سۋرەتتى تۇسىرگەن – ەرلان التىباەۆ
بۇل وڭىردە مۇستافانىڭ سپورتتاعى ءىزىن جالعاعان شاكىرتى – قازاقستاننىڭ ەڭبەك سىڭىرگەن جاتتىقتىرۋشىسى قابيبەك مۇحيتوۆ. تاەكۆوندو تارلانىنان ءتالىم العان ونىڭ كوپ جىل باپتاعان شاكىرتتەرى باۋىرجان تورەباەۆ, مۇستاحيم قابدراشەۆ, نۇرحات دۇيسەنباەۆ رەسپۋبليكالىق, حالىقارالىق سايىستاردا توپ جاردى. قازىر ولار دا شاكىرت باپتاپ ءجۇر.
مۇستافا وزتۇرىكتىڭ اتىراۋدا اشىلعان تاەكۆوندو مەكتەبىندە اتالعان سپورتتىڭ قىر-سىرىن جەتىك مەڭگەرگەن جەرگىلىكتى تاەكۆوندوشىلار وليمپيا ويىندارىندا ەل نامىسىن قورعادى. الدىمەن ارمان شىلمانوۆ پەن ليا نۇركينا 2008 جىلى بەيجىڭ وليمپياداسىنا قاتىستى. سول ءدۇبىرلى دودادا ارمان شىلمانوۆ قولا جۇلدەگەر اتاندى. كەيىن رەسەيدىڭ استراحان وبلىسىندا كىندىك قانى تامعانىمەن, مۇنايلى شاھارعا تۇپكىلىكتى قونىس اۋدارعان گۇلنافيس ايتمۇحامبەتوۆا اتىراۋلىق جاتتىقتىرۋشىلاردىڭ ءتالىمىن الىپ, لوندون وليمپياداسىندا باق سىنادى. بۇدان سوڭ تۇركيادان ەلىمىزگە ورالعان تاعى ءبىر قانداسىمىز جانسەل دەنيز ءدال وسى وڭىردە شەبەرلىگىن شىڭداپ, توكيو وليمپياداسىنىڭ جولداماسىنا يە بولدى.
اتىراۋلىقتار جەرگىلىكتى تاەكۆوندوشىلاردىڭ وسىنداي جەتىستىگىن مۇستافا وزتۇرىكتىڭ اتاجۇرتقا ورالۋىمەن بايلانىستىرادى. ويتكەنى ول اتامەكەننەن الىستا ومىرگە كەلسە دە «جان تارتپايدى, قان تارتادى» دەپ ۇلتتى, وتاندى ءسۇيۋدىڭ, قازاق رۋحىن اسقاقتاتۋدىڭ ۇلگىسىن كورسەتتى. قازاق سپورتشىلارىنىڭ الەمدىك دودالاردا توپ جارعانىن, كوك بايراقتىڭ بيىكتە جەلبىرەپ, ءانۇران شىرقالعانىن قالادى. ۇلت رۋحىنىڭ بيىكتەگەنىن ارمانداپ, ونەگەلى ءارى ىزگىلىكتى ىسىمەن اڭىزعا اينالعان ارىس دەسە جاراساتىن قازاقتىڭ ءبىرتۋار پەرزەنتى مۇستافا وزتۇرىكتىڭ ومىرگە كەلگەن كۇنى – 23 قاراشا. ءدال وسى وسى كۇنى ارىستانداي ايبارلى تۇلعانىڭ ەسىمى مۇنايلى شاھاردىڭ «بالاۋسا» شاعىن اۋدانىنداعى جاڭا كوشەگە بەرىلدى.
وسىعان وراي وتكەن ءىس-شاراعا كەلبەتى دە, قاس-قاباعى دا مۇستافانىڭ وزىنەن اۋماي قالعان قىزى نەسليحان وزتۇرىك پەن باۋىرى ومار تايجي ارنايى كەلدى. ارداقتى اكەسىنىڭ مەيىرىمدى ءسوزىن, جىلى الاقانىن اڭساعان قىزى كوشەگە قويىلعان ەڭسەلى ەسكەرتكىش تاقتاداعى بەينەسىن ايالاي سيپاپ, ەرەكشە تولقىنىسىن جاسىرا المادى.
«اكەم كوزى تىرىسىندە ءوز جولىنىڭ قانشا جاننىڭ جۇرەگىنە جەتەتىنىن, تالاي بۋىندى رۋحتاندىراتىنىن بىلمەگەن ەدى. ءوز ەسىمى ونداعان جىل وتسە دە شەكسىز ماحابباتپەن, ماقتانىشپەن, قۇرمەتپەن اتالاتىنىن سەزبەدى. اكەمنىڭ ومىرگە كەلگەن كۇنى جايىق وزەنىنىڭ جاعاسىنداعى اتىراۋ قالاسىنا العاش رەت تابانىم ءتيدى. مۇندا اكەمنىڭ ۇسىنىسىمەن اشىلعان تاەكۆوندو مەكتەبىنىڭ شاكىرتى كوپ ەكەن. ولاردىڭ جەتىستىگىنەن دە حاباردارمىن. جاڭا شاعىن اۋدانداعى كوشەگە ەسىمى بەرىلگەنىنە قۋانىپ, ءارى تولقىپ تۇرمىن. بۇل – مۇنايلى ءوڭىر تۇرعىندارىنىڭ اكەمنىڭ رۋحىنا قۇرمەتى. ەسكەرتكىش تاقتادان اسىل اكەمنىڭ بەينەسىن كورىپ, ساعىنىشىم ۇدەي ءتۇستى», دەيدى نەسليحان وزتۇرىك.
باۋىرى ومار تايجي دا مۇنايلى شاھارعا العاش رەت تابان تىرەدى. ونىڭ ايتۋىنشا, مۇستافا بالا كەزىنەن قازاقتى الەمگە تانىتىپ, ابىرويىن اسقاقتاتۋدى كوزدەپتى.
«ول اتامەكەنگە ورالۋدى كوپ جىل بويى اڭسادى. «قانىم اتاجۇرتقا تارتىپ تۇرادى. قازاق جەرىنە تابانىم ءبىر تيسە عوي. كيەلى توپىراعىن باسىپ, اۋاسىمەن كەڭ تىنىستاعىم كەلەدى», دەۋشى ەدى. سول ارمانى ورىندالىپ, قازاقستاندا تاەكۆوندو سپورتىنىڭ نەگىزىن قالادى. قازىر قازاق ەلىنىڭ تاەكۆوندوشىلارى الەمدىك سايىستاردا توپ جارىپ ءجۇر. بار قازاقتى باۋىرىنا باسقان اعامىزدىڭ ەسىمى اتىراۋداعى كوشەگە بەرىلگەنى كوڭىلىمدى تولقىتتى», دەدى ومار تايجي.
ال شاكىرتتەرى تاەكۆوندو تارلانىنىڭ ادامي بولمىسىنا تەرەڭ بويلادى. مۇستافا وزتۇرىك شاكىرتتەرىنە ايتقان تاربيەلىك ءمانى زور ۇلاعاتقا تولى سوزدەرىن ەسكە الدى. قازاق ەلى, شاكىرتتەرى بار دا الەم تانىعان داڭقتى تۇلعانىڭ ەسىمى ۇمىتىلمايتىنىن ءسوز ەتتى.
«مۇستافا اعامىزبەن العاشقى كەزدەسۋدى ءالى كۇنگە ۇمىتقان جوقپىز. ول ءاردايىم شاكىرتتەرىنە تاعىلىمدى اڭگىمە ايتىپ, «شەبەرلىگىڭ شىڭدالىپ, باعىڭ جانسا, چەمپيون بولۋ قيىن ەمەس. بىراق ومىرگە ادام بولىپ كەلگەن سوڭ الدىمەن ادامدىق بولمىستى جوعالتپاۋ قاجەت. سپورتشى اتاق پەن داڭقتىڭ بۋىنا بوي الدىرماي, مەيىرىمدى, قايىرىمدى, سوڭىنان ەرگەن بۋىنعا ۇلگى كورسەتەتىن ونەگەلى بولۋى كەرەك», دەگەندى ءجيى ايتۋشى ەدى. مۇستافا اعامىز – نامىستان جاراتىلعان بىرەگەي تۇلعا», دەيدى قازاقستاننىڭ ەڭبەك سىڭىرگەن جاتتىقتىرۋشىسى قابيبەك مۇحيتوۆ.
اتىراۋ وبلىسى
