فوتو: استانا قالاسى اكىمدىگى
كيرپيچنىي وندىرىستىك ايماق ءارى جەكە ۇيلەردىڭ مۇرجاسىنان شىققان تۇتىننەن اۋا ساپاسى ناشار بولعان. تالعات راحمانبەردىنىڭ ايتۋىنشا گازداندىرۋدىڭ ارقاسىندا ەكولوگيالىق جاعداي دا ەداۋىر جاقسارادى.
كيرپيچنىي الابىن گازداندىرۋ ءۇشىن جەو-1-دەن جوعارى قىسىمدى 18 شاقىرىمدىق گاز قۇبىرى تارتىلىپ, قازىر ەلدى مەكەندەگى 255 ءۇيدىڭ ىرگەسىنە گاز كەلىپ تۇر. ال گازعا قوسۋ ءىسى كەزەڭ-كەزەڭىمەن جۇزەگە اسىرىلادى.
«گاز قۇبىرىنىڭ وتكىزۋ قابىلەتى ساعاتىنا 5 مىڭ تەكشە مەتردەن اسادى. گازعا قوسىلۋ ءۇشىن جەكە كۋالىك, تەحنيكالىق پاسپورت, جەر اكتىسى جانە ءۇيدىڭ مەنشىك قۇجاتتارى قاجەت. ءوتىنىشتى eGov ارقىلى ونلاين بەرۋگە بولادى», دەدى «QazaqGaz Aimaq» اق استانا وندىرىستىك فيليالىنىڭ ديرەكتورى ءۋاليحان قىمباتوۆ.
ايتا كەتەيىك, استانانى گازداندىرۋ ءىسى 2019 جىلى باستالعان. جەكە ۇيلەرمەن قاتار جىلۋ ەلەكتر ورتالىقتارى دا كوگىلدىر وتىن تۇتىنۋ جۇيەسىنە كوشىرىلدى. ال 2025 جىلدىڭ باسىندا «Family Village» تۇرعىن الابىنا گاز بەرىلدى. رەسپۋبليكا كۇنىنە وراي تەلمان تۇرعىن الابى دا گاز جۇيەسىنە قوسىلدى.
بۇعان دەيىن استانا ماڭىنداعى قوياندى اۋىلىنىڭ تۇرعىندارى تابيعي گازعا قول جەتكىزگەنىن حابارلاعانبىز.
