025 جىلدارى عانا كومپانيا قايىرىمدىلىق شارالارى, الەۋمەتتىك جوبالارعا 50 ملن تەڭگەدەن استام قارجى ءبولدى.
«قۇرىلىسشى – ەڭ بەيبىت ماماندىق» دەگەن ءسوز بار حالىقتا. ونىڭ ۇستىنە قۇرىلىسشى انا, نازىك جاندى ايەل بولسا, بۇل كاسىپتىڭ قادىرى بيىكتەي تۇسەتىن سياقتى. ادەتتە ايەل جانى ادەمىلىككە جاقىن, ۇيلەسىمدى قالايدى, ماحاببات-مەيىرىمگە مول بولادى. جاننانىڭ ۇنەمى ەلدىڭ شارۋاسىندا جۇرەتىنى, تىنىم تاپپايتىنى, سونىڭ ىشىندە قۇرىلىس سالاسىنداعى ءتۇرلى تۇيتكىلدى تالماي ايتىپ, ماسەلە كوتەرەتىنى – ءتۋابىتتى مىنەزىنەن. باتىس قازاقستان وبلىسىنىڭ, ورال قالاسىنىڭ قوعامدىق-ساياسي, الەۋمەتتىك-ەكونوميكالىق تىنىس-تىرشىلىگىندە كەيىپكەرىمىزدىڭ ايقىن قولتاڭباسى بار.
باتىس قازاقستان وبلىسى
