مينسكىنىڭ قاق ورتاسىندا سيىرعا ەسكەرتكىش قويىلادى

استانا. 22 ناۋرىز. بەلارۋس استاناسى – مينسكىنىڭ ورتالىعىنا تاياۋ ۋاقىتتا سيىردىڭ ەسكەرتكىشى قويىلماق. بۇگىندە وسىعان قاتىستى جاريالانعان بايقاۋعا قۇجاتتاردى قابىلداۋ اياقتالدى. بۇل تۋرالى belta.by حابارلادى. بايقاۋدى ۇيىمداستىرۋشى مەكەمە – مينسك قالالىق مادەنيەت باسقارماسى. اتالعان مەكەمە تاراتقان مالىمەتكە سۇيەنسەك, سيىردىڭ ءمۇسىنىن جاساۋعا 20 ادام نيەت ءبىلدىرىپ, ءوز نۇسقالارىن جىبەرگەن. قالالىق اتقارۋشى كوميتەتتىڭ شەنەۋنىكتەرىنەن جاساقتالعان قازىلار القاسى جەڭىمپازدى 25 ناۋرىزدا انىقتايدى. بايقاۋ تالاپتارى بويىنشا سيىردىڭ ءمۇسىنى ىقشام جانە قالانىڭ ساۋلەت ۇلگىسىمەن ۇيلەسىمدى بولۋى كەرەك. نيەت بىلدىرگەندەردىڭ اراسىندا بەلگىلى مۇسىنشىلەر مەن ساۋلەتشىلەر بار. ولاردىڭ كوپشىلىگى ەلدەگى شىعارماشىلىق وداقتىڭ مۇشەلەرى. سونداي-اق, بەلارۋس ونەر اكادەمياسىنىڭ ستۋدەنتتەرى دە ءوز باقتارىن سىناپ كورمەك. قولادان قۇيىلاتىن سيىر ءمۇسىنى مينسكىدەگى «كوماروۆ بازارى» كوممۋنالدىق ساۋدا مەكەمەسىنىڭ الدىنداعى الاڭعا قويىلادى دەپ جوسپارلانۋدا. بۇل بازار بەلارۋس استاناسىنىڭ ورتالىعىندا ورنالاسقان. قالا باسشىلىعىنىڭ ايتۋىنشا, سيىر مالىنىڭ بەلورۋس حالقى ءۇشىن ماڭىزى زور. «قيىن-قىستاۋ كەزەڭدەردە ءسۇتى مەن ەتى ەلدى امان ساقتاپ قالدى. ودان بولەك, ەلىمىزدىڭ بۇگىنگى دامۋىندا دا سيىر ەتى مەن ءسۇتىنىڭ ءرولى ەرەكشە. ءبىز بۇگىندە وسى ونىمدەردى ەكسپورتتاۋ ارقىلى مەملەكەتتىڭ قازىناسىنا مول قارجى قۇيىپ وتىرمىز. سوندىقتان سيىرعا ەسكەرتكىش قويۋ وتە ورىندى», دەيدى بيلىك وكىلدەرىنىڭ ءبىرى. قازىرگى تاڭدا الەمنىڭ بىرقاتار ەلىندە سيىر مالىنا ەسكەرتكىش قويىلعانى بەلگىلى. ماسەلەن, ءسۇت ونىمدەرى مەن ىرىمشىك وندىرۋدە الدىڭعى قاتارداعى ەل سانالاتىن نيدەرلاندى دا بۇل جانۋارعا ەرەكشە قۇرمەت بىلدىرگەن. ال ءۇندىستاندا سيىرعا قويىلعان ەسكەرتكىش جۇزدەپ سانالادى. ونىڭ سەبەبى ايتپاسا دا تۇسىنىكتى. ەلامان قوڭىر. دەرەك: belta.by. سۋرەت: by24.org.